زواج سوداناس

أحلام


شارك الموضوع :

كانت أحلامي الصغيرة.. عايشة في آمال كبيرة

أنا كنت بحلم بالسعادة.. وما أضوق أحزان مريرة

وإنو أنجح في حياتي وأمشي في السكة العديلة

وألقى إنسان قلبوا واسع.. ييقى لي شمسي المنيرة

ويحتمل جني وظنوني.. وطفلة فى جواي غريرة

فيهو أكتب كل خواطري.. وكم قصيدة ريد جميلة

وما نشوف يوم التعاسة.. ولا نعيش لحظات حسيرة

وبينا تبقى الدنيا زاهية.. وتلتئم أرواح كسيرة

إلا أحلامي الصغيرة.. عاشت القصة المثيرة

والمؤكد إنو كانت.. عايشة فى أوهام خطيرة

****

وأنا كنتا بحلم بي وطنا.. عالي متقدم ورائع

فيهو أرض المولى واسعة.. ولينا فيها كمان منافع

نحيا حرية وتعاون.. وأي ماضي يكون مضارع

النعيم يملا المنازل.. والخضار يملا الشوارع

والنضافة تكون شعارنا.. والطموحات تبقى واقع

والبلد بي خيرو وافر.. وفى العوالم نجمو ساطع

والمؤكد هسة إنو.. كل شاب من أهلو ناجع

النفوس مليانة حيرة.. والقلوب فيها المواجع

والظروف صعبت علينا.. والطموح مات في المنابع

لا تطور.. لا عزيمة.. لا مزارع.. لا مصانع

بس خطب فوق المنابر.. أو أكاذيب في الجوامع

والبيمرق من بلدنا.. تاني ما بيجيها راجع

****

وأنا كنت بحلم بي صداقة.. لي تدوم العمر كلو

لو فرحت أكيييبد بتفرح.. ويوم أتوه قلبى بتدلو

ما تفتش لى غلطة.. ولا تهين قلبي وتذلو

ولو حصل إنو اختلفنا.. تحفظ الأسرار أقلو

ما بتزهج من كلامي.. ولا أسف روحي بتملو

إلا بس وينا الصداقة.. التفقد إنسانك تطلو

أو تقيف جنبك تدافع.. وحتى همك ليك تحلو

المؤكد ما في زولا بحفظ الإحسان يجلو

ولا صديقا يبقى غيمتك.. وتبقى ضلو

أي زول ساكي المصالح وفي المحن واقف محلو

ويا حليل زمن المحنة والخليل البحمي خلو

****

وكنت بحلم بي قرايب يوصلوا الرحم الحنين

يبقوا جنبك في سعادتك وحتى في عز الأنين

ليك يمدوا حبال مودة.. ويحفظوا الود بالسنين

يسندوك ويقيفوا جنبك.. بالسواعد وبالإيدين

وتلقى بابهم ديمة فاتح.. وبيهو تدخل كل حين

يوم تغيب بس عن عيونهم.. يسألوك: ياخ إنت وين؟

والمؤكد هسة أصبح حال قرايبك ما هو زين

يوصموك بى أي عيبة وليكا ينسبوا كل شين

والرحم مسكين مقطع.. وبينا فرقة وبينا بين

والقوالات والدسائس.. تجرح القلب الحزين

وكل واحد كاره قريبو.. زي تقول بس طالبو دين

****

وياخي أحلامي الصغيرة.. أصبحت أحلام كسيرة

والعيون على قدر شوفها.. عادت النظرات حسيرة

وبرضو نحلف بكرة أحلى.. وفيهو فرحة.. ولينا سيرة

الله غالب فوق ألمنا.. وبيكتب الفرحة الكبيرة..

تلويح:

اللهم حقق أحلامنا.. وبارك أيامنا.. وأحسن خاتمتنا.. واجعل الفردوس مقامنا.. آمين

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *