*تحيه لاهلي الخرطوم
*فريق منضبط تكتيكيا
*لكن بكري فرتق تكتيكاتو
*بكري بي جريهو ده
*تور نفس التكتيك زاتو
*بكري ده ببالغ
*يجيب قون
*ويلعب باص قون كمان
*يعني حلا وحمار
*بكري ده بكتل ليهو زول
*الزول ده حقار جدا
*الزول ده حقو يمشي لوزان بره
*يسلم نفسو
*يقول ليهم اعدموني
*عشان اسري الحرب يطمئنوا
*اسري الحرب ديل فقدوا المنطق
*قولة بكري
*يهضربوا براهم
*ياخ اربعه دي كان لابسها ساكواها
*ادوها بكري سكاها
*سكه اربعه زاتها
*تور نفسها
*الزول ده بكتل ليهو زول
*غايتو بتبالغ يا بكور
*ياحقار
*المهم
*اولاد غرزه ما بنقدروا
*وسفرة الجزائر دي
*برجعوا منها بي نقاط كتييييره
*الناس ديل ما ساهلين
*ايها الناس
*دفاع المريخ بقي اقوي خطوط المريخ
*والغريه الوسط
*اما الهجوم
*فينافس الدفاع في الروعه
*المريخ كان بنقصو مدرب وحارس
*واسي بحمد الله عندو مدرب بروف
*وحارس اعاد لنا ذكري بريمه
*يبقي يا المطار جاك زول
*جاك بلانص يا فروده
*ايها الناس
*الصداره متربعين عليها
*خالفين رجل فوق رجل
*ويبكري سااااارح
*يبرطع محل ما داير
*زمان كان بجري المدنيه
*كان بجري ساي
*اسي بقي يجري فوق راي
*والغريبه ديديه
*الله عليه
*الزول ده بجيب الفارق في المجموعات
*اسمعوا كلامي ده كويس
*المهم
*ضربة كابو زي ضربة لاعب الهلال لي لاعب الامل
*تعدي واضح
*القانون حاياخد مجراهوز في موضوع كابو
*ولكن هل سيأخذ مجراهو في موضوع الصيني ؟؟؟
*هل يا الطريفي ؟؟؟
*هل يا زكي ؟؟؟؟
*هل يا اتحاد ؟؟؟؟
*هل ستنتصرون للخلق الرياضي القويم ؟؟؟؟
*هل ستاخذوا حق لاعب الامل المسكين ؟؟؟
*هل ادارة الامل الفتيه بتطالب بحق لاعبها ؟؟؟
*هل يا جمال حسن سعيد وجعتك الضربه بالكوع ؟؟؟
*هل سينسحب الامل من الدوري اذا صهين الاتحاد عن كوع الصيني ؟؟؟
*هل ؟؟؟؟
*المهم
*امير كمال كلو يوم يثبت انه من طينة الكبار
*وامير لما يترك الثقه الزائده مافي مدافع زيو
*ويكفيه انه المدافع الذي سحب البساط من المهاجمين
*دي ماعملها الا باكنباور الالماني
*الله يحفظك يا امير الحسن
*وابعدك الله من الغرور والفتور
*ايها الناس
*شامي لي ريحة مطار
*مطار كبيييييييير
*طبعا ناس محمد عبدالماجد ريحة زي دي ما بعرفوها
*شموها متين عاد ؟؟؟
*لكن نحنا بنفرزها
*بنعرفها وبتعرفنا
*لكن بصراحه
*بكري ده مفروض يسلم نفسو
*للامم المتحده زاتها
*يقول ليها
*يا امم يا متحده
*انا مجرم حرب
*كلو يوم بكتل اسير
*واسير محاسنك بمن ؟؟؟
*ايها الناس
*كوع الصيني طلع بوع الاتحاد
*خجلهم خجله شديده
*النيلين السنه كلها قاطعه
*مالقت تجيب الا الكوع في وش الزول ؟؟؟
*النيلين زاتها غلطانه
*حقو الاتحاد يفسخ العقد معاها
*بالمناسبه
*النيلين عملت شنو في موضوع زهير عبادي ومحمد موسي
*يعني عشان قالوا الحق
*ابعدوهما
*ولا الحاصل شنو يا ربي ؟؟؟
*بالمناسبه
*القصه كلها كانت قصة (فيرتيكال ) و (هوريزينتال )
*وحانرجع ليها بالتفصيل الممل جدا
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*لسه الكلب قبل عربية النفايات بجينا
*عينوا الكلب بدل العربيه يا والينا
*نضمن انو مافي كلب بجينا
سلك كهربا
ننساك كيف والكلب قبل العربيه بجينا يا والينا
وإلى لقاء
سلك
بكري ده حقو يمشي لوزان بره
