عندما قال وزير الدفاع لاسامة عبدالله : إنتو طوابير ولاّ شنو رجعوا لينا الكهربة دي هسي!!

2013/06/26

يقال والعهدة على الراوي إنو الرئيس البشير مرة أدى وزير الكهربة والسدود أسامة عبد الله توجيهات بإنو يقطع الكهربة من أي مؤسسة حكومية أو أي وزارة ما تدفع الفاتورة، وقالو قال ليهو لو القصر الجمهوري ما دفع طوالي تقطع منو الكهربة ما تجامل أي جهة… قال ليك وزارة الدفاع مرة كدى ما دفعت، وقامو طالبوها، وطالبوها لمن فترو منها، قام طوالي أسامة عبد الله ما كضّب، قطع منهم الكهربة… عمنا عبد الرحيم جا خاشي ليك القيادة لقى ليك المولدات تقول وا غُربتي، اندهش لي مصدر الإزعاج افتكر الكهربة دي انضربت ولاّ حاجة زي دي… سأل الناس في الوزارة الحاصل شنو يا جماعة… قالو ليهو: دا أسامة قطع مننا الكهربة… عم عبد الرحيم استشاط غضبًا وما كضّب ركب عربيتو طوالي مشى لي أسامة… قيل وقتها إن أسامة عبد الله كان في اجتماع.. فاقتحم وزير الدفاع قلعة الكهربة وأطلق سراح الأسيرة «كهربة القيادة» قبل أن يقول مازحًا لأسامة: إنتو طوابير ولاّ شنو رجعوا لينا الكهربة دي هسي… ضحك أسامة من المزحة وقال لصاحبو: والله إنت عارف ياسعاتك دي توجيهات الرئيس…. الرئيس؟! بأبي وأمي أنت يارئيس الجمهورية… دفع وزير الدفاع الفاتورة عدًا نقدًا، ورجعو ليهو كهربتو بعد الدفع… أبو الزفت شفافية ولاّ ما شفافية..

صحيفة الانتباهة

مواضيع مهمة

ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان

هل تعقيم اليدين مفيد؟ الكركم والالتهابات أفضل زيوت ترطيب البشرة