دايات يا.. حد نازل!!

> زمان لما كنا بنركب البصات
> طبعاً في محطات مشهوره وليها مكانتها
> تلقي ناس كتاااار نازلين فيها
> من تلك المحطات كانت محطة الدايات بشارع المورده
> وكان ادب الكماسره وقتها
> ان ينده الكمساري اسم المحطه قبل وصول البص اليها
> الوصول بكون وشيك
> لكنه ينبه النازل ليستعد للنزول
> المهم
> جانا صوت الكمساري
> دايات يا.. حد نازل
> كلنا نزلنا
> ايها الناس
> يوم الشكر جا
> وقبل اي شيء نشكر السيد جمال الوالي
> الراجل قدم الكتير لنصل لما وصلنا اليه
> ولو بالحسابات حقو كان الكاس
> ونشكر غارزيتو الذي كانت بصمته واضحه في درب الوصول لما وصلنا اليه
> ولكن غلطة الشاطر بعشره
> فالطريقه التي لعب بها غارزيتو بالامس
> كانت غلطة شاطر
> ونحمد الله انها كلفتنا تلاته ما عشره
> كيف بالله تلعب في منطقتك مدافعا بعشره لاعبين
> ويكرر الخصم الهجمه تلو الهجمه
> كل الوقت الخصم موجود بمنطقتك
> الا تحدث هفوة يأتي منها الهدف الذي يقصينا يا غرزه؟
> لا توجد طيلة التسعين دقيقه ولا هجمه واحده
> بل ولا محاولة للهجوم
> وبعد ان انهزمنا بهدف
> ادخل غرزه ضفر وعمر
> فكيف نسعى الى الهدف بعد تغيير اتنين من اهم المهاجمين بالفريق؟؟
> غارزيتو امس ما براهو
> وهي نفس الطريقه التي انتهجها ضد اتحاد الجزائر في المباراه الاولى
> قيد اللاعبين ولم يطلق سراحهم الا بعد ان احرز الاتحاد هدفه الوحيد
> ووقتها ندمنا على تقييدهم طيلة زمن المباراه
> كلنا خطاؤون
> فغرزه برضك بشر
> على كل شكراً غرزه
> ونعود لنشكر الاولاد
> ما قصروا
> قدموا موسم افريقي استثنائي
> دفع كل المختصين لترشح المريخ للبطوله
> وشكراً جميلاً وكثيراً
> لتلك الجماهير التي ارست ادباً جديداً
> وقدمت لوحات تشجيعيه ادهشت الاجانب
> فكانت جماهير المريخ على كل لسان
> ابقوا عشره يا شفوت
> وما تبقوا مشجعين مناسبات
> المهم
> احرز مازيمبي هدفاً في مرمانا بالخرطوم
> وتلاتة في الكنغو
> الاربعة بي سايد مصعب
> حتى الهدف الذي اتي من ركنيه
> طلعها مصعب لي ركنيه مافي ليها اي لازمه
> كان ممكن يوديها التماس
> فهل فطن غرزه لذلك ؟؟؟
> انا لا الوم مصعب
> بل لا الوم خط الدفاع باكمله
> الاربعه مولفين
> الاربعه ما فيهم مدافع
> لعيبة وسط
> اما ايمن سعيد فقدم موسماً جيداً
> ولكنه في اواخر الموسم ظهرت عليه آثار السنين
> في خط الهجوم لا يوجد مهاجم غير بكري
> كده كلامي وضح
> نحتاج لاطراف فاعله
> ونحتاج لمتوسط دفاع اهم حاجه يشيل فوق كويس
> ومحور الى جانب جابسون سريع يغطي على بطء جابسون
> ومهاجم الى جانب بكري
> نستفيد من الاخطاء
> ونعمل على سد الثغرات
> بي كده صدقوني ما بننزل الدايات
> ايها الناس
> طرنا من هنا
> عندما اضاع ديديه هدفين
> واطاح بالكرة رمضان
> ايها الناس
> ما في زول ما بغلط
> وغرزه زول
> بس بعترف بي غلطاتو
> عشان كده بستفيد منها
> ايها الناس
> فرصة لنيل اللقب اضعناها لاننا احترمنا مازيمبي اكتر من اللازم
> فكانت حقارة مازيمبي بينا
> الاستهوان بالخصم ما حبابو
> لكن كمان تضخيم الخصم برضك ما حبابو
> بدون انفعالات
> نقيم موسمنا
> ندرس الأمر جيداً
> نسد الثغرات
> وفي سد الثغرات يجب ابعاد الناس البعاكسوا في استجلاب الاجانب لشيء في نفس يعقوب
> فالجماهير عرفتهم فرداً فرداً
> وقرفت منهم شديد
> حفاظاً على اشياء كثيره
> نتمنى ان يبتعدوا
> ان يبطلوا حركات الورق ما جا
> واللاعب مصاب
> والرنين قال
> فما حدث في موضوع الياسو
> هو سبب الخروج بالأمس
> اخجلوا وخلونا موسم نعرف نشتغل من اجل المريخ
> ايها الناس
> شكراً روابط المريخ بدول المهجر
> شكراً قروبات المريخ الفتيه
> شكراً لكل من ساهم في خلق فريق هز الارض في هذا الموسم وشرفنا
> هاردلك
> والعتره بتصلح المشي
> ايها الناس
> لدينا ناس يوم شكرهم جا
> انها سنة الحياه
> حقو نشكرهم ويتقبلوا منا ذلك
> المهم
> البعض يحتاج لمراجعة مستواه
> بالذات جمال سالم
> فماذا حدث لهذا الولد اللعاب طيب السلوك؟
> في شيء
> ايها الناس
> فاكرين انو روليت دور الاربعه كالآتي:
> اتحاد الجزائر اربعه نقاط
> مازيمبي تلاته نقاط بفارق الاهداف عن المريخ
> المريخ تلاته نقاط
> وأب نقطة طيش دور الاربعه
> المهم
> وانا بتفرج اول امس في كورة اتحاد الجزائر
> سيسيه كان مصاب
> الكاميرا جابتو من قريب
> بسم الله الرحمن الرحيم
> ببكي ولا بضحك اقسم بالله العظيم ما عرفتو
> الزول ده جبتوهو من وين يا روشا ؟؟؟
> البلد دي فيها اطفال يا فطومه يا اختي يقوموا يتخلعوا كمان
> وفيها نساء بتتوحم بفضل الله
> راعوا للحاجات دي لما تجيبوا زول
> ايها الناس
> لو جبنا متوسطي دفاع مولدين مدافعين
> وختينا علولو وامير مع جابسون كمحاور
> عليكم الله رصاصه تاني بتمش ؟؟؟
> ايها الناس
> وتبقى الحقيقه الوحيده
> صاح الكمساري فينا
> دايات يا… حد نازل
> فنزلنا كلنا من البص
> ايها الناس
> من مكاسب الموسم الافريقي
> بكري ينافس على لقب افضل لاعب
> وهو الفائز بلقب هداف البطوله
> يعني برضك متواجدين في المنصه
> ما طلعنا بدون حمص
> لكن بيني وبينكم
> كورة الاتحاد موش بتشعر انها فيها توأمه!!
> أيها الناس
> ان تنصروا الله ينصركم
> والايمان بالقضاء والقدر انبل انواع الايمان
> اها
> نجي لي شمارات والي الخرتوم
> كان شفت يا والينا
> بقت فينا
> يجدعوها ورا مصعب ويدخلوها فينا
> وايمن قطع مر العمر ومرت سنينا
> وقطعوا الامداد من بكري المدنيه
> عشان كده بقت فينا
سلك كهربا
ننساك كيف وأمس فقدناك شديييييييييييد.. الكلب بكى
والى لقاء