بمناسبة موضوع النزاعات الحدودية، لو آي حد بص على خرايط دولية دايما هيلاقى المثلث الشهير (حلايب وشلاتين) مش تابع لمصر في الخريطة وتابع للسودان. بما إني فى شغلي باستعين دايما بالخرايط فيكاد يكون معظم الخرائط المتاحة (الورقية، آو التفاعلية على النت) يتضع المثلث تابع للسودان وعلى عكس الخرائط المصرية اللى بتظهر الحدود الجنوبية لمصر كخط مستقيم من نقطة الالتقاء الثلاثية غربا (ليبيا، مصر، السودان) حتى البحر الآحمر شرقا، فإن معظم الخرائط الدولية بتيجي عند الحدود الجنوبية الشرقية وبتخلى الخط يتعرج للآعلى بحيث آن المثلث بالكامل يبقي تابع للسودان، بينما قلة قليلة من الخرايط بتعمل خطين متعرج ومستقيم متقاطعين كتعبير آن المنطقة مكان للنزاع الحدودى.
آنا بسآل بوضوح ليه موقفنا من حلايب وشلاتين غير موقفنا من تيران وصنافير ؟ السودان عمرها ما اتنازلت عن مطالبها بخصوص المنطقة دى ويمكن حتى بصوت آعلى بكتير من الصوت السعودى بخصوص تيران وصنافير اللي احنا صحينا الصبح لقيناها فجآة مش تبعنا، لكن رد الفعل المصرى مختلف جدا جدا! هل ده راجع لطبيعة مقدرات وثروات السعودية مقارنة بالسودان ؟
وياتري لو مصر قررت النهاردة تتنازل للسودان عن حلايب وشلاتين هنلاقي ردود فعل بعض النخب والناس شبه ردود الفعل بتاعتهم على تيران وصنفاير ودى آمانة ورجعناها لاصحابنا ؟ ولا هيسبوا ويلعنوا في السودان والروح الوطنية هتركبهم ؟
ياريت الإجابات تبقى علمية آو ديبلوماسية (لمن يعرف الإجابة) بعيدا عن العبارة البائسة بتاعة “ريسنا مش ممكن يفرط فى شبر واحد لينا”، لاء آنا عاوز آعرف الفرق لآغراض بحثية بعيدا عن آي تسيس للقضية والإجابة الوحيدة اللي عندى حتى الآن آن السعودية ليست السودان!
بقلم
أحمد عبد ربه
-
-
-
-
-
-
-
-
