*خلوا بالكم كويس
*قبل سنوات كانت تطلع علينا اخبار محدده
*تطلع دائما قبل مباراة الهلال في اي ولاية من الولايات
*مثلا قبل مباراة الهلال ضد حي العرب
*تطالعنا الاخبار بان الهلال اتفق مع لاعب العرب فلان للانتقال في التكميلية او الرئيسية
*وان النادي بارك ووافق
*السفره البعدها مدينه تانيه
*طوالي تطلع الاخبار بان اللاعب فلان الذي يلعب للفريق الفلاني ضد الهلال بعد كم يوم
*وافق علي الانتقال للهلال وناديه يبارك
*الوكت داك احترنا
*كيف فريق منافس ليك ومباراته معاك اوشكت وانت تفاوض لاعبيه وناديه كمان يبارك
*كانت فيها ريحه
*حركات ما مريحه
*السنه دي غيرو المكنه
*بقت الحكاية غيابات مؤثره في الفرق المنافسه للهلال
*الغيابات دي فجأة كده
*وبتتواكب مع كورة الهلال بس
*قبلها وبعدها الغيابات المؤثره دي بتكون مافي
*ايها الناس
*والهلال ماشي كادوقلي سمعنا بتصريحات جهاز كادوقلي الفني بتأثرهم الشديد بغيابات مفاجئه
*وشفنا تشكيلة مدافعها بدخل قون في روحو
*وشفنا في المرمي غيابات غريبة
*وجات كورة كوستي
*وبرضو طلعت تصريحات الغيابات المؤثره
*والكورتين فاز الهلال وهو يقدم اسوأ العروض
*حتي الجماهير احتارت
*كورة شندي قربت
*وطالعنا تصريح النقر وحديثه عن الغيابات المؤثره
*بالله
*مؤثره بالما ؟؟؟
*يمكن غيابات بالاورنيك
اورنيك مرضي يا عمك
*ايها الناس
*الحركات الما مريحه بكون فيها ريحه
*والحكايه بتبقي فضيحه
*ومكنة يفاوض لاعب فلان كانت اخير من الغيابات المفاجئه دي
*وفرق زي دي حقو مبارياتها ضد الهلال ما تلعبها
*يدوا الهلال السته نقاط من سكات
*ويريحوا الجماهير من الغيابات المفاجئه دي
*شخصيا ما كنت اتوقع من النقر غير تصريح مثل الذي صرح به
*لكن بعد مرات تتدخل ارادة المولي لتغير ارادات كتيره
*زي كورة شندي ضد الهلال
*الكورة الفاز فيها اهلي شندي بعد انكسرت رجل زولهم وهاجت الجماهير
*غاب افضل طرف يمين عن شندي وهم مهزومين
*وكان لغيابه الاثر الكبير
*وتعادل الشنداويه وفازوا
*بالله عليكم
*مدرب فريق يتحدث قبل المباراه عن تأثر فريقه بالغيابات
*مدرب زي ده موش محبط وبدخل روح الانهزام في قلوب لاعبيه
*حتي ولو كان هناك اصرار من لاعبيه علي الفوز
*حكايات غريبه ومخجله
*اخاف يجي يوم ناس زي البصرحو ديل ما يجوا كورتهم ضد الهلال يقولوا ما سمعنا
*ويمكن يقولوا جيراننا عندهم بكا
*وممكن نشوفهم في مسيرات فرح الهلال مشاركين
*ايها الناس
*في احزاب بتزرع ناسها في احزاب تانيه لاغراض تخدم الحزب
*وتجد المزروعين وصلوا مناصب عليا في الاحزاب المزروعين فيها
*متين نحنا ناكل مما نزرع في بلد زراعي
*مليان زراعه
*زراعة الكلي زاتها اتخصصنا فيها
*زراعة الناس ساهله طالما الزراعه معترف بها وتعتبر احد اسلحة التنافس
*ولكن هل نسميه تنافس شريف ؟؟
*شريف بالفا ؟؟؟؟؟
*ايها الناس
*مليار سيدا ماشي صاح
*وهناك اجتماع تنسيقي لاعلان ضربة البداية
*لن نعاني من غيابات مؤثرة عند اعلان ضربة البداية
*لان الشفوت لايعرفون الغياب
*غيابات مخيفة
*هذا هو الاسم الانسب
*ايها الناس
*ننادي وننادي وننادي
*الاشبال والرديف
*وامنياتنا بمشاهدتهم ضمن كوكبة اللعب بالممتاز
*ميسي الاشبال وحسين ومصطفي المناقل وحسن ونمر ويوحنا وغيرهم كثر
*اذا اعتمدنا عليهم
*صدقوني ما بتأثر فينا الغيابات المخجله
*اقصد الغيابات المؤثره
*ممكن يوم اهلي شندي يغيب عن مباراة الهلال بالطريقه دي
*ويقولوا الناس لما يجوا يبرروا ماجينا عشان مالقينا مواصلات
*كل شئ جائز
*حكم يخطئ اتجاه واحد ولا يظلم
*فريق يعاني من غيابات مؤثره قبل كورة معينه ولا يتواطأ
*كل شئ جائز
*اها
*نجي لي شمارات والي الخرتوم
*اول امس يا والينا
*كتبت ليك عن الشماسه والسكاكين والخوف الفينا
*وقلت ليك نخاف يجي يوم نص السوق يعملوها فينا
*وتجيب خبرنا الدار مع نعي كبير لينا
*تصدق يا والينا
*في نفس اليوم في الدار قرينا
*شماسي يقتل فتاة بسوق امدرمان يا والينا
*ولا حياة للفتاة ولا حياة لمن ننادي يا والينا
*بالطريقه دي زول ما بفضل فينا
*وبتحتاجوا لينا
*ما تشوفونا كده تقولوا ما بتحتاجوا لينا
*بتحتاجوا لينا يا والينا
*استنفار بجي ونداكم بجينا
*ما بنجيكم حينها يا والينا
*لانو بكون شماسي عملها فينا
*واتدفنا في المقابر اتاوينا
*تحلوها لينا
*ولا نطعنهم قبل يختوها لينا
*ولا ننطعن ليهم من سكات يا والينا
*كل زول فينا يشيل سكينه ؟؟؟
*كان طعناهم القانون البحميهم ما بحمينا
*يقبضونا ويحاكمونا وفي السجون يرمونا
*وكان طعنونا مافي قانون بحمينا
*يطعننا الشماسي بي جاي ويزوغ بي جاي يا والينا
*لا الدوله عارفاهو هو منو ولا هو داير يعرف الدوله يا والينا
*يبقي القانون البحمي البخنها لينا يا والينا وما بحمينا ما برضينا [B]سلك كهربا[/B] ننساك كيف وممكن شماسي يضيع مستقبل اسره بي سكينه في قلب رب الاسره نهارا جهارا
والي لقاء
سلك
[/SIZE]
في السلك – بابكر سلك
