كوش نيوز .. أخبار السودان بين يديك

عشرين كريستالة يا مفترين



شارك الموضوع :

عشرين كريستالة يا مفترين


* محاولة جر جماهير الحصاحيصا لخلق جفوة بينها وبين المريخ كانت
بايخة.
* فالحصاحيصا معقل الأحمر الوهاج.
* ويكفى ان مريخها عندما كان بالممتاز جندل ناس كتاااااااااار يختلفون معه فى الشعار.
* وده كان سبب توقيع بهاءالدين التنين للمريخ.
* فى ذلك اليوم كان التنين قادماً من المدرسة.
* نادوهوا من الشارع ولبسوهوا.
* ونزل الميدان.
* وأتغلب الهلال وتألق أبن المدرسة.
* الحصاحيصا بيوت مؤصلة.
* مريخية بفطرتها ألا القليل.
* والهداية جاياهم.
* لذلك حكاية خلق مشكلة بين المريخ والحصاحيصا دى ما ناجحة.
* وقصة فى اى مدينة ولائية ينبرى البعض ليسئ لأكرم دى برضو ظااااهرة.
* وديل طبعاً لا نيلاب حصاحيصاب.
* ولا املاب عطبراب.
* ولا اهليلاب منياب.
* ولا هلالاب بورتسوداناب.
* ديل ناس معروفين بالحقد الدفين على الزعيم.
* ولذا يفترض فيهم ان يتحملوا ردة الفعل تجاه افعالهم السخيفة.
* ومن يطالب أكرم بضبط النفس تجاه تلك التصرفات.
* عليه ان يطالب البشر ديك بالأدب وحسن التربية.
* ولا.
* يستحملوا ما يجنوهوا بألسنتهم.
* أما فبركة قصة تلك القوارير.
* فكان عليهم ان يحيكوا القصة كويس.
* عشرون قارورة.
* واحدات مليانة توف.
* وواحدات مليانة نص.
* والغريبة كلهن لون السائل بداخلهن وااااااااحد.
* والحكاية دى زى البصمة.
* ما بتتفق.
* مفروض كلو زول يكون كرستالتو لون مختلف عن التانى.
* يكون زيت يا ربى.
* يمكن شامبيون.
* أسى لو دايرين نثبت الواقعة.
* وودينا العشرين كريستالة للفحص.
* ديل غايتو الا الفحص الآلى.
* فحيص عادى ما بيقدر.
* عشرين كريستالة يا مفترين؟؟؟؟
* الناس ديل حقدهم بقودهم لى حاجات اكبر من كدة.
* عشرين كرستالة.
* وناسنا عشرين لاعب.
* يعنى فى زول بصدق هيثم مصطفى سيدا الوقور المتدين الذى يصلى الأوقات حاضر فى المسجد.
* ويقيم الليل ويصوم الأثنين والخميس.
* فى زول بالمواصفات دى ببطل الوضوء وبعمل عملة زى دى؟؟؟
* كان تنقصوهم قارورة.
* فاتت عليكم.
* الحمدلله بقت على الكرستالات.
* الكورة الجاية احتمال يجيبوا لينا صور حاجات أكبر من الكرستالات.
* لكن يبقى اكرم قادراً على حماية نفسه.
* وعلى الدفاع عن نفسه.
* وعلى ادهاش الجميع.
* أكرم قوى وشجاع.
* والقوى لما يكون شجاع ما تهبشوا أخير ليك.
* أيها الناس.
* تبقت للقطر محطتان صغيرتان لينهى السفر.
* بس يجب ان لا يستهتر القطر بتلك المحطات.
* يديها اعتبارها ليجتازها ويتجاوزها بنفس القدرة والقوة التى تجاوز بها المحطات السابقة.
* وكم من قطار انقلب من أصغر المحطات فى نهايات السفر.
* القضبان برضو عندها مؤامرات.
* أيها الناس.
* أصر على تحية محمدموسى.
* تحية مدوية.
* تعلن الصرخة الأولى لبدء الأحتفالية.
* وصفقة خاصة لكروجر.
* ويستحقها الخواجة.
* وبى برمودتك يا كروجر قشة ما تعتر ليك.
* أيها الناس.
* أجمل حاجة فى الممتاز انو جبناهو برغم الأخطاء التى لا تظلم.
* وبرغم المؤامرات.
* مؤامرات وكرستالات.
* برغم حجارة عطبرة.
* وبرغم تفلتات البعض بمدنى العريقة.
* برغم الشغل التحت تحت.
* برغم كل ذلك.
* الممتاز مريخى.
* أذا فى زول قال ليك الممتاز هلالى.
* قول ليهو يلالى يلالى يلالى بهجة ومسرة.
* أها.
* نجى لى شمارات والى الخرتوم.
* أكان شفت يا والينا.
* داير أسألك.
* سمعت بالغنى الفاحش والفقر المدقع؟؟؟؟؟
* الغنى الفاحش والفقر المدقع زى بعض يا والينا.
* مافى بينهم فرق اصلو.
* لأنهم الأتنين بقودوا الأنسان الى تجاوز الخطوط الحمراء.

سلك كهربا

*ننساك كيف والشفق الأحمر يغطينا جميعاً.
واللللللللللللللللللى لقاء
سللللللللللللللللللللللك

في السلك – بابكر سلك

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.