الصدمة.. كتب السيناريو بكل حقارة ووساخة.. ديل سودانيين اصلا وملهمش لازمة.. سودانيين اي كلام.. فيديو

كل عام وانتو بخير

ماتهتمي باللذي يقال !!
اهتمي اكثر بالكلام الما (اتقال) ..
اهتمي بالكلام الضمني نص الكلمات ..
تعلمي قراءه الرسائل المشفره بين السطور …

العبارات اعلاه … قالا لي زول في مناسبه ما ..منذ زمن بعيد ..
سبحان الله اتذكرتا وانا بتابع ساعه الفطور في برنامج الصدمه …

وعاده ماقعد اتابعو …
بسمع بالهباله بتاعتم …

وبالجد كان صدمه … ما اتخيلتو كده …

بالمناسبه … في الاغلب الحلقه الاخيره من اي برنامج او مسلسل ..بتسجل اعلى نسبه مشاهده ..
حتى ولو كانت ضعيفه المحتوى .. او حتى لو ماعجبت المشاهدين تظل الحلقه الاخيره من اي عمل تسجل اعلى نسبه مشاهده ..

تفتكرو برنامج الصدمه … مقصود منو شنو ؟؟
اترك ليكم الاجابه …
نختلف او نتفق في الفكره العامه للبرنامج ..
ده ماموضوعنا ..

انا شخصيا ..المشهد بتاع اللبناني ماهماني كتير ..
شعب بعيد عني ..ومابهمني في شي …
حتى ولو كانو عنصريين ..
طيب الالمان اكثر عنصريه .. وفي يوم من الايام لمو كل الناس وحرقوهم ..
الهلوكوست ماكانت ضد اليهود بس .. كانت ضد كل الاقليات .. منهم سود واسيويين كمان ..
والامريكان عدييل قالو ممنوع دخول السود والكلاب في المطاعم ..
والانجليز .. خلو العماره تحرق 12 ساعه وماعرفو يطفوها …

ماعلينا منهم ..

نشوف مشهد المصري ..
(ابن النيل )(اجدع ناس) زي مايحب البعض تسميتهم ..
نشوف جدعنتهم ..
موضوعي عن الكلام الدقاقه … الدراب …المسجات المشفره الكانت بين السطور

الجرسون ماقالا ..
والمذيع في نهايه الحلقه برضو ماقالا ..
لكنها وضعت ..وبطنت ..وتم تغليفها نص الكلام …

اذكر بعضها …
1)ديل سودانيين اصلا وملهمش لازمه ..
2)مش عارف جو هنا ليه ..جو يعملو تأشيره ولا حاجه ..
3)دول سودانيين ومش عارف امشيهم يجي من ساعه
4)دول سودانيين اي كلام
5)دول سودانيين ..وبص بص حضرتك طالب ايه ؟؟مخدش غير اتنين بيض وواحد عصير ..
6)اتفضل مش حاحاسبك اصلا ..اتفضل تلحق طيارتك ..

لاحظتو كيف اختزل (كل الشعب السوداني وليس الاسره السودانيه ) في الحاجات القالا فوق !!
-السودانيين بزورو مصر لاسباب كتيره (سياحه ..دراسه ..علاج ..تاشيره ..لجوء سياسي ..تجاره .. زياره اقارب … حضور مناسبه ….الخ )
لكنه تعمد اختيار (التاشيره) اشاره للوضع الاقتصادي والامني في السودان ..

– والسودانيين من الشعوب (الاكاله) ماشاء الله ماشاء الله ماشاء الله
لكن لمن نجي نتكلم عن وجود اسره في مطعم ..هنا تجوز كل الاحتمالات ..ممكن يطلبو وجبه دسمه لو جيعانيين ..ممكن يطلبو سندوتشات …شاي ..عصير ..بمبر
خروف ..دبابه …اي حاجه قابله للاكل 🙂
الجرسون اختار (اتنين بيض وميه وعصير برطقان) ..اشاره انو السوداني مسكين ومفلس وماقادر يطلب وجبه كامله دسمه لاسرتو …. ملاحظين اختصرنا كيف في عصير وبيض ؟؟ مش يمكن اتغدو في بيتم وطالعين مشوار ..ونص الشارع الشفع اصرو جيعانين دايرين ياكلو (الشفع مشهورين بالعواره دي ..طوالي جيعانين والتانيه دايرين يخشو الحمام كل شويه )
ضروري اي سوداني لمن يدخل مطعم في مصر يطلب وجبه كامله للاسره كلها وهم اصلا اتغدو في بيتهم قبل يطلعو … عشان خاطر الشفع ؟ولا سندوتشين يسكتو بيوم الشفع وخلاص !!
يعني الاب والام احتمال شبعانين ..ذنبهم شنو ياكلو في كل مره مع شفعم ؟؟

لكن احتمال الاب فعلا مفلس وماعندو 🙂
طيب ماهو قعد وطلب الحاجه البقدر عليا .. وحيدفع ..
وين المشكله ؟؟ عادي بتحصل !!
المشكله انو سوداني .. ولازم يتم اختصارنا في بيض وعصير ..

كاتب السيناريو بتاع الحلقه دي .. كتب السيناريو بكل حقاره ووساخه .. هو ماكتب حوار ..انما رسم صوره نمطيه عنصريه تافهه عن السودانيين ..
وخاطئه ..
مش كده وبس ..
بل اراد يرسخا في الاذهان ..
ماتتفتكرو اختيارهم لليوم الاخير من رمضان من فراغ ..
بعدين تعمد استعمال (السودانيين) وكررا كتير .. طب ماتخاطب الاب بيا اخ او ياسيد …لكن كده مابنفع … الحلقه ماعن الاسره دي تحديدا ..الحلقه عن (السودانيين كلهم)
بعدين انت لمن تكون عندك حاجه دار تاكدا ..بتقوم تعمما (السودانيين) بعداك ترسخا ..
كيف ؟؟
بتكرارها 🙂
السودانيين
السودانيين
السودانيين
كم مره قالا ؟؟ احسبوها 🙂

الكاتب شوه بعض الحقائق عننا
ودردما .. وطلع بالصوه النمطيه سالبه عننا
الحاجه السالبه دي.. ماكان بنفع يقولا صراحه !!
ليه ؟؟
الحاجه البتتقال صريحه دايما مابيتم قبولا ..
مازي لمن تضمنا ..وتدخلا نص الكلام …وتخاطب بيا العقول بطريقه غير مباشره
كده قبولا بكون اسهل ..
نضرب مثل بالحب والمشاعر مثلا .. قبولنا لشخص بنعرفه او مابنعرفه ..لمن يجي يبوح لينا بشعورو بصوره واضحه ..قد يساورك شك وماتقبل كلامه ..يمكن بيلعب؟ يمكن ماجادي ..
لكن لمن يحاول يترجم شعورو ده لافعال تعبر عن شعورو ده زي الاهتمام والتقدير وووو الخ …ببطئ ..حتلقى نفسك ارتحت للشخص ده ..بدون مايكون قال لي اي شي …
شفتو كيفن 🙂

بنفس الطريقه الحلقه دي تضمنت رسائل سلبيه مشفره كتيره اريد بها التقليل من شان السودانيين اجتماعيا وكسر شوكتهم (زي ماوحده من التافهات قالت حتى السودان استئوت..استقوت ) …. زي التحطيم المعنوي …

(دول ملهمش لازمه) … العباره دي اتقالت كتير قبل كده ..اشاره احنا اقل منهم
(جو هنا مره واحده بس )
قصدو السودانيين مابياكلو في المطاعم اصلا عشان مابتحملو تكلفتا …
(اتفضل مش حاحاسبك اصلا ..عشان تلحق الطياره)… العباره دي قمه الاحتقار لينا …نظام اديناك حته البيض والعصير كنوع من الصدقه اصلا انت ماحتدفع حقهم … والحق طيارتك اشاره انو وجود السودانيين في مصر غير مرغوب فيهم

اذا كانت الحلقه عن قباحه العنصريه ضد السود فعلا …
ليه تم اختيار الممثل سوداني الجنسيه ؟؟
ماكان ممكن .. كيني؟ نيجيري ؟؟مالي ؟؟
ماما افريقيا الخير فيا عامر والله ..
ولا الافارقه حلب ؟؟ والسودانيين هم الخدر براهم؟؟

شفتو الكلام الما اتقال كتير كيف !!

بقلم
Sara Hassan Abdalla