· أنتوا إذا كان لاعب (مشطوب) من الهلال بتدفعوا فيه (3) مليار ..أمير كمال المطلق السراح ح تدفعوا فيه كم؟
· ما تقعدوا تنططوا لي عيونكم متل (صيوان البكا) الدقوه قبل (خبر الوفاة) ما يطلع
· بعد خمسة شهور.
· وبطيخة.
· أو أربعة شهور و 29 يوماً.
· وبصلة.
· أو بالظبط كدا أربعة شهور و28 يوماً و17 ساعة.
· وفجلة.
· عشان ما تقولوا بنتكلم ساكت.
· بالظبط.
· أربعة شهور و28 يوماً و16 ساعة و43 دقيقة.
· وعجورة.
· الثواني (سماح) ما عاوزين نحاسبكم فيه.
· سماح أنور.
· عاوزين تفكروا في حاجات تانية.
· عشان أعصابكم ما تبوظ ساكت…(قروش للمعسكر ما عندكم).
· جماعتكم باقى ليهم عشرة يوم – قالوا يعملوا ليهم معسكر في مصر.
· عشرة أيام ..والـلـه في (الجبل) ما تكفيكم.
· عاوزين تسافروا مصر.
· المهم موضوع (المعسكر) دا هسع ما موضوعنا.
· خلونا في التسجيلات.
· التسجيلات القادمة باقى ليها خمسة شهور.
· بعد هذه المدة (القصيرة) سوف يكون كل من أحمد الباشا وراجي عبدالعاطي وأمير كمال مطلقى السراح.
· يعني أحرار.
· وبله جابر.
· كل كباتن المريخ في نوفمبر القادم سوف يكونوا مطلقي السراح.
· تاني.
· الباشا وأمير كمال وراجي عبد العاطي (أحرار) في نوفمبر القادم.
· وبله جابر ذاتو (مفكوك) في الفترة الرئيسة للتسجيلات.
· ما تقعدوا تنططوا لي عيونكم متل (صيوان البكا) الدقوه قبل (خبر الوفاة) ما يطلع.
· (الباشا – أمير كمال – راجي عبد العاطي) باقي ليهم في المريخ أيام معدودة.
· خمسة شهور.
· يقولوا ليكم الكلام ألف مرة.
· أمير وراجي والباشا على مقربة من (المليارات).
· يا جهزوا ليكم (27) مليار ..يا شوفوا ليكم بلد ساكت.
· لو ما عندكم (27) مليار ..أبقوا من هسع جهّزوا (استقالاتكم).
· الهلال في التسجيلات الأخيرة – أعاد قيد نزار حامد.
· عشان يتفرغ للكيمياء.
· وأعاد قيد نصر الدين الشغيل.
· عشان يتفرغ للأحياء.
· وأعاد قيد سيف الدين مساوي.
· عشان يتفرغ للفيزياء.
· ونقعد نحرس ناس أمير كمال.
· والباشا.
· وراجي عبد العاطي.
· تسجيلات نوفمبر – الهلال ما عاوز ليه أي لاعب وطني.
· إلّا جماعتنا ديل.
· الساحة ما فيها لاعب.
· لكن لو لقينا لينا لاعب مطلق السراح.
· لاعب حر.
· انتقاله ما بكلف كتير – يبقى ما عندنا مشكلة.
· ممكن نخش في موضوع (أمير كمال وأحمد الباشا وراجي عبد العاطي).
· على الأقل عشان تحسنوا تقيّم هؤلاء النجوم.
· فالحين لي بس على (مشاطب) الهلال.
· وكباتنكم ما شغالين بيهم.
· لاعبنكم مطلقي السراح – ما قاعدين تقيموهم التقييم الذي يستحقوه.
· أنتوا إذا كان لاعب (مشطوب) من الهلال بتدفعوا فيه (3) مليار ..أمير كمال المطلق السراح ح تدفعوا فيه كم؟.
· بكري المدينة بي كهربتو الزايدة دي دفعتوا ليه تلاتة مليار.
· أحمد الباشا (كابتن المريخ) ح تدفعوا ليه كم؟.
· معقولة أنتوا بتقيموا (كباتن) الهلال.
· بتقدروا كباتن الهلال.
· وبتكرموهم وما بتقصروا معاهم.
· وقت الموضوع يبقى على (كباتنكم) تقولوا ليهم ما بنزيد اللاعب فوق مية مليون جنيه.
· مية مليون كلمة نهائية.
· بله جابر كابتن المريخ ..في داعي تعيدوا تسجيلوا بي مية مليون جنيه فقط.
· يعني مية ألف.
· والمليارات تمشي لي ناس بكري المدينة.
· الأكيد أن المريخ سوف يجد معاناة كبيرة في إعادة قيد لاعبيه مطلقي السراح.
· ظهر ذلك حينما فشل مجلس إدارة نادي المريخ بقيادة جمال الوالي في إعادة قيد (أمير كمال).
· لأول مرة يفشل جمال الوالي في إعادة لاعب جلسوا معه أكثر من مرة لإعادة قيده ولم يصلوا معه لاتفاق.
· صحف المريخ في فترة التسجيلات الماضية كانت في كل يوم تخرج بخبر تأكد فيه إعادة قيد أمير كمال اليوم.
· انتهت فترة التسجيلات دون أن يصل مجلس المريخ إلى اتفاق يقضى بإعادة قيد أمير كمال.
· أمير كمال – هو اللاعب الأفضل في المريخ في الوقت الحالي وهو لا يخرج من التشكيل الأساسي للمريخ فقد ظل أساسياً في كل مباريات المريخ المحلية والأفريقية.
· هذا التألق والمشاركة الدائمة لأمير كمال ..من الطبيعي أن ترفع قيمة اللاعب ..خاصة أن مجلس المريخ يمكن أن يدفع أرقام فلكية للاعبي الهلال الذين استغنى عنهم.
· بمعلومات أكيدة ومثبتة هناك تضجر كبير وسط لاعبي المريخ على التقييم الذي يجده لاعبي الهلال في المريخ.
· وهناك تيارات معاكسة ظهرت لمجابهة التيار الهلالي الذي تمدد في الهلال – خاصة أن لاعبي الهلال الذين وقعوا في كشوفات المريخ أصبحت الكلمة كلمتهم في المريخ.
· وصار المريخ يخضع لسيطرة القادمين من العرضة الجنوب.
· هذا الأمر أظهر (تمرد) خفي – وربما واضح في المريخ من قبل لاعبي المريخ الذين لا يجدون تقييماً مناسباً ولا احترام أو تقدير من مجلس الإدارة أو الجهاز الفني للمريخ.
· وقد تابع الناس (توقف) بله جابر الذي احتج واعترض بعد اللامبالاة التى أصبح يجدها في المريخ.
· هذا الإحساس يسيطر على أمير كمال وأحمد الباشا وراجي عبدالعاطي…وقد أعلن أمير كمال تضجره في التسجيلات الأخيرة وطالب برقم عجز مجلس المريخ من أن يوفره له.
· الأزمة سوف توضح بصورة أكبر في التسجيلات القادمة ..وأغلب الظن، بل الأكيد أن المريخ سوف يفشل في إعادة قيد نجومه.
· وربما يحاول مجلس المريخ البحث عن (مخارجة) مبكراً ..حتى يتحاشى الحرج الإعلامي والجماهيري الذي يمكن أن يتعرض له المجلس.
· اللاعب أحمد الباشا كابتن المريخ وأحد أفضل المواهب السودانية ..ظل يتعرض لحرب متواصلة من مجتمع المريخ.
· هناك محاولة من مجلس الإدارة ومن قبل الإعلام الأحمر لإظهار أحمد الباشا في صورة غير احترافية باعتبار أن اللاعب غير منضبط وغير ملتزم ..وقليل الانتماء والارتباط بالمريخ.
· أحمد الباشا سوف يتعرض لحرب باردة في الفترة المقبلة ..غير أننا سوف نتابع الأمر ونكشف المستور.
· خاصة أننا نملك الكثير من (المعلومات) في هذا الشأن ..ويمكننا أن نقدم ذلك الملف تباعاً حتى فترة التسجيلات القادمة.
· اللاعب راجي عبد العاطي أيضاً من اللاعبين مطلقي السراح في نوفمبر القادم.
· أمير كمال يطالب برقم كبير من أجل إعادة قيده في نوفمبر القادم ..وأحمد الباشا العلاقة بينه وبين المريخ الآن تمر بأسوأ مراحلها.
· اللاعب الوحيد الذي يمكن لمجلس المريخ أن ينجح في إعادة قيده في نوفمبر القادم هو اللاعب راجي عبد العاطي.
· وذلك لسبب واحد ..هو أن خروج ثلاثة لاعبين من عناصر المريخ الأساسية في فترة واحدة أمر سوف يجعل الأمر صعباً على مجلس المريخ.
· خاصة أن مجلس المريخ فشل في أكثر من مرة في الوصول لاتفاق مع اللاعب أمير كمال.
· مجلس إدارة نادي الهلال كان قد أعلن مبكراً عن عدم رغبته في التجديد للاعب المعز محجوب واللاعب عمر بخيت ومهند الطاهر الذي غادر من أجل الاحتراف في أسبانيا.
· كيف سوف يجد مجلس المريخ (مخرجاً) من هذه الأزمة …التى بدأت (تدابيرها) مبكراً ضد اللاعب أحمد الباشا.
· …………….
· ملحوظة : ح تشوفوا (العجب) في مريخ الفاشر ..انتوا بس أصبروا.
هوامش
· المنتخب الأولمبي خسر …لأن الجهاز الفني أبعد عناصر جيدة كان يمكن أن تفيد المنتخب في هذه المرحلة.
· لا أعرف لماذا تم إبعاد وليد الشعلة ..بعد أن وقع في كشوفات الهلال.
· الإبعاد يعني عشان وقع في الهلال.
· المنتخب أيضاً لم يهتم للإصابات التى تعرض لها لاعبي المنتخب.
· ما اشتغل بيهم الشغلة.
· يعني أنتوا عاوزين ناس عمر الخليلة ووليد علاء الدين ومحمد عبد الرحمن يعالجهم ليكم الوالي أحمد هارون.
· أيضاً …لا يمكن أن يمضى المنتخب فقط بدافع (التعبئة).
· الحكاية ما (دفاع شعبي).
· الرشيد بدوي عبيد ..ارحموه شوية من (الإشاعات).
· ما معقولة اليوم والتاني ..تطلع فيه إشاعة.
· ادعموه بالدعاء ..والأماني الطيبة ..بدلاً من هذه الإشاعات.
· ……………
· عاجل : يا أحمد الحاج (النت) تقيل شديد بقى زي (علي جعفر).
(صحيفة قوون)