الكلام ده ما تقليل من أعمامنا ولا من علمهم لكن بالمقابل أتمنى حمدوك يستمع لناس مواكبين الحاصل في العالم

نحن في وادي وهم في وادي
استمعت قبل يومين لبروفسور شيخون عضو اللجنة الاقتصادية للحرية والتغيير ليس بصدد مناقشة أفكار الرجل لانها نفس أفكار زملانو في اللحنة ناس أ/ التجاني حســين ، ود. كبلو ممن تجاوزوا السبعين . وليس ببعيد عنهم كمال كرار ، مليانة الميديا بافكارهم للعايز يسمعها .

بكل أسف لو ألقيت نظرة على المجلس الاستشاري الاقتصادي الذي شكله حمدوك ومجلس إدارة بنك السودان ومجلس إدارة مشروع الجزيرة ، لا مجال فيه ولا راي للشباب جميعهم من حقب درست في الستينات أو السبعينات وحملت روئ اقتصادية انتهت في فيتنام وروسيا والصين وحتى العراق وسوريا .
………………
مثلاً النقطة الأساسية التي يدفع بها هؤلاء الشيوخ وتسوق ليها الصفحات المرتبطة بيهم حالياً هي تغيير العملة باعتبارها المخرج للسيولة والتزييف والمهربين والتضخم ، وهي بدون ادنى شـك تجريب المجرب لوسيلة مُسكن بالية لم يشفع لينا تغيير العملة في في 1990 وللا 1998 وللا 2005 وللا 2011 من كبح التضخم ، ولا نجح في فنزويلا 2018 ولا أخيراً في زيمبابوي عندما رجعت تطبع عملتها الوطنية قبل شهور ،
…
الناس الكبيرة دي مهما كان علمهم لكن فهمهم بعيد جداً عن الإقتصاد الرقمي ، وكيف لو تحولت لوسائل وأنظمة دفع إلكترونية ممكن تكون أقل تكلفة من قرابة 100مليون دولار الأنت محتاجها عشان تغيير العملة ، بل وممكن تحقق زيادة في معدلات الأستهلاك وتوسيع للمظلة الضريبية .. ياخي وسيلة الدفع الإلكترونية أم بيسـا في شرق أفريقيا نقلت مئات الآلف من الأسر من الفقر وخلقت استقلالية كبيرة في أدارة الثروة للشرائح الضعيفة وقللت الجريمة .

وكيف نوسع مواعين وسيرفرات هيئة الإتصالات؟ وكيف نأمنها من الأختراقات ؟ ،بحيث نبني شبكة بنوك رقمية محترمة وكيف ممكن تعمل داتا بيز على خريطة تفاعلية للسودان تسهل متابعات الزراعة والإنتاج وتخليك تبني خططك للصادر ، وتتابع الإخفاقات بسهولة .. أو حتى لمتابعات الصحة والثروة الحيوانية وغيرها ..
..
الكلام ده ما تقليل من أعمامنا ديل ولا من علمهم لكن كنت بالمقابل برضو أتمنى حمدوك يستمع لناس مواكبين الحاصل في العالم زي مثلا شباب Sudan NextGen أو زي أحمد خانجي في مجال التخطيط الاستراتيجي وفاروق كمبريسي بتاع بنك السودان في المصرفية الرقمية وكنان في البرمجيات وعمر سودان في حوسبة و بناء الشبكات وغيرهم من مئات بل آلاف الشباب الـ Update داخل وخارج السودان ،
على الأقل ياخي جيلهم هو الصنع الثورة وأولى أفكارهم هي التكون موجودة

هادي ود البورت