زواج سوداناس

رمضان عجب قطع الشريحة !!


شارك الموضوع :

انتوا تعالوا هنا يا مريخاب جايبين ليكم (محترفين) زي (السمّاكة) ما عندهم اي علاقة بي (ضربات الجزاء)
اي كورة تدق بين امير كمال وعلاء الدين يوسف (قون)..تقول حارسين ليهم (حواشة)
بكري المدينة في الهلال كان شايل (سكينو)..لكن للأمانة ما كان بيهبش ليه زول..تعال شوف هسع بدون (سكين) شغال ضرب في الحكام
الظاهر كدا ومن قرائن الاحوال (رمضان عجب) غيّر موبايلو من (ربيكا) الى (جلاكسي 5)

التوم ود جاد الرب – عندو (رأي) في الأولاد المطاميس…بعاين ليهم سبعة – سبعة.
زي سبعة (الوحدات).
هسع سبعة الوحدات الدخلها هنا شنو؟.
و اللـه لو على مرادي (سبعة الواحدات) يدخلوها في (مقررات المدارس).
يدخلوها مع (المرتبات).
الموظف قبل ما يصرف مرتبو ..يقولوا ليه سمع لينا سبعة الوحدات.
اول انتوا قايلين ح ننساها ليكم.
وبرّد يا.
التوم ود جاد الرب عندو نظرية …بقول ليك لو تقاوي القمح فسدت ما مشكلة.
لو تقاوي القطن تلفت ..ما قضية.
تقاوي البطاطس …كلو ما مشكلة.
المشكلة بس (الجنيات) ديل الواحد فيهم يومو كلو في (الفيس).
لمن يطلع من (الفيس بوك) ..يطلع ليك زي (نمل السكر).
خواجي إلّا ربع.
خلوا قيمنا – خلوا حاجاتنا السمحة وتراثنا وادبنا ..وبقوا يتفلهموا ليك في (الضربة الركنية).
الضربة الركنية عاوزة ليها (فلهمة).
انتوا تعالوا هنا يا مريخاب جايبين ليكم (محترفين) زي (السمّاكة) ما عندهم اي علاقة بي (ضربات الجزاء).
تقول جابوهم البلد دي (هنود حمر).
عندنا (قريبنا) كان عامل لينا فيها (ساعاتي)..الكلام دا زمن (الساعات).
قريبنا دا تشيل ليه (ساعة) عشان يصلحها ليك ..يفرتكها ليك (سلك – سلك).
يفرتكها ليك (معاوية الجاك – معاوية الجاك).
الساعاتي دا اي ساعة يفرتكها يقول ليك عاوزة (حجر).
بنقول ليه ..هسع دي عاوزة ليها ساعاتي.
تجيب ليها الحجر ..برضو ما تشتغل.
قريبنا يعاين للساعة كدا ..ويقول ليك احسن تغيرها…الساعة دي ما نافعة.
الساعاتي عامل زي المحترفين بتاعين المريخ ديل – ما ناقشين اي حاجة.
انا اول مرة اشوف لي محترف بيضيّع ليه (ضربة جزاء).
انتوا قريتو وين؟.
الكورة اتعلمتوها وين؟.
كيبي القون بيجيبو بالقلبة ..من اي حتة ..من اي موقع.
انتوا يا ناس اكرا ووانغا ضربات جزاء ما قادرين تجيبوها.
بكري المدينة ما غريبة عليه.
لكن انتوا مالكم؟.
تقول فطموكم بي (دوم).
كوفي دا شكلو في المباراة زي الزول البكد ليه في دومة.
المباراة كلها بيكد في (الدوم).
الزول دا ادوه (دومة) ما تدوه (كورة).
وبرّد يا.
التوم ود جاد الرب كان بقول ليك الاولاد ديل من يمشوا الخرطوم للجامعة برجعوا لينا من هناك بي شيتن كُتر كتر.
اصلو ما عاجباهو حركاتهم ..الولد يتعلم ليه (4) كلمات انجليزي يصدع بالحلة كلها.
والتوم ود جاد الرب عندو فهم ..(الحلاقات) الغريبة في فهمو (قلة ادب) ساكت.
وعدم احترام للناس الكبار.
والبناطلين الملبوسة وما ملبوسة دي …زي حكاية عادل امام في (شاهد ما شافش حاجة) – لابسة من غير هدوم.
الحاجات دي ما بتقع اصلو لي التوم ود جاد الرب.
التوم كان لمن يلقى ليه (ولد) من أولاد الحلة جاء من الخرطوم واقف في الدكان بيشرب ليه في حاجة باردة ..بيزعل وبيغضب ..وبقول ليه : (الخرطوم خربتكم).
بقيتو يا فتح الرحمن تشربوا في الحاجات الباردة …يمين يا فتح الرحمن ابوك كان شغال في (الديش) 40 سنة ..عمري ما شفتو واقف ليه في دكان بيشرب ليه في حاجة باردة.
اصلا ما في حاجة باردة مشت على خشمو.
ولو جينا للحق ..التوم ود جاد الرب عندو حق ..الولد اليوم كلو تلقاه قاعد في (الواتساب).
عمل ليه (نضارة) زي قعر الزير.
عمل ليه نضارة من (الواتساب).
زمان (النضارة) ما بعملوها في حاجة ساهلة…حاجة ما عندها قيمة.
ما في زول بيسمحوا ليه في الاساس يلبس ليه نضارة لو ما بقى (فيلسوف) او عندو دكتوراه على الاقل.
هسع الواحد تلقى عمرو (15) سنة ولابس ليه (نضارة)..مدير مدرستو ما لابسها.
انتوا ليه (المعاير) اتغيرت كدا.
ليه (النضارات) بقت زي (الصلع).
بقت (هملة) ساكت.
التوم ود جاد الرب دا بتعرفوه.
الزول دا مشى الخرطوم جاء راجع بعد اسبوع (واتساب للصباح).
بقى يلبس البنطلون كباية.
و اللـه الدنيا خربت.
الشغيل دا زمان كان في المريخ كورتو كلها (حطب).
ضرب وكلام مع الحكم.
ما بتشوف غير (الطواري) …والاباريق المجدعة.
الشغيل جاء الهلال كورتو اتصلحت ..بقى يلعب ليك كورة – نحن ذاتو اتحيرنا فيها.
رواقة ..وهندسة ..وفهم.
اخلاص وتفاني ونظام.
اخلاق ..ومدرسة وذوق.
الشغيل بقول ليك العب ليك باص ..وإلّا اسمعك حاجة لي عثمان حسين.
اي حاجة سمحة ..عاوزين تشوفها ..بتلقوها عند (الشغيل).
بيسطرها بالمسطرة.
زي علاءالدين يوسف لمن كان في الهلال ..كورتو (علوم تكنلوجيا) عديل كدا.
تصدقوا كورة علاءالدين يوسف في زول طلع ليها في (الكشافة) عاوز ينتحر عشان شطبوه.
تعالوا شوفوا كورة علاءالدين يوسف في المريخ الان.
كورة بتاعة عدي من وشك.
ما بتفهم اي حاجة.
اي كورة تدق بين امير كمال وعلاءالدين يوسف (قون)..تقول حارسين ليهم (حواشة).
بكري المدينة في الهلال كان شايل (سكينو)..لكن للامانة ما كان بيهبش ليه زول..تعال شوف هسع بدون سكين شغال ضرب في الحكام.
دحين يا رمضان عجب ..اسمع كلامنا.
لو عاوز تلعب كورة ..وترتاح في عضمك دا ..تعال الهلال.
مالك ومال (الوصافة).
عليك اللـه يا رمضان عجب ..انت هسع البتعمل فيه دا شوية.
كم مرة انقذت الجماعة ديل وسجلت ليهم (اقوان) في اوقات صعبة؟.
كتير.
الجماعة ديل بعد البتعمل فيه دا ..حصل جابوا ليهم مركز اكتر من (الوصافة).
هسع الهلال فايت المريخ بي اربعة نقاط.
ولسه.
الجابرك شنو؟.
ناس هيثم كابو مجبورين على المريخ ..انت الجابرك شنو؟.
انت زول لعاب ..وصغير في السن ..ومنضبط وملتزم ..شوف مصلحتك وين؟.
انت ما عاوز تلعب في المجموعات!!
سيكافا دي ما فترت منها!!
البخليك تلعب في سيكافا شنو؟.
مستواك دا لا مستوى سيكافا ولا حاجة.
اتخارج يا اخوي.
تعال اتمتع ..والعب كورة صاح ..مع ناس وليد علاءالدين وسيدي بيه ومحمد عبدالرحمن وكاريكا واطهر.
تعال حقق ليك القاب.
الوصافة ما بتودي ليها زول لي قدام.
وبرّد يا.
اقول ليكم حاجة ..بس الكلام دا ما يطلع من العمود دا.
ما يطلع برة.
الزول عندنا في الحلة وفي الشغل برضو وقت يرتاح ..بقولوا ليك فلان قطع الشريحة.
يعني شنو؟.
يعني قطع شريحة الموبايل ..وطلعها من (تلاتين عشرة) او ربيكا ..وعمل ليه جلاكسي.
والجلاكسي لازم تقطع ليه (الشريحة).
عشان كدا بقولوا ليك عن الزول البكون تعبان يقوم يرتاح في الدنيا دي ..بقولوا ليك عنو (قطع شريحة).
نحن تحت، تحت سمعنا لينا كلام.
قالوا رمضان عجب قطع الشريحة.
والظاهر كدا ومن قرائن الاحوال رمضان عجب غيّر موبايلو من (ربيكا) الى جلاكسي 5.
والكلام السمعناه ..انو قطع الشريحة عديل كدا.
اها انتوا باقى ليكم (جلاكسي 5) دا المريخ عندو ليه (شبكة).
جمال الوالي فايت.
يعني ناس بكري المدينة تاني ح يشتغلوا بالتلفون الثابت.
رمضان عجب في اي مباراة صعبة ومحرجة للمريخ بيجيب ليه قون وينقذ الفريق.
زول بعمل الحاجات دي مفروض يقيّموه بي خمسة مليار جنيه.
اذا كان بكري المدينة بالجري البعمل فيه دا منحوه تلاتة مليار جنيه.
بي سكينو شال ليه تلاتة مليار جنيه.
انت بي كورتك الرايقة ..واخلاقك العالية ..واقوانك البتجيبها تستاهل عشرين مليار جنيه.
اوعك.
اوعك يقولوا ليك الانتماء وروح المريخ.
الانتماء وروح المريخ لو بنفع زول ..كان نفع فيصل العجب (سيد الاسم).
يا زول شوف مصلحتك.
يمين جمال الوالي يخلي المريخ ..تاني استاد المريخ يجيبكم بص الوالي.
والي الخرطوم – ما والي المريخ.
اتخارج.
بعدين انت بعد ما قطعت (الشريحة) ما عندك طريقة.
شريحتك دي تاني ما بتشتغل ليك في (ربيكا).
إلّا يقولوا ليكم الكلام عديل كدا.
وبرّد يا.
…………….
ملحوظة : لو عاوزين تعيدوا قيد رمضان عجب ..إلّا تجيبوا ليكم (20) لورد جديد ..ناس همد ما بقدروا على الحاجات دي.

هوامش

مجلس الهلال مطلوب منه ان يدرس الموقف القانوني للخطوات التى يتخذها.
لو بطلنا كورة …كورة مع هذا الاتحاد ما بتنفع.
كدا شيلوا (تقرير الحكم) واعرضوه لي فيصل سيحة..شوفوه ح يقول شنو عن بكري المدينة.
اكيد ح يقول ليك الجهاز اتعطل.
ورضا مصطفى الشيخ يقوم يقول ليك الزمن انتهى.
انتوا يا رضا برنامجكم دا تامنو (جري حصان).
………..
عاجل : رمضان عجب ما ولدنا لكن ناس بشه اخوانو بالموردة.

شارك الموضوع :

تعليقات الفيسبوك

تعليقات


1 التعليقات

      1. 1
        كبجير

        انتو ما نسيتو سبعة المقاولين العرب قبل سبعة الوحداتوالخمسات والستات اخدتوها قبل المريخ و12 السعودية فى فريق ياخ د 12 ما حصل

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *