> بعضه يدور والامل يشع بين كلماته
> والبعض الآخر يدور ساخراً من ومضات الامل الاولى
> لاعب يوقع بالسيستم لناد يتبع لدولة اخرى
> ليست دولة اللاعب
> ودولة اللاعب تستخرج جوازاً آخر للاعب بعمر مختلف بل وباسم يختلف عن اسمه الحقيقي
> وتشركه في منافسات دولية بذلك الجواز الجديد
> مازيمبي عرفناهو
> ما ذنب فيتا في الموضوع ده؟
> وهل فيتا له سلطة على جوازات رواندا ؟؟؟؟
> وهل فيتا استفاد من تغيير اسم اللاعب وعمره ؟؟؟
> زوبعة في غطاية فتيل دوا قحة
> زوبعة فارغة سااااي
> والزوابع الرعدية الفي السما دي
> لا تعني هطول الامطار دائماً
> ممكن تفرقع بو ورو
> وتعمل ليها فلاشات كده
> لكن ولا نقطة
> ولا حتة
> ولا مطرة تنزل على صحراء يابسة برغم الرعد وزمجرته
> ومجالس المدينة تؤكد مغادرة فيتا للمنافسة
> ومجالس المدينة الأخرى تضحك بصوت عال وتسخر من الذي يحدث
> والعقلاء من الاهلة الشرفاء يتمنونها فيتاوية
> حتى ولو كان فريقهم على حق
> لان شكل الفريق بين نتائج اي مشاركة في المرحلة القادمة
> والباب البجيب الستات وغنا البنات
> اخير يتقفل
> عشان الجمهور الهلالي الوفي لا يتحمل اي ستة في اي حتة
> كفاهو ستات
> المهم
> اليوم وباستاد المريخ
> بالقلعة الحمراء
> يتم تكريم السفير عبدالمحمود
> الرجل الذي قدم سراً مبتعداً عن العلانية
> لان العشق عنده مقدس
> واي كلام جاوز الاثنين شائع
> ولكن نسمات ما قدمه الرجل لمريخه
> اتت بالخبر والاخبار المفرحة
> لذا
> يكرمه ناديه اليوم
> ويقف على قمة من يقومون بالتكريم السيد رئيس النادي بنفسه
> فالرجل يعرف قدر الرجل جيداً
> والحفلة رابه
> يحيها الاستاذ محمد الامين
> الموسيقار المريخي المبدع
> وهل تجد ابداعاً لا ينتمي للمريخ في البلد دي؟
> المهم
> الدعوة عامة
> لكل الجماهير الحمراء
> وحتى الجماهير الملونة حبابها
> فنحن نحتفل برجل قدم لناديه وقدم للرياضة في البلد
> بل وقدم للدبلوماسية السودانية وجهاً مشرقاً في جميع انحاء العالم
> يبقى كلنا حضوراً من بدري
> نشارك الرجل تكريمه وتقييمه
> والشكر مقدم للاخ هاشم الزبير
> دينمو الاحتفال المحرك
> والشكر لكل من شارك في الاعداد
> يبقى نجي كلنا
> تعال وجيب معاك الباقين
> المهم
> ننتظر نتيجة شكوى كبسور الجديدة بفارق الصبر
> برغم اننا نعرف النتيجة مقدماً
> ولكن نحترم الجهات التي تصدر القرار
> ولا نصدر الاحكام قبل اصدارها لحكمها بشطب الدعوى
> عريضة ما فيها سبب للتقاضي
> ليه زاحمين بيها القاضي !
> أيها الناس
> المطلوب كتير برفع قضية فالصو في اي زول
> عشان يقول للدائنين بتاعنو عندي قضية اكسبها واسدد ليكم
> وكده ما بسدد
> لانو قضيتو هو عارف انها خسرانة
> الافضل ليهو
> يشهر افلاسو
> ويتخلص بالافلاس عن الدائنين
> الدائنون بتاعين كبسور
> هم الجمهور الوفي الغاشنوا بالقضية الجديدة
> أشهروا إفلاسكم
> فالدائنون يعلمون ان الرصيد صفر
> أيها الناس
> الرابطة كوستي تعيش افضل ايامها
> وهي مؤهلة للفوز على الجماعة من واقع حال الفريقين
> فهل تعي ادارة الرابطة كوستي ذلك ؟؟؟
> وهل تدري ادارة الرابطة كوستي ان جمهور الرابطة كوستي
> ينتمي للرابطة كوستي أولاً
> ثم ينتمي لغيره ثانياً
> يعني تخصص انجليزي لكن بكون شايل لغة تانية
> ويهمه بالطبع الانجليزي الشايلو اساسي
> ولا يمكن ان يهتم باللغة الثانوية ليهدر اللغة الاساسية
> أيها الناس
> إن تنصروا الله ينصركم
> أها
> نجي لي شمارات والي الخرتوم
> كان شفت يا والينا
> القعونج غني بالبروتين قالوا لينا
> الضبان الحايم فينا
> دحين فايتمين ما بدينا ؟؟؟
> والباعوض البقرص فينا
> باقي ليك كالسيوم ما بدينا ؟؟
> والجندب الديمة ناطي علينا
> هيموقلوبين ما برفع لينا ؟؟
> وام سيسي الجارية في الصحن بي كرعينا
> تطعيم دحين ما بتبقى لينا
> والجقر البقى اسمن من طفلاً لينا
> دحين في الضحية ما بضحي لينا
> والمسؤول البغشغش فينا
> باقي ليك ما عصر علينا يا والينا؟
سلك كهربا
ننساك كيف والبلد بقت ناشونال جوغرافيك عديل كده
والللللللللللللى لقاء
سلللللللللللللللللللك
[/SIZE]
في السلك – بابكر سلك
صحيفة الإنتباهة
