اشانة سمعة البلد

*مؤسف ان يكون هدف صحيفه هو تحطيم معنويات فريق يمثل الوطن
*مؤسف ان يكون هدف كيان كامل هو تحطيم لاعب رفضهم جملة وتفصيلا
*مؤسف حقيقة ان نقرأ علي صفحات الفيس وقوف جمهور سوداني علنا مع فريق جزائري ضد فريق يمثل الوطن
*ده كلو اشانة سمعة للوطن
*ومن غيرنا اعطي لهذا الشعب معني ان يعيش وينتصر
*من غيرنا قابلتو الحكومه في المطار
*من غيرنا دخل القصر الجمهوري متوجا متوشحا بارفع الاوسمه
*من غيرنا ؟؟؟؟
*ده السبب الذي ولد الاحساس بالدونيه عند الآخرين
*فاعلنوها حربا علي المريخ العظيم
*صدقوني
*لو الطياره وقعت بي سبعه فرق من فرق المجموعتين
*وبقي فريق واحد
*مابشيل الكاس
*فالزناطير ما بتشيل كاس لو تطير
*لان التفرغ للحسد والدسائس
*مابقدم سيدو
*بل يزيد في صفرو
*ايها الناس
*يمكننا كجماهير مريخيه ان نقاطع الصحيفه التي تقصد هدم استقرارنا
*والمقاطعه ليست فقط علي القراء
*بل تشمل المعلنين
*وعندها المرتبات الا تجي من حجار سابقا
*ايها الناس
*التبريرات الفطيره
*والحركات الخميره
*لن تزيد المريخ الا تمسكا بالمسيره
*مسيرة المطار
*ده درب بنعرفوا برانا
*ولا اظنك يا عزيزي طلال تعرف درب المطار
*مشيتو متين عاد ؟؟؟؟؟
*ده درب الوصول اليه بالعرق والموهبه
*لايشتري يا حبيب
*ايها الناس
*فريق طردك من معسكروا
*البجيبك مبارياتو التجريبيه شنو ؟؟؟؟؟
*قبل كده حرم البعض من معسكر الفجيره
*ماقوموا الدنيا وقعدوها ليه ؟؟؟
*عزيزي عصام طمل
*لاتنسي ان طلال هلالي وانك مريخابي تفترض فيك الشفتنه
*ماتبقي يا اخوي عصاية يشاكلوا بيها الناس
*لو بقيت كده
*بجي يوم تنجدع فيهو
*اصلوا لما الشكله تعك
*العصايه بنتجدع بعيد
*المهم
*ناس قون علموا شنو في مقاطعة الهلال ليهم ؟؟؟
*لو مافكوا حظركم تعالوا نتوسط ليكم
*باقي فطومه اختي عندنا عندها خاطر
*يمكن تقبل وساطتنا وتعيد صحيفة الحكيم للحظيره
*اصلو العرجا لي مراحها
*ايها الناس
*بكري ده حارق الناس ليه ؟؟؟؟
*بالطريقه دي يوم حاتطرشقوا
*ايها الناس
*زول قال ليك مادايرك في معسكري
*تجيهو تاني
*ده ما ختا ده ؟؟؟؟
*في مثل بقول ضربني وبكا سبقني اشتكي
*ايها الناس
*بكري المدينه ده قولوا ما نصيح
*قولوا كلب عديل كده
*البجيبك بالشارع الفيهو الكلب شنو ؟؟؟
*لما يعضيك اركز
*موش انت الجيت بي شارعو ؟؟؟؟
*ايها الناس
*يمكننا كجماهير اعلان المقاطعه
*ووقتها سيفسح المجال لجوهرة رمضان
*باقي هي باقيه للناس في تولا
*واذا افسحنا المجال لجوهرة رمضان
*الصحيفه بتلحق القناه
*نحنا (ختريييييييييين)
*ياخ زول قالوا ليهو مادايرين معاك
*البجيبو لينا تاني شنو ؟؟؟؟؟
*ايها الناس
*معسكرنا سليم في السليم
*وفريقنا نحمد الله افضل فرق المجموعتين بدون منازع
*وريحة المطار فاحت
*مافي زول يغالطنا
*لانو مافي زول غيرنا شماها
*والكاس كاسنا ونحنا اهلو نستاهلو
*ايها الناس
*فطومه اختي طيبه
*كلموها يمكن ترضي عنكم
*المهم
*ماقرينا في قون عدم بث شريط مباراة الهلال والفشنكات الانتهت هنا اربعه
*برغم ان كردنه صرح في التلفزيون انو المباراة في المونتاج وحاتبث
*ليه مابثوها
*ناس قون ناس الاخبار الصادقه ما كلمونا
*سقط سهوا يا ربي
*ولا الخبر ما عندهم ؟؟؟؟
*وما ورونا تذاكر سفر الفشنكات قطعها منو ؟؟؟
*ماسمعوا ولا ماعارفين يا ربي ؟؟؟
*يمكن ما متأكدين
*لانو ناس قون لو ما اتأكدوا ما بنشروا الخبر
*وما ورونا موقفهم من معسكر الفجيره شنو
*ياربي موقفهم برضو ما متاكيدن منو ؟؟؟؟
*بكري المدينه
*بهريكم وما بهرينا
*انه بكرينا
*سكوهوا كده لمن نفسكم ينقطع
*ايها الناس
*والله ماكنت اتوقع ان يتحدث محمد عبدالماجد سلبا عن الوالي
*فلتت منك يا حماده
*فجمال ان كان يستغل سلطاته وامواله
*لما بقي في البلد دي غير المريخ ومريخ الفاشر ومريخ كوستي
*وانت سيد العارفين
*المهم
*ايها الناس
*ان تنصروات الله ينصركم
*اها
*نجي لي شمارات والي الخرتوم
*كان شفت يا والينا
*شارع الوالي في شرق النيل البيلينا
*قلعوهوا من قبل الانتخابات يا والينا
*صوتنا
*نسوهوا مقلع فينا
*وكان شفت يا والينا
*الغبار يكندك فينا
*الهايسات قربت تخش لينا
*الدكاكين اتكندكت علينا
*ونحنا ولا هامينا
*لكن انتوا ما هاميكم يا والينا ؟؟؟
*حاتصلحوهوا لينا يا والينا
*ولا نرجي الانتخابات الجايه علينا ؟؟؟؟
سلك كهربا
ننساك كيف والكلب لسه بجي قبل العربيه وشارع الوالي يكتح فينا يا والينا
والي لقاء
سلك