> قنبلة سماحة الزول في الطول والعلا
> يحدثنا الاخوة الاهلة سنويا عن قنبلة
> وتطلع قنبلتهم فشنك
> فشنك وكاتم صوت
> زي اتوبونج
> بندقية كتال الكلاب الزمان داك اخير منها
> كتال الكلاب مرة يصيب ومرة يخيب
> لكن قنبلة الاهلة طوااااالي فشنك
> قالوا كردنة مشي لندن لتفجير القنبلة من هناك
> ياربي يكون دساها ليكم وشتت
> داير يتخلص من الورطة دي ؟؟؟
> غايتو يا فطومة يا اختي
> لو سمعتوا تك تك تك
> كناطق رسمي انطقي لتحمي اخوتنا الاهلة
> قولي ليهم اجرووووووووووا
> القنبلة
> وقومي جارية
> زول اجتماعات الواتس ده
> من لندن ممكن يفجر ليكم القنبلة بالفايبر
> كان لقى القنبلة اون لاين
> بعمل ليها مكالمة بالاسكايب
> غايتو لو سمعنا روووووووو
> بنعرف قنبلة كردنة ضربت
> ايها الناس
> حفاظاً على انسان هذا البلد
> نرجو الاسراع في تكوين لجنة قومية طبية
> تقعد في الحدود
> اختصاصها الكشف على اللاعبين البلقطهم كردنة ديل
> الزول ده بلقط ساي
> لقيط الجداد بس
> اللجنة تختص بفحوصات معينة
> كشف ايبولا وكبد وسعر
> لو جبتوا ليكم زول سعران
> الممتاز ده كلو بسعر
> والسعر فترة حضانتو ممكن تستمر ستة اشهر
> يعني الدورة الاولى كلها
> الدورة التانية الا نلعبها في البطري
> الممتاز كلو حا ينبح
> هو …هو …هو ….هو
> والجماهير تنبح
> والاتحاد العام يعضي
> وجرايدنا دي الا نبيعها في البطري
> وعشان ما يحصل ده كلو
> فجر يا كردنة قنبلتك تقتل السعر في مهده
> المهم
> فطومة اختي
> عشان مقتنعة بانو القنبلة فشنك
> شايفها عملت ليها بندقية طير
> اظنها دايرة بدل تشطب الحمام تكتلو
> بندقية فطومة اصدق انباء من قنبلة كردنة
> ايها الناس
> وجود عمر بخيت ضمن المنظومة في الوقت الراهن هدف استراتيجي
> والقرار الفني بيد الفنيين
> وقرار الفنيين ملزم للادارة
> هكذا هي المؤسسية والعلمية
> المهم
> برغم ان الوقت غير مناسب للتهاتر بين الادارة وانصارها والمعارضة وانصارها
> الا ان الاسلوب أيضاً غير مناسب في اي مكان واي زمان
> فرموز المريخ وادارييه السابقين والحاليين
> خطوط حمراء تستوجب الاحترام
> وتستوجب التأدب في الحوار معها ولو اختلف المحاور معها في الراي
> فادب المريخ علمنا ان كبارنا منارات تضيء دروبنا
> وان احترامهم من واجبنا
> لذلك يمكن لاي جهة ان تنتقد الاخرى
> لكن في حدود الادب والتأدب
> لان الامر نقد لا اساءة
> فنحن صفوة ينبغي ان نكون قدوة
> ونحن شفوت حينما تكون الشفتنة هي الانسب
> ولكن لا نتشفتن على بعضنا
> كي لا نضعف عشقنا
> يا اقطاب المريخ وادارييه الحاليين والسابقين
> احتراماتي لكم جميعاً
> ايها الناس
> إن تنصروا الله ينصركم
> اها
> نجي لي شمارات والي الخرتوم
> يا والينا
> كراكه ولا الاميرة ديانا قول لينا
> معقولة كراكه في شارع الجمهورية تصوروها لينا
> وكلكم جايين باربعين كروزر وتمنين سارينا
> شي طبيعي يتنضف شارع ويتنور درب يا والينا
> لكن الما طبيعي ان يهمل الشارع يا والينا
> ويوم تقشوهوا تتلملموا وتتصوروا لينا
سلك كهربا
ننساك كيف ولو قشوا الشارع يقشروا علينا
والللللللللللللى لقاء
سلللللللللللللللللللك
في السلك – بابكر سلك
صحيفة الإنتباهة
مقالات ذات صلة
