* إنقطعنا أيام
* للشديد القوى
* إنتقلت خالتنا المحبة الحبوبه الحاجه الأميرة الجميله حفصه كنتباى
* أبنة الأمير كنتباى ابوقرجه
* وحفيدة الشيخ بابكر بدرى
* مرة قبيله
* وخشم باب
* كانت لامانا
* وكانت لنا الصرة
* يلتقى الجميع فى قلبها الكبير الذى وسع كل خلق الله
* شجرة كبيره وظليلة
* كانت تجمع تحت ظلالها كل القبيله
* رحلت وبقيت سيرتها العطرة وأعمالها الجليله
* نسأل الله لها الرحمة بقدر ما كانت رحيمه وحليمه ورؤوفه ورؤومه
* أن القلب يحزن
* والعين تدمع
* والحشا يئن حرقةً
* لنا الصبر
* ولن نقول إلا ما يرضى الله
* (إنا لله وإنا اليه راجعون)
* المهم
* عبدالعظيم جباره
* أسم لا تخطئه أذن مريخية
* أى أضان حمراء تعرف نغمة عبدالعظيم جبارة
* أنه مشجع المريخ الكبير تمساح
* تمساح اول من لبس الجلابيه المريخيه
* الجلابيه الحمراء أم نجمه تتوسط الصدر
* أقعده المرض سنينا
* ولكنه إمتثل لأوامر القيادة العامة
* وعاد للمدرجات برفقة العقيد أب شاكوش
* ووكيل عريف حافظ
* عاد للمدرجات وأجرى بروفة التشجيع للمجموعات
* أقول ليكم شامى لى ريحة مطار
* وعودة تمساح هى العودة للمطار
* تمساح المطار كان بالمطار يوم دبى
* تمساح المطار كان بالمطار يوم الشارقه
* تمساح المطار كان بالمطار يوم مانديلا
* وبالطبع كان يوم سيكافا الأولى
* عودة تمساح فال العودة للمطار
* أيها الناس
* تمساح مشجع قومى ومحترف
* لن ننسى علم السودان الذى كان يرتديه جلابية سودانية
* والمثلث فى القلب
* تمساح مشجع خلاق ومؤثر
* لذا إحترف التشجيع بالشارقه الأماراتى
* أول مشجع سودانى يحترف التشجيع خارج السودان
* دائماً المريخ أول
* مرحب تمساح
* ونتقابل فى المدرجات ومنها للمطار
* المهم
* مايحدث بالأشبال والرديف
* شئ يحير
* الموسم الماضى الأشبال البطل
* والرديف البطل
* بعد موسم واحد تبدل الحال
* الوقت ليس للتباكى على ما مضى
* الوقت ليس للعتاب على التقصير
* الرجل المناسب فى المكان المناسب
* وحب المريخ يعنى إفساح المجال عند الفشل
* فالخير يعم والشر أيضاً يعم
* والإصلاح وارد
* إذا توافرت الشفافيه
* المهم
* فى مباراتنا التجريبية
* بكرينا جاب قون
* وضفر جاب قون
* القصة بقت كلها
* بكرى ضفر قون
* ضفر بكرى قون
* يا أرض إحفظى ما عليك
* ضمَنوا ضفر فى شكوى لوزان يا عمدة
* موش زمان برضو اداكم كلمه وزاغ؟
* وديدى ما تنسوهوا
* الزول ده لو ما وقفتوهوا بشكوى
* المطار فى القزاز
* وفى لوزان ما تنسوا
* قولوا ليهم عقد بكرى كان فى البيت
* بيت كردنه
* عشان لوزان ما تعرف تفرق بين عقد بكرى معاكم وعقد بكرى بتاع العرس
* عقد فى البيت؟
* حيرتونا
* أيها الناس
* أمس حلمان الأرباب جا
* والناس غنت رجع البلد
* والللللليلا يا حسن محجوب
* المهم
* برازيلى الوسط قال ليك عندو إصابة من نوع فريد
* أمسك
* الماسوره بدت تنقط
* نوع فريد ده خلى بالك بكون قاوت
* للسن أحكامها برضو
* كلمناك يا صديقى عماد الطيب
* قلنا ليك أفرز المغلق من الهلال
* ما تجيب البضائع كلها مواسير
* تقسمها بين المغلق والهلال
* أسى الماسورة البرازيليه بدت تنقط
* أيها الناس
* لجنة الإسئنافات إلا تطير
* الموضوع دخل نفقاً مظلماً جداً
* وكلو اول ليهو آخر
* نحن على إستعداد تام لنضحى بريحة المطار التى نشمها
* وبكل الموسم الرياضى
* مقابل إصلاح الحال وإبعاد من يميل الحال
* قرارنا واضح
* الثورة مستمرة والسادن يطلع بره
* أيها الناس
* فتحت المدارس
* المراوح واقفة
* المويه قاطعه
* الكتب فى السوق فى
* فى المدارس مافى
* السخانه الف
* والفصول السمحه زنكى
* وصدقونى
* لو أولادنا ماتوا بالحر والعطش
* ما مشكلة
* درجة الحرارة بتدخل الجامعه وطب كمان
* المهم
* مزمل قال لى:
* سفيرنا فى تونس ماشاف يوم سعيد إلا لما المريخ لعب ضد الترجى
* قلت ليهو يا ميزو
* كان حايشوف التعاسه كيف لو حضر كورة للجماعه ضد الترجى
* وكان إتجبر ينزل بين الشوطين
* يمارس مهامه الدبلوماسيه
* كما مارسها أحد أسلافه
* ليوقف الأهداف فى سته الشوط الأول
* لكن المريخ ريحو
* وضفر قال ليهو أقعد مرتاح سعادتك
* وده كلو من بكرى المدينه
* بكرينا
* الزول ده أشكوهوا لى الله
* لوزان شويه
* أيها الناس
* إن تنصروا الله ينصركم
* أها
* نجى لى شمارات والىا لخرتوم
* والينا (القديم)
* بعد التعيينات الجديدة لينا
* نواصل فى الشمارات عادى يا والينا
* ولا بختوها لينا؟
* أفتينا
* لو شمارات الوالى دى بتختها لينا
* نخليها ونكتب شمارات وزير الزراعه وغفير الجنينه
* ونسد دى بطينه ودى بى عجينه ونغمض عينينا
ﺳﻠﻚ ﻛﻬﺮﺑﺎ
** ﻧﻨﺴﺎﻙ ﻛﻴﻒ ﻭسادين دى بى طينه ودى بى عجينه وفى الخشم دلقان سلس وفى البطن فلينه؟!!
والي لقاء
سلللللللك
تمساااااااااااح فى المطار
