زواج سوداناس

العنف ضد الجنين


شارك الموضوع :

في بريطانيا.. شابة في السادسة عشرة من عمرها رفعت دعوى ضد والدتها.. رفعتها ليها محامية بتاعة شبك.. قالت ليها تعالي انتي مالك الإعاقة دي شنو؟.. البنية قالت ليها: “لما كنت جنين في بطن أمي.. أمي كانت ديمة سكرانة.. وطاشمة.. أها الكحول أثرت فيني وعملت لي الإعاقة دي”..
المحامية قالت ليها أمك اتلومت لوم شديد.. وممكن ترفعي ضدها قضية.. وتدفع ليكي تعويض.. قروش ما ليها حد.. البنية وافقت والمحامية مشت ورفعت دعوى: “بنت معاقة ضد أمها الطاشمة”.
المحكمة قاعدة حسي تسج وتلج.. في موضوع الدعوى.. وفكرو في تشريع قانون العنف ضد الجنين..!!.. ومن ضمنه أي حاجة تؤدي إلى التأثير على الجنين وتكوينو.. ومستقبلو كبني آدم يجي مارق على الدنيا..
من أهم الحاجات التي تعتبر عنف ضد الجنين محاولات الإجهاض المتكررة لجنين واحد.. واحدة تكون حامل وما دايرة الجنا.. تمشي تتلب من حيطة.. واللا تقعد تجك اليوم كلو.. تشيل حاجات تقيلة.. ولا تشرب لها نصيبة بغرض التخلص من الجنين.. والجنين يكون النوع اللايوق.. واللاصق لحام.. وأصلو ما بيقع.. ويتشعبط في الحياة بإيديهو وكرعيهو.. بعض الحاجات قد تؤدي إلى تشوهات في الجنين.. يجي مارق حي بعد أن أثبت انه مناضل ومتمسك بي حقو في الحياة.. يجي مارق لكن فيهو خلل..
القانون دا قالوا في حاجات كتيرة ح تدخل فيهو وفي تفسيرو.. مثلا السهر وقلة النوم بيعتبر عنف ضد الجنين.. سهر في الحفلات.. تساهر الحامل وتجبجب.. دا عنف لأنو إزعاج للجنين.. لأنو مفروض تبقى راسية وترتاح عشان خاطر البني آدم القاعد يتكون جواها دا.. أيام الوحم والدلع وعدم الأكل يؤثر على الجنين.. ودا برضو بيعتبر عنف ضده.. ويعرضها للمسألة القانونية.. لي شنو ديمه حردانة الأكل؟.. الأكل دا ما حقك براكي.. حق الفي بطنك دا معاكي.. بعد تلديهو احردي زي ما دايرة.. لكن ما أيام الرضاعة.. لأنو برضو هو طفل من حقو يرضع سمح.. ويلقى اللبن في أي وقت يحس إنو جيعان..
يعني ممكن تمارسي هوايتك في حرداب الأكل بعد تفطميهو.. احردي براحتك.. أما السجاير وشراب الشيشة فدا ياهو العنف الشديد.. الكحول بيمشي مع الدم.. وهو مسكين جنين يطشم في صمة خشمو.. وما يعرف نفسو في بطنك واللا في حوض سباحة؟..
وغير إنو الكحول بيؤدي إلى الإعاقة.. زي البنية القلناها في أول المقال واشتكت أمها.. برضو العنف ضد الأم الحامل بيعتبر عنف ضد الجنين.. حتى لو عنف ضغوط نفسية نضم وهرجة.. يعني دا عنف بيتحمل مسئوليته الزول القام بالعنف ضد الأم وغالبا يكون الراجل الزوج.. يعني لو عاوزين يحاكموهو يحاكموهو بالعنف ضد نفرين.. أم وجناها الفي بطنها عشان كدي أي راجل زهجان من مرتو الحامل ما ينضم معاها، يصرو ليها بعد تلد..
في دراسة حديثة تقول إنو الجنين بيتعود على نوع الطعام البتاكلو أمو.. حتى بعد يكبر ويمرق في السهلة.. بحب الأكل الكانت أمو متعودة تاكلو وهو جنين.. عشان كدي بيوصوها تختار أكل سمح أيام الحمل وتاكلو.. الله يهون!!

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *