صقر قريش 5 و 6 /1000

صقر قريش 5/1000 عبد الله نضال
> ايها الناس
> النضال من اشرف الصفات التي يتشرف بها الانسان
> والمناضل يكون مؤمناً بقضيه محدده تهن عليه روحه في الذود عن قضيته
> في هذا الزمان قلت تلك الصفه
> وقل عدد من يتصفون بها
> بل وتأرجحت نسبتها في نفوس من يتصفون بها
> فمنا من يناضل بيده
> ومنا من يناضل بلسانه
> ومنا من يناضل بقلبه وذلك اضعف النضال
> النوع ده اليومين دي بالملايين
> كتار خلاص
> ولكن صديقي عبد الله كمال
> الصحافي الشاب الغيور
> من المناضلين الذين يناضلون بأيديهم ولكن خلف الكواليس
> هذا الشاب يدافع عن المريخ ويجمع المعلومات باخلاص شديد
> انا معجب به
> ولذا اسميته عبد الله نضال
> وسأعود في الوقت المناسب لاحدثكم عن نضال عبد الله كمال
> المهم
> امهاتنا هاماتنا المشرئبه المتطلعه دوما للعلالي
> نستفيد من تجاربهن كثيرا
> ونتعلم منهن الكثير
> تعليم بدون مقابل
> وبمحبه كمان
> امي علمتني الكثير
> حكم وفلسفة ومبادئ
> بالتأكيد جميعنا استفاد من الامهات
> ولكي تعم الفائده
> نفتح المجال لاي زول يكلمنا عن شيء تعلمه من امه
> ويكون ذلك تحت مسمى
> امي علمتني
> اليوم ابداها ليكم
> امي علمتني
> لما الكلب ينبح فيك هو يا ولدي ما تنبح فيهو هو.. قول ليهو جر عشان يتذكر انو كلب وانك بشر
> سلم لسانك يا امي
> المهم
> انا عندما اقول الاخوه الاهله الشرفاء
> اقصد ذلك تماما
> لان الاهله الذين نعرفهم
> هم انصار الفريق الند لينا
> يبادلوننا الاحترام باحترام
> ونبادلهم الاحترام بالاحترام
> وننافسهم بشرف في الميدان
> ونحتفل بالانتصار عليهم
> ونداعبهم ويداعبونا
> هكذا نربينا علي ايدي الحجاج بالمريخ
> وهذا ما استفدنا من محمد علي زروق مصطفى ابشر ورعيلهم
> ومن بعدهم الطيب عبد الله والحكيم طه والارباب صلاح بن ادريس الذي يناكفنا كثيراً ولكن باحترام وادب
> ولأن الهلال الشريف
> اتسع انتماؤه فشمل اناساً لا يقدرون قدر فريقهم
> واصبحوا يجيبوا الكلام لفريقهم
> قلت لا بد من فصل الاهله الشرفاء عن الرجرجه والدهماء
> لذا اخاطبهم بعبارة الاخوه الاهله الشرفاء
> لانهم يخاطبوننا بعبارة الاخوه المريخاب الشرفاء
> ودام الشرف والاحترام بين الناس
> وقاتل الله القرف والمقرفين
> فالاهله الذين باركوا لنا بافتخار سيكافا الاولى ومانديلا
> هم الاهله الشرفاء الذين احب ان اناديهم
> المهم
> مفروض ندخل في موضوع قضية صقر قريش
> لكن «الفولدر» ابي يفتح
> الجهاز معلق
> بكرة بشتغل
> المهم
> تمارين الزعيم تمضي علي قدم وساق
> نحتاج لزيادة جرعات الاهتمام النفسي والاداري
> والتجارب الاعداديه القويه ضروريه
> ورفع الروح المعنويه وروح الاصرار هو القضيه
> والوقفه الجماهيريه في الاعداد بتنفع في مباراة العبور بانجولا
> الغريبه كنت بسأل نفسي
> في جماعه كده
> لو لعبنا مع فريق تشادي
> يشجعوا التشادي
> لو لعبنا مع فريق يوغندي
> يشجعوا اليوغندي
> لو لعبنا مع فريق كيني
> يشجعوا الكيني
> ولو لعبنا مع فريق تنزاني
> يشجعوا التنزاني
> ولو لعبنا ضد الملكية جوبا
> يشجعوا الفريق الجنوب سوداني
> حيرونا
> لكن بعد اكتشفنا جنسياتهم السبعه عرفنا السبب
> واتجنسي
> ايها الناس
> ان تنصروا الله ينصركم
> اها
> نجي لي شمارات والي الخرتوم
> والينا
> بصات الوالي مالها يا اخينا
> محل ما مشينا
> لقيناهم خرد مكومه لينا
> انتوا جبتوهم سكندهاند ولا شنو يا والينا
> لما شفنا البوهيه واللمبات الرتينه
> قلنا زينه في زينه
> جد لينا
> والينا حل مشكلة النقل لينا
> ولما بيها مشينا وجينا
> لقيناها خرد وماسورة يا والينا

صقر قريش 6/1000 جوهرة الرصيد
> قصة صقر قريش دي حاتطول يظهر
> لانو موضوع الكيري بتاع ابو سعد مسيطر علي الساحة
> وما عارف ناس حماية المستهلك الموضوع ده حايتعاملوا معاهو كيف
> البلاغ بلاغ مخالفة امر محلي
> ذبيح خارج المسلخ
> لكن القصة الكبيره في تعريض حياة الناس للخطر
> الذبيح خارج المسلخ بكون من طرف
> ومن طرف دي يعني تجر وتضبح
> العيانه والنصيحه
> والزول النصيح يجي يستهلك
> فيهلك
> سألتكم بالله البشتغل في الكيري ده ممكن نسميهو زول؟
> اناشد ناس حماية المستهلك بمتابعه الموضوع ده
> رقم البلاغ طرفنا
> والتفاصيل طرفنا
> والاتقال في التحري بنعرفو
> والما اتقال في التحري برضو بنعرفو
> الحكاية دي مفروض تاخد مساحتها التي تستحقها
> حماية للمواطن المستهلك المسكين
> فنحن نستهلك الزمن لنوفر ربع كيلو لحمه
> يطلع كيري يستهلكنا نحنا زاتنا؟!
> المهم
> قضية صقر قريش فيها اساليب احتياليه غير مسبوقه
> طرق احتياليه ما فكر فيها ابليس زاتو
> ابليس قالوا خته يدينو الاتنين في راسو لما سمع القصه
> ابليس قرب يتشهد
> عمايل تخلي ابليس ممكن يفكر في الورع والتقوي
> احتيال زي الاحتيال
> القضيه كبيره وشينه
> لكن سردها مهم شديد
> لتعم الفائده
> المهم
> الكرة في ملعب اللاعب
> واطاعة الجهاز الفني من اولي الاولويات
> والامتثال لصوت العقل والاستجابه لرغبات الجماهير
> من الاولويات التي تخلق من اللاعب اسطورة واسماً يتغني به الجمهور حتى بعد الاعتزال
> لذا ولذلك
> نطالب اللاعبين بالجديه والطاعه والاطاعه ووضع التأهل هدفاً منشوداً
> المهم
> اعجبني ما سطره القلم الهلالي الرائع يس احمد يس
> كتب عن الجوهره
> او قل كذبة الجوهره
> الجوهره الدايرين يبنوها بي تحويل الرصيد
> هو في رصيد يا اخوي؟!
> واحد داير يغير شبابيك بيتو
> يحول في الرصيد من بورتسودان سنه ونص
> لي اسي ما اتغيرت ضلفه
> قال جوهره قال
> المهم
> يحق لنا ان نسأل
> ماذا فعل المجلس في رفع عقوبة بكري؟
> لأن السكوت على الحرب المفبركه ضد بكري
> بخوف نزار الذي اصبح توقيعه بعد بكري مسألة وكت ليس الا
> وزي ما قال سوداكال
> حقو يجهزوا شكوى نزار من أسي
> لكن حسب توصية غرزة يا سوداكال
> حقو يأخروا شكوي نزار شويه
> لانو غرزة خاتي عينو علي واحد تاني مع نزار
> اخير يعملوا الشكوى ثنائيه
> يعني اتنين مدعى عليهما
> والمدعي كبسور
> كبسور طول ما اشتكى
> عل المانع خير
> ايها الناس
> قصة صقر قريش دي حاتدهشكم
> ابقوا معنا
> ايها الناس
> نعزي ولدنا احمد ابكر في انتقال والده عليه الرحمة
> ونسأل الله له الجنة
> المهم
> علمتني امي
> وقالت لي
> اذا جاريت في خلق دنيءٍ > > > > فأنت ومن تجاريه سواء
> بس في استثناء
> اذا كان مافي علاج غير النزول من الطوابق العليا للدرك السحيق
> يبقي لازم ولا بد من النزول
> وبعدها يصعد الواحد للطوابق والطبقات العليا
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> الغاز لسه مابينا
> القصة بقت «الغاز» يا والينا
> يا ترقدوهو لينا
> يا تعترفوا بالقصور يا والينا
> وتعتذروا لينا
> يا ما تلومونا
> فصوتنا أكيد للبجيب الغاز لينا
> نجيب الأنبوبة ولا نحل «الغاز» من مكان تاني بهتمى بينا ؟؟؟
سلك كهربا

ننساك كيف وشعارات المرشحين للانتخابات مضحكة شديد في «ظل» انعدام الغاز والحياة البقت «ألغاز»
وإلى لقاء.
سلك