تصميم الجرايد زمان ما كان بالكمبيوتر زي هسع .. كان في كم نفر كدا بصمموا الجرايد كلها ..
صحيفة الوان ..الله لا كسّبها .. كان بصممها واحد عندو عجلة ومسجل .. بخش الجريدة ويشغل المسجل بتاعو علي شريط حنان بلوبلو فنانتو المفضلة ..
بعدين يوم ..الشيخ حسن الترابي زار الجريدة وطاف علي الاقسام ودخل قسم التصميم لقي ليك بلوبلو مهججة الدنيا .. حسين خوجلي بسرعة مد ايدو يقفل المسجل لكن الشيخ منعو .. حسين احرج جدا واخر اليوم نادي الراجل وقاليهو وقت انت بتحب الاصوات النسائية هاك اسمع دي .. وادهو شريط لفنانة عربية مجيدة .. تاني يوم الراجل جا ورجع الشريط لحسين وقاليهو ..
هاك .. انا الغنا … المعسّم دا … ما بنفع معاي ..
حلقة الليلة ما فيها ولا غنية واحدة معسّمة ..لا لحن ولا كلام ..
ابوقطاطي وخليل اسماعيل من ابسط الناس .. واغناهم عاطفة ..
خليل اسماعيل ود بلد ..حساس وبحبو الناس ..خفيف وقلبو حي ..
امهاتنا الكبار كانن بلبسن السبحة في ايدهن .. زي الغويشة احفظ مالك .. المنظر دا بقي اكبر رمز للحنية علي الجميع ..حتي ولو لم تسمع كلمة ..يا حشاي ..!
خليل اسماعيل قدر ما عمل ..ما قدر يفرّغ لهف نفسو الشفيفة .. ربط السبحة علي ايدو متل حبوباتنا .. حين غني .. بكرة يا قلبي الحزين تلقي السعادة .. !
ود اللمين ..الباشكاتب .. قال ..كنا لمن نكون دايرين نسمع غنا وننطرب ..كفنانين ..كنّا بنادي خليل اسماعيل .. فاصبح اسمه ..فنان الفنانين ..!
من صفات خليل الشخصية انه كان يحب النظافة .. قيل لدرجة الهوس … في يوم مشي يغني في حفلة ..فدخلوهو البيت في اوضة جنب صيوان الطباخ ..الطباخ كان جايط الدنيا جوطة شديدة .. فخليل استاء جدا .. بعدين جاتو غفوة كدا .. وصحي علي صوت طلقات رصاص لمن العرسان جوة .. فصحي وقال للجنبو .. اها قتلتوهو ..? قالوا ليهو منو .. قاليهم ..الطباخ ..
احنا ناس بسيطيين .. بساطتنا جاية من روح خفيفة شفافة رقيقة ..سوّت ليها درقة .. الدم الحار ..زي ابو القدح كدا يعني ..!!!
اقل هبشة ..كااافية انها تهز الساكوبيس الخفيف دا .. كلو كدا علي بعضو .. ديل نحنا كدا .. اكثر حساسية ..لكننا لسنا اكثر هشاشة ..!
الله يرحمك يا استاذنا خليل اسماعيل .. ويرزقك جنة بغير حساب ..
و …
سلّميلي علي الحبيّب …
المهم .. تلقيهو طيب .
بقلم: محمد حسن المهدي
-
-
-
-
-
-
-
-
