احذروا غضبة الحليم

> جمهور المريخ صفوه
> لكن تفتيحه
> والزول لما يكون تفتيحه ببقي شفت
> شفت شديد
> بكون ناقش اي حاجه
> وفوق على ذلك
> فإن جمهور المريخ حليم
> وحليم جداً
> لذا نحذر من غضبة الحليم
> لأن غضبة الحليم بتجيب عاليها واطيها
> فبعد الظلم التحكيمي الداخلي
> وبعد السكوت على مكنة الحكم يخطئ ولا يظلم
> جاتنا كمان حركات تحكيم على المستوى الافريقي
> لا لشيء سوى عرقلتنا في طريق المطار
> لأنهم يعلمون جيداً اننا في طريقنا للمطار
> وان فرق المجموعتين الباقيات ليست سوى كمبارس ليكمل اللوحه فقط
> لذا كان مامادو الحكم السيئ الذي ادار لقاء الاتحاد والمريخ
> وجاء بعده الجنوب افريقي
> هو نفسه الذي حاول هزيمتنا امام الترجي بشتى السبل
> فاعطاهم هدفين اوانطة
> كنا نظن ان غضبة الجماهير المريخيه على حكم اتحاد الجزائر
> خلت الناس يروقوا المنقه شويه
> لكن اختيارهم للحكم الجنوب افريقي لمباراة الوفاق
> يعني انهم مصرين على تنفيذ مخططاتهم
> وده تحدي
> ومن يتحدى جماهير المريخ خسران خسران خسران يا ولدي
> ايها الناس
> لا نحبذ التفلتات
> ولكن جماهير المريخ وصلت الحد
> «تو ماتش»
> والقصه دي بتجيب كارثه
> كارثه داخليه وافريقيه
> تشعل ناراً
> تأكل الاخضر واليابس
> نحن نحذر
> على القائمين على الأمر في لجان الكاف
> بالذات لجنة الحكام
> ان يفتحوا عينهم كويس
> لأن الفاس اذا وقعت في الراس
> ما بنفع معاها يمه ارحميني
> المهم
> الاعلام المضاد
> الاعلام الذي يعمل لقتل الروح المعنويه لاولادنا
> قصتو مكشوفه جداً
> ومحاولة الزج ببكري في المشاكل
> هي محاولات فاشله
> لن تؤتي اكلها
> لأن بكري له جمهور يعرف كيف يحميه
> الذين يريدون ان يحبطوا بكري قبل لقاء الوفاق
> حتى يشارك شارد الذهن
> واهمون
> بكري اشفت من كده
> وجمهور المريخ واقعه ليهو الرصه
> فقط نسأل
> هل من يختلق المشاكل يقوي علي مواجهتها اذا شعللت؟
> الواقع والوقائع ستجيب على هذا السؤال
> ايها الناس
> المريخ اذا كسب الوفاق او تعادل او خسر
> لا يعني ذلك خروجه من المنافسه
> الفرصه مواتيه
> والمطار لا محال
> ايها الناس
> قوون كانت مبعده عن معسكر الفجيره
> معسكر الهلال بالفجيره
> ليه ما عملت مشكلات كالتي تفتعلها الآن؟
> اذا الفريق الذي تنتمي اليه قوون
> طاردها من معسكرو
> الموديها معسكرنا شنو؟
> جايين تشوفونا كيف بنشتري المجد؟
> مجلس المريخ حر
> يقبل ياتو صحيفه
> ويتعامل مع ياتو صحفي
> وزي ما فطومه ختت ليكم شروط لزيارة معسكر الهلال
> نحنا برضك عندنا شروط
> اولها على الاقل الحياديه وعدم الشتل
> ومجلس المريخ يا ناس قوون
> اذا كان نائب رئيسه مستقيل
> وامينه العام متوقف
> فهذه في المريخ ليست مشاكل
> فالهلال مثلاً لم نسمع بمجلس ادارته اطلاقاً
> سمعنا بس بي كردنه وعمده احياناً وفطومه وروشا
> فهل هذا هو كل مجلس الهلال؟
> وسمعنا ببعثة الهلال تغادر للخارج بدون النقر
> المدرب العام
> فهل اثرتم يا ايها المحايدون هذه النقطه؟
> ايها الناس
> اعلم بمريخية عصام طمل
> واستبعد ان يكون هو من ارسل الشتلات والكذبات التي نسمع بها في بعض الصحف الزرقاء
> ولكن اين مريخيتك يا طمل
> وانت تصر على تصعيد المشكلات مع بكري
> وبكري يستعد لاهم مواجهه له
> اين تلك المريخيه يا طمل؟
> ام ان الولاء للصحيفه اكبر واعمق من الولاء للمريخ؟!
> المهم
> الجماهير عرفت الحاصل
> وفاصل ونواصل
> ايها الناس
> ريحة المطار فاحت
> محتاجه بس حبة شفتنه
> والشفتنه ما ناقصاكم يا شفووووت
> المهم
> محمد خير ود عمي الهلالابي
> عندو ولدو مغترب اسمو طارق
> وكعادة الاهله
> خايفين من المريخ يجيب الكاس
> قال لي بالحرف الواحد
> الكاس ده لو جبتوهوا ماعندنا قعاد في البلد دي
> برسل لي طارق يرسل لي ويسوقني الامارات
> قلت ليهو الا يرسل ليك بالبحر
> في المطار بنكون قاعدييييييييييييييين يا حبيب
> وقلت ليهو ليه ما بتقعدوا في البلد دي
> قبل كده جبنا مانديلا وانتوا لسه قاعدين
> جبنا تلاته سيكافات
> عمره ما شفناكم مشيتوها
> جبنا دبي
> وانتوا مركلسين فوق صفركم
> لمن بقيتوا تغنوا
> دخلوها وصفيرها حام
> البمرقكم المره دي شنو؟
> قال لي حاجه نبيخ بيها الكاس ما عندنا
> نطفش بس
> قلت ليهو اقلبوا وريحو روحكم
> ايها الناس
> في فريق كده لو الطياره وقعت بالسبعه فرق الباقيات
> برضو ما بشيل الكاس
> اطمئنوا
> ايها الناس
> المحيرني في ناس بتتكلم عن قصور مجلس المريخ
> والوالي وفر ميتين الف دولار لمعسكر الجزائر
> وهم مدربهم لي اسي اظنو ما جا
> وجود جمال فقط في مجلس المريخ
> زي مجلس الشيوخ الامريكي
> جمال في
> مشكلة مجلس مافي يا حبيب
> ايها الناس
> قوون المحترمه تشوف فريقها وين وتستأذن من فطومة اختي وترافقو
> نحنا ما دايرين
> كتر خيركم
> ولو فطومه ما ادتكم الإذن كالعاده
> تعالوا لينا بنتوسط ليكم
> باقي لينا عندها خاطر
> اخير ليكم من مناشدة الخارجيه
> ايها الناس
> والله يا هو البضحك
> انتوا مقاطعة مجلس الهلال لصحيفة قوون جابت حقها ولا شنو؟
> فطومه الناس ديل لو ما رفعتوا عنهم الحظر
> علييييييييييييييك الله
> عشان خاطرنا
> ارفعوا عنهم حظر التجول خلوهم يباروكم في معسكراتكم
> الجماعه برضك ناسكم يا اختي
> يا ناس قوون
> الشكيه للخارجيه ما بتجيب جويه
> بكري ده اشكوهوا لي كاكي يمكن يلحقو ليكم
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> في العيد السعيد ده
> الكلب قبل العربيه بجينا
> لا قال الدنيا عيد يا والينا
> ولا حسه بينا
> ولا خجل من الاوساخ مشتته في العيد بينا
> جنس برود غايتو عليكم في ما يتعلق بينا
سلك كهربا
ننساك كيف وفطومه اذا رفعت الحظر عن جماعه كده بنرتاح شويه
والى لقاء
سلك