نشر الممثل مأمون عبد العزيز, شقيق الفنان الراحل محمود عبد العزيز, تدوينة مؤثرة عبر حسابه على موقع التواصل الاجتماعي فيسبوك.
وبحسب رصد ومتابعة محرر موقع النيلين, فقد قدم مأمون, من خلال تدوينته التهنئة لإبنة أخيه “حنين”, التي تستعد لإكمال مراسم زفافها من الفنان مأمون سوار الدهب.
وكتب الممثل, في تدوينته التي أرفق معها صور للعروس مع والدها وهي واقفة معه في إحدى حفلاته الغنائية عندما كانت طفلة:
بعد يومين بس…
تلبس بنت أخوي فستان الفرح ،
والبيت يمتلئ زغاريد وضحكة
لكن القلب… القلب ما كامل .
نفرح ليك من جوة الروح ، حنين, نفرح لأنك كبرتي وبقيتي عروس ،
ولأن الحياة فتحت ليك باب جديد مليان أمل ومحبة ،
لكن في نفس اللحظة بنفتقد أبوك ،
محمود عبد العزيز… الغايب الحاضر ،
الكان يحلم باليوم ده ،
الكان بجهز ليهو بدري ،
الكان بفرح بفرح الناس أكتر من فرحو بنفسو .
يا محمود ، اليوم ده كان حقك تكون واقف ،
تدمع وتضحك في نفس اللحظة ،
تسلم على الناس واحد واحد ،
وتقول : دي بتي… دي فخر عمري .
لكن ربنا اختار ليك مكان أنقى ،
واختار لينا الشوق والذكرى الطيبة .
حنين ، أبوك ما غايب…
أبوك ساكن في الدعوات البتطلع ليك من قلبنا ،
في كل زغرودة ،
في كل دمعة فرح نازلة من عين أمك ،
وفي كل لحظة بنقول فيها :
ربنا يعوضك ، وربنا يجبر خاطرك .
نفرح ليك ونبكي شوقاً ليهو ،
نضحك والحنين ماسك في قلوبنا ،
لكن واثقين إنو روح محمود حاضرة ،
راضية، ومبتسمة ،
وفخورة بيك وإنتِ داخلة على حياة جديدة ،
ربنا يتمم ليك على خير ،
ويجعل أيامك الجاية كلها ستر ومحبة وراحة بال ،
ويجعل فرحتك دي نور في ميزان حسنات أبوك ،
ويربط على قلوبنا جميعاً .
الفرح جا…
والذكرى حاضرة…
ومحمود عبد العزيز باقي فينا ما غاب .
وربنا يخلي ليك والدتك ويديها الصحه والعافية.
محمد عثمان _ النيلين
مقالات ذات صلة
-
-
-
-
-
-
-
-
