ولادة الهـنا
ناس من يوما يلدوها ناس، وناس من يلدوها لمن تموت تكابس وتعافر في الدنيا عشان يبقو ناس.. وناس يلدوها في خشما معلقة دهب والعسل بالكاس.. وناس طول حياتها ننلحها كوابيس ويتقبا اب كباس.. ناس من يلدوهم امرا.. وناس يجو للدنيا خامشين المر في ايديهم.. ناس يلدوها في سرير فراشو حرير.. وناس يلدوها ويجدعوها في خشم باب أقرب جامع.. واللا جوا بئر.. الدنيا كدا.. كل زول بي حظو.. وفسمتو والمكتوب ليهو.. الأسبوع الفات.. ولدو للأمير وليام ود الأمير شارلز ود الملكة اليزابييث.. أمو الليدي ديانا.. ولدو ليهو بنية.. الدنيا جت سمعت بها.. قنوات فضائية ومواقع انترنت.. والدنيا هاصت وجاطت.. وليام جابو ليهو بنية وليام جابو ليهو بنية.. من سمعو انو الليدي (كنت) بي تتوجع ودايرة تلد.. إتلمو الإنجليز العميان شايل المكسر.. واتحاوطو المستشفى الدايرة تلد فيهو الليدي (كنت).. ولدت.. جابو ليهم بيان من الديوان الملكي قالو ليهم اللليدي اتحلت بالسلامة وجابت بنية.. وصفقو وصفورو.. وفرحو فرح شديد.. وحقصو جنب المستشفى.. علا يشوفو البنية (الأميرة الجديدة).. بعد عشرة ساعات جات امها مارقة شايلاها.. وتاني صفقو وصفرو وهيصو.. الرجال خلو الأميرة المولودة ومسكو في امها، مرا تلد وبعد عشر ساعات تجي مارقة ماشة زي الغزالة. النسوان قالن المرا دي علا تكون ولدت قبال تلاتة اربعة ايام وداسين الخبر علا اصلو مافي مرا تلد وتجي مارقة بعد عشرة ساعات مجيهة الجيهة دي.. الرجال قالو.. الولادة يخلوها لي دوقة كامبريدج.. والنسوان تعقر.. أسر لي صديق أنو نحن المرا تلد بعد تلاتة أيام تجي تلقاها الوشي والكريعات وارمات والشلاليف يابسات والشعر منكوش.. والحنة مكرمشة.. والعوينات مكتلات عدمانات اسم الرمش.. الرموش اتملصن في الولادة.. وتسألها “اهــا.. كيفنك؟” تقول لك “طيبة.. علا البنية بكاياتن، بكايتن.. الليل كلو إنجر إنجر إنجر.. أها كدي عاين لها تشبه منو؟ بي حلاتا دي.. ما بتشبه أمي؟ يعني المعني أنا أمي شينة وما بتشبها”.. بلع ريقو، واستطرد بسؤال محوري واتبعه باجابة تاريخية “.. شفت إنجر دي؟ ناس يجيبو أمراء ونحن نجيب جروا” !!
بعد ولادتها.. الناس انشغلو في اسمها.. يسموها علي حبوبتها أم أبوها.. ناس الملكة بيزعلو.. يسموها علي حبوبتها حبوبة أبوها.. الشعب البريطاني بيريدو ديانا ودايرنهم يسموها عليها.. في النهاية اتفقو وعشان يرضو الناس كلها اتفقو يسموها (شارلوت اليزابيث ديانا) أي والله التلاتة أسامي ديل حقاتها برااااااااها ما معاها اي زول.. شارلوت قالو إشارة إلى الأمير شارلز والد ابوها.. اليزابيث علي حبوبتها حبوبة ابوها الملكة اليزابيث.. وديانا على حبوبتها الليدي ديانا.. لكن ح يكون اللقب الرسمي ليها “صاحبة السمو الملكي الأميرة شارلوت أميرة كامبريدج”.
صادف أن ولدت شامبنازاية في حديقة حيوان في اليابان وجابت انتاية.. قومو يا اليابانيين على شلاقتكم سمو بنية الشمبنازياية سموها (شارلوت).. بقو في لوم وشكر والتخارجهم من نضم الناس ماعرفوهو.. كيف تسمو الشمبانزاية علي صاحبة السمو الملكي الأميرة شارلوت؟ في النهاية ناس حديقة الحيوان طلعو بيان واعتذرو وقالو متلومين وندمانين وسافين التراب.. وغيرو اسمها !!
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة