زواج سوداناس

رسالة حنين


شارك الموضوع :


سلام يا والدة يا غالية.. وعساك بى خير..

برسل ليكي كل الشوق.. وأشوفو قليل..

أفكر فيكي طول اليوم.. وبحلم بيكي طول الليل..

وأشوف فيك ناس بلدنا عموم.. وفي عينيك بشوف النيل..

سلام يا والدة كيف الحال.. وكيف بلدي العزيز وجميل..

وكيف الحلة والجيران.. وكيف والدنا جمل الشيل..

وكيف طين البيوت والسوق.. وكيف أستاذنا خاتي الميل..

وكيف شارعنا.. كيف الليق.. وكيف ضل الضحى وعصير؟..

وكيف أغنامنا.. كيف النيم.. وكيف يا يمة موية الزير؟..

وكيف فلق الصباح اللاح.. وكيف لون الشفق والطير؟..

وكيف محبوبتي ست الجيل.. وكيف جارتنا بت الخير؟..

****

وحاتك غربة ما بتنطاق.. فقييييرة ورغم مالها وفير..

بلدنا تساوى مال قارون.. وحضنك ما في ليهو بديل..

بلدنا جمييييلة يا أمي..

وناسها عدييييلة يا أمي..

وريدها بيجري فى دمي..

بعيد عن البلد والله.. كبر حزني وكتر همي

ومشتاق يمة للخرطوم.. ومشتاق لي ضحك عمي..

ولي ونسة شباب القوز.. ولي صوتك يجيب اسمي

ولي قعدتنا خشم الباب.. ولي جبنتنا .. لي نمي..

ولي شاي المغارب فاح.. مقننة ريحتو ياخ ترمي..

وحاااتك يمة تنجمي..

تراني خلااااص بدور أرجع.. فتر عزمي

بلدنا أمان.. وناسها حنان..

وأرضها يمة روض وجنان..

وحتى بناتها حور وحسان..

ورغم العيشة صعبة عديل.. قلبنا ملان رضا وإيمان..

لا بنشوف هناك أهوال.. ولا تفجير.. ولا إرهاب.. ولا بنضوق عذاب وهوان..

بلدنا يمين.. في كل الظروف عمران

ومعروف بالكرم والجود.. ووواضح في الخريطة كمان..

كفاية يكون مزيج وأريج.. وعامل لي خصومو ضجيج.. خلاويو نارها ليهو وجيج..

وكم عمرنا كم بلدان.. محيط وخليج..

نسافر يمه نحن بعيد.. نشوف أكوان.. تمر سنوات تمر أزمان..

برغم النهضة والعمران.. ورغم العملة والنيشان..

حنرجع يوم لشارع النيل.. ويفضل عزنا (السودان)

ويفضل سعدنا (السودان)

تلويح:

أحب مكان.. وطني السودان!

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *