اغاني و(بخرات).!

*غايتو برنامج (اغاني واغاني) بدون (فرفور) السنة دي…زي (الزول الرايح ومالاقي ود حلال يوصف ليهو).!
*يتلفت ساااااااكت.
*الغريب في الموضوع في ناس ماشغالة بـ(فرفور) كتير…وبيتكلموا عن عودة افراح وصباح وريماز.
*غايتو (جنس حركات).!
*ياجماعة…نختلف او نتفق…البرنامج دا بدون (فرفور) مابمشي لي قدام.
*الزول دا الوحيد القاعد يحفظ الغناء.
*الباقيين كلهم (ناس ورق ساااااكت).
*الواحد فيهم تلقاهو شايل الورقة في يدو زي (البخرة).
*وعمنا قدور يقعد يضحك.
*ماعارفين بيضحك على شنو..؟
*ياربي يكون بيضحك على (البخرة)..؟
*اول مرة في حياتي اشوف لي فنان بيغني من (بخرة).!
*ماعارف ليه بتحسسوني بـ(الغربة) لما اشوفكم وانتو بتغنوا من الورق.
*ياخي (البنغالة) بقوا حافظين غنانا…خليكم انتو.
باص بيني:
*غايتو اخطر حاجة بيخاف منها الطالب لما (البخرة) ماتضرب…انتو اخطر حاجة بتخافوا منها شنو..؟
باص اخير:
*رأيكم شنو لو اتحول اسم البرنامج وبقى (اغاني وبخرات)..؟..اهو…على الاقل تكونوا صادقين مع المشاهد ومع (روحكم) ذاتو.!