أديني خاطرك

[SIZE=5][JUSTIFY][CENTER][B] أديني خاطرك [/B][/CENTER]

أديني خاطرك والسلام.. ما لي معاك أبداً كلام

أنا كنت شايلاك للظروف.. ووهبتك الحب والغرام

كم بي وراك شفت العذاب.. وكم مره جافاني المنام

وبقول عليك إنت الفريد.. والبينا أحلام واحترام

لكن مع الأسف الشديد.. ما كنت قدر الالتزام

فارقت درب المتقين.. باريت براك درب الحرام

*****

علمتك الحب الحلال.. وريتك الود والوفا

لوّنت ليك الأمنيات.. خليتا خضرا ووارفة

ورسمت ليك عش السرور.. في صورة زاهية ومترّفة

والليلة تظلمني وتجور.. على ريده صادقة ومنصِفة

أنا ما بقول إنت القسيت.. ولاّ النِّسيت زمن الصفا

لكن براي خليت هواي.. صدّق عيونك ووالفا

ما كنت قايلك يوم تخون.. وكل المواعيد تخلفا

أديني خاطرك والسلام.. أديني خاطرك بس كفى

****

سكتنا صبحت سكتين.. ما أظن نعود يوم ننسجم

أديني خاطرك والسلام.. أديني خاطرك وإبتسم

مبروك عليك دنيا الجحود.. على قدر ما جواي ألم

كمّلت فيك كل الكلام.. والليلة جد كِمل العشم

ما داير اتوسد أساي.. ولا أستبيح دمع الندم

ولا داير أحكي لكل زول.. عن ريد كبير فجأة انهزم

واملا المساحات بالحنين.. واملا البراحات بالسأم

أنا داير أعيش واقع وفاي.. ما داير أكون باريت وهم

أديني خاطرك ويللا فوت.. أنسى الدلالات والقيم

ما داير أشوفك من جديد.. ولا حتى أحلم بيك حلم

# تلويح:

تديني خاطرك لي شنو.. الزيي كان رادك منو؟

[/SIZE][/JUSTIFY]

إندياح – صحيفة اليوم التالي