زواج سوداناس

الكورة عند (سيدي بيه) في 6 ومخرج النيلين بيجيب (والي) كسلا في المقصورة


شارك الموضوع :

(عماري) فلفل ليك الجماعة زي خمسين الحريق ..اي كرت طار في بلد..على جعفر في حتة – وامير كمال في حتة
اتخيلت والي ولاية كسلا – يقوم جاري وقت سيدي بيه جاب الهدف الثالث عشان الناس يباركوا ليه
المباراة كلها كانت نقل مباشر لوالي ولاية كسلا..لدرجة اني كنت اتخيل ان يقوم هيثم كمال بتحليل (عمة) والي ولاية كسلا
الطريفي لو حسب ضربات الجزاء التى كانت في مباراة شندي .. كان المريخ نزل من الدوري الممتاز

مباراة الهلال والميرغني امس كانت تمثل النقل التلفزيوني عندما يكون (كوميدياً).
عندما يكون (مضحكا).
الضحك شرط (الشبكة).
نطلع فاصل ونعود.
لكن عماري ما بالغ.
بغض النظر عن هدف عماري.
هدف عماري انا ما شغال بيه كتير – وما عندي معاه قضية.
اعتبروني ما قلت حاجة.
نرجع الى استديوهاتنا الرئيسية.
الغاز كيف؟.
كنت اتخيل في ظل هذا النقل الدرامي ان اشاهد (محمد مهدي الفادني) ليقدم لنا فاصلا (مسرحيا) اثناء سير المباراة فقد فعل مخرج المباراة كل شيء (عبثي) في المباراة.
ما فاضل ليه إلا يقطع ليه (سلطة).
كانت عندما تكون الكورة هجمة خطيرة للهلال ..وسيدي بيه يتوغل بيها في خط 6 كان السيد مخرج المباراة بنقل لينا صورة والي ولاية كسلا محمد يوسف آدم وهو لابس الجلابية والعمة والسديرية.
ومرات كدا بجيب لينا صورة الجبل.
يعني الود بتجدع في الصور الطبيعية.
الصور الطبيعية ووالي ولاية كسلا.
نطلع فاصل ونعود.
لكن عماري ما بالغ.
بغض النظر عن هدف عماري.
هدف عماري انا ما شغال بيه كتير – وما عندي معاه قضية.
اعتبروني ما قلت حاجة.
نرجع الى استديوهاتنا الرئيسية..(مباراة كسلا).
وكان عندما ينفرد (كيبي) بالمرمي – كان السيد مخرج المباراة الذي يبدو انه ما عنده علاقة بالكورة – كان المخرج بيجيب لينا (معتمد) كسلا.
الزول دا مخلوع بالناس القاعدة في المقصورة.
والي كسلا نحن نعمل بيه شنو؟.
المباراة كلها كانت نقل مباشر لي والي ولاية كسلا.
لدرجة اني كنت اتخيل ان يقوم هيثم كمال بتحليل (عمة) والي ولاية كسلا – نحن الكورة ما شفنا منها حاجة.
نطلع فاصل ونعود.
نشوف (عماري) فلفل ليك الجماعة زي خمسين الحريق ..اي كرت طار في بلد.
علي جعفر يجلي في الكورة تقول واقف ليه في فرن.
وبغض النظر عن هدف عماري.
نرجع الى استديوهاتنا الرئيسية.
الكورة تكون عند بشه وهو داخل في الصندوق – السيد مخرج مباراة قناة النيلين بجيب لينا في وزير مالية ولاية كسلا.
نحن ناقصين.
نحن وزير مالية كسلا نعمل بيه شنو؟.
يا ربي يكون نازل في ياتو دائرة جغرافية في الانتخابات؟.
بغض النظر عن هدف عماري.
الناس الرمزها (الشجرة) ظاهر عليهم.
حاسمين المواضيع.
عاوزين تجيبوا الناس ديل جيبوهم في مباراة المريخ.
نحن جيبوا لينا ناس بشه ونزار ونيلسون.
نطلع فاصل شندي ونجي راجعين.
غارزيتو المباراة كلها يفتش في باسكال.
بغض النظر عن هدف عماري.
نرجع الى استديوهاتنا الرئيسية.
عبدالماجد امس كان حايم تحت التلفزيون وقت (سيدي بيه) جاب الهدف الثالث للهلال قلت ليه الجاب الهدف منو؟.
قال لي والي ولاية كسلا محمد يوسف آدم.
بغض النظر عن هدف عماري.
اتخيلت والي ولاية كسلا – يقوم جاري وقت سيدي بيه جاب الهدف الثالث عشان الناس يباركوا ليه.
واتخيلتو (يسجد) زي ناس ابوتريكة وقت يسجلوا اهداف.
والي ولاية كسلا ما فاضل ليه حاجة غير (السجدة).
90 دقيقة الكورة عند سيدي بيه ..والكاميرا عند والي ولاية كسلا.
المباراة كانت زي نشرة الاخبار.
مباراة كلها وزراء.
بغض النظر عن هدف عماري.
الكورة عند مساوي وهو بطلع هجمة خطيرة لفريق الميرغني الكسلاوي ومخرج المباراة بجيب لينا في وزير الصحة في ولاية ولاية كسلا.
وزير الصحة نحن نعمل بيه شنو؟.
المباراة زي (الحملة الانتخابية) للمؤتمر الوطني.
المباراة كلها بيعرضوا لينا في قيادات المؤتمر الوطني في الولاية.
يا جماعة انتوا عاوزين تستقلوا نجومية سيدي بيه وكيبي وتعرضوا لينا صوركم.
بغض النظر عن هدف عماري.
عاوزين تظهروا في التلفزيون.
غايتو مباراة الامس اكدت لينا… وورتنا حاجة.
ورتنا ليه ناس الحكومة دفعوا قروش التلفزة؟.
اتاريهم عندهم فهم.
الجماعة ديل دفعوا قروش تلفزة مباريات الدوري الممتاز ..عشان التلفزة نقل مباشر لي سيادتهم.
استعراض لي وجودكم.
بغض النظر عن هدف عماري.
يا جماعة انتوا بدل ما تكونوا قاعدين لينا في المقصورة ..وبتستعرضوا لينا في (صوركم) – عممكم وجلاليبكم ..قوموا شوفوا شغلتكم.
شوفوا البلد حاصل فيها شنو؟.
نطلع فاصل.
الطريفي لو حسب ضربات الجزاء التى كانت في مباراة شندي ..المريخ كان نزل من الدوري الممتاز.
بغض النظر عن هدف عماري.
نعود الى استديوهاتنا الرئيسية.
الكورة تكون عند كاريكا وهو بعمل في اي حاجة في الطرف الشمال ..وناس قناة النيلين بجيبوا لينا في صورة نائب الوالي.
نحن نائب الوالي نعمل بيه شنو؟.
المباراة كانت زي (الخطاب السياسي).
تقول في حفلة تخريج (دفاع شعبي).
الكورة تكون عند نزار حامد ..ومخرج المباراة بيجيب لينا في وزير التربية والتعليم في ولاية كسلا.
نحن وزير التربية والتعليم نعمل بيه شنو؟.
وزير التربية والتعليم لو جابو ليه (مورينهو)..بجيب ليه هدف زي الهدف الجابو سيدي بيه.
عندكم حملة انتخابية.
عندكم فهم.
عاوزين عشان الناس يعرفوكم.
اعملوا حاجاتكم دي وانقلوا صوركم بعيد من مباريات الهلال.
انتوا يا ناس السلطة ..معقولة منكم.
في مباراة المريخ ومريخ الفاشر تطلعوا الشرطة برة الملعب..وفي مباراة الهلال تجيبوا لينا حكومة ولاية كسلا في التلفزة.
بغض النظر عن هدف عماري.
نحن ذنبنا شنو؟.
ذنبنا شنو عشان نقعد نتابع في والي ولاية كسلا.
ذنبنا شنو نقعد نتابع فيه (90) دقيقة.
طيب المخرج كان في اخر عشر دقائق يستبدل والي ولاية كسلا محمد يوسف آدم.
وعبدالماجد حايم تحت التلفزيون..قلت ليه بعد نهاية المباراة ..اها يا عبدالماجد تفتكتر نجم المباراة منو؟.
عبدالماجد قال لي محمد يوسف آدم.
مفروض ناس سوداني يمنحوه (نجومية المباراة).
بغض النظر عن هدف عماري.
شفتوا يا جماعة الموضوع دا لو ما حسمتوه ..واتكلمنا فيه ..كورتنا دي بتبقى كلها (ولاة).
كفاية علينا والي المريخ.
لو فتحت ليك قوس تلقاه!!.
الموضوع دا لو ما حسمتوه ..تاني وقت الهلال يمشي يلعب في الابيض بيقوموا يجيبوا لينا أحمد هارون.
الهلال يمشي يلعب في الفاشر ..يقوموا يجيبوا لينا (كبر).
نمشي نلعب في عطبرة ..يقوموا يجيبوا لينا الهادي عبداللـه.
نلعب في شندي بجيبوا لينا (حسن الحويج).
اكيد في مباراة المريخ امس (الحويج) يكون استلم الموضوع.
تقول رجل الراية.
احسموا لينا الموضوع دا.
الجماعة ديل لو خليتهم على كيفهم المرة القادمة في المباراة بجيبوا ليكم حملة تطعيم.
وانتخبوا الشجرة.
اوعك!!.
نطلع فاصل.
امس المعز محجوب المباراة كلها بيرجف ..هدف عماري دخل في مرماه زي برنامج (اسماء في حياتنا).
توثيق صاح.
وصاحبكم قاعد يتفرج.
انت يا المعز قايل نفسك قاعد الى الان في الكنبة.
غارزيتو ذاتو ببالغ نكت ليه جماعة ..نحن نسيناهم.
الباشا ..تقول (مقاول)..الكورة فكت منو؟.
بغض النظر عن هدف عماري.
نرجع الى استديوهاتنا الرئيسية.
يا ناس النيلين تاني لو عاوزين تنقلوا لينا مباراة الهلال بالطريقة دي خلونا نرجع طبقنا.
نرجع طبقنا زي ما كان.
………
ملحوظة : المعز محجوب كمل للهلالاب جميل بكري المدينة.

هوامش

امس بين الشوطين حاول لاعبو المريخ الاعتداء على حكم المباراة.
اصحابكم فاكرين (الشرطة) مافي.
فاكرين (الشرطة) طلعت.
الهلال في كسلا عصرا قدم مباراة كبيرة.
سيدي بيه ..عندما يتألق ..يمحى كل اخفاقاته.
يعوّض عن كل ما اخفق فيه.
مدثر كاريكا كان من نجوم المباراة.
بشه يحتاج الى دعم ومساندة ووقفة من الجمهور ومن الاعلام.
فريق الميرغني فريق ما ساهل ..وبيلعب كورة كبيرة.
مكسيم دا كلموه ما يطلع من مرماه.
الزول دا بقيف برة المرمي.
والجماعة كشفوا الموضوع دا.
الميرغني تقدم ومع ذلك استطاع الهلال ان يعود ويسجل ثلاثة اهداف.
الاهلي شندي اتقدم على المريخ وفشل حتى في تعديل النتيجة.
يا شماتة (عزام) فينا.
احرجتونا ساكت.
كان ما تتلفزوا المباراة …كان المريخ انتصر.
انتوا التلفزة ما بتنفع معاكم.
فريق الامل من الآن يرتب اوضاعه.
المريخ بقى عادي يخسر جوة وبرة.
المريخ ما عندو حاجة مستحيلة.
وممكن الامل على الاقل كدا يطلع ليه بي نقطة من استاد المريخ.
ناس على جعفر ديل ..تقول سواقين.
اصعب مواجهات الهلال سوف تكون مع مريخ الفاشر في الفاشر.
من هسع راجعوا اوراقكم وعالجوا اصابتكم.
تاني ما عاوزين نفقد.
والهلال وقت يتصدر تاني ما بفك.
………….
عاجل : هيثم مصطفى الى جانب خطاب كانوا امس من نجوم المباراة ..جيهوا ليك (الشية).

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *