ندى القلعة ترثي زوجها الراحل وتطلب الدعاء له: ستة سنين تمام ما شفته فيها منام وعبرات الحلق ذي طعنة الخنجر.. ركن بيتنا أتهدم ومرقو اتكسر

ذكرت بعض صفحات مواقع التواصل الاجتماعي المهتمة بأخبار الفنانة السودانية ندى محمد عثمان القلعة أن المطربة كتبت بعض العبارات ترثي من خلالها زوجها الذي رحل قبل ست سنوات.

وكشفت هذه الصفحات عن عبارات الرثاء التي كتبتها ندى علي صفحتها الرسمية عبر موقع التواصل الاجتماعي حسبما ذكروا.

وتقول القلعة في حق زوجها:

كل الناس البتحب ندى اتمني ان تدعوا ليهو بي الرحمة يوم 22 من شهر 12 فارقني.

الحبيب الطيب المعشر الباسم البشوش حاشاهو ماكشر ودعتو لي الله وبي الجنه يتبشر *********** زرفت الدموع ودعت للغالي فارقني الصبر وحال السواد حالي ابكي عليو انوح الدنيا ماسخه الي لي هسه الوجع جوه الفواد ينحر ******** الدنيا العبوس بي فوته لونه ضلام من فارق رحل لاضقته زاد لاطعام سته سنين تمام ماشفته فيها منام وعبرات الحلق ذي طعنه الخنجر ************** الزوج والرفيق الكان ملازمني في فرحي وشقاي هو الكان بقاسمني شالوه الحنين ياحليلو وين مني ركن بيتنا اتهدم ومرقو اتكسر ********************** ياحليلو الحبيب الليله فارقنا لكن ماكتير عليكا خالقنا يسكن في قصور الخلد في الجنه يارب العباد ان شاء الله اتصبر.

ولم يتسني لمحرر النيلين التأكد من صحة ما جاء علي لسان ندى القلعة, ولكن محبي المطربة أكدوا أن هذا الرثاء قام بكتابته ندى علي صفحتها الشخصية عبر موقع التواصل الاجتماعي فيسبوك.

محمد عثمان _ الخرطوم

النيلين