طبعاً ناهيكم عن الحنة للكوع لطفلة عمرها 5 سنوات والميك اب .. ومش كدا والله الحنانة بتجى تقعد فى الروضة تحننهم بالدور .. حق الحنة ما خاشى فى رسوم التخريج ..!!
الأغرب كل روضه بتتفق مع راقص .. بالجد راقص عديل وممكن يكون راقص (ما شادى حيله) .. يعلمهم رقصات غريبة وغربية وهز نص وكدا …!!
الأطفال لسه أبرياء جداًً .. يعنى لسه ما وصلو الأساس .. بعدين بالمناسبة فى منهج من التعليم قبل الأساسي مفترض يلتزموا بيه .. بس منو البتابع ..ومنو الجايب خبر اساساً لجيل من يبدأ ببدأ غلط .
المسالة دى خلاف بين طرفين .. الإدارات بتقول الاهل بصروا .. وبرضو هم بصروا عشان المنافسة وكسب السوق والزبائن .. وفعلاً بخافوا لو ما عمل تخريج ما يجوهوا السنة الجديدة زبائن .. لذا القرار فى إدارة التعليم بحسم هذه الفوضى .
هذا غير تعب الأمهات والجيران والخيلان والأعمام وضياع زمن ..وطبعاً ما بتقدر ما تجى بزعلوا منك .
الصورة أدناه لتخريج أطفال روضة .. فى مدينة بابنوسة .. حقيقة أحضرتها للتدليل فقط .. فتخيلوا ما تفعله روضه فى العمارات أو الطائف أو مدينة النيل والصافية ..!! والتكلفة المادية والزمنية.
بقلم: صالح عبد الرحمن صالح