لي جيران
جيرانا الزمان.. يحليلو نفاج ريدنا..
وبيتكم كان ملاذنا.. وكان تمامة بيتنا..
حلتو من بصلنا.. ومن ملحنا وزيتنا..
وناركم نار ملاحنا.. وهاكم إبرة خيتنا
***
وجارك كان أخوك.. منو ماااابتضارى
وتلبس من هدومو.. وللقميص تتعارى
دمو يسيل فداك.. يوم عركة أو يوم غارة
لا بتغابى فيك.. لا بينسى.. لا بيتجارى
****
وجيرانا الزمان.. كانت نفوسهم صافية
وفي ساعة الدواس.. يلفوك كراعهم حافية
لقمة حنهم.. فى جوفنا تنزل دااافية
وحارسين باب حماك.. يوم تبقى عينك غافية
****
كنا زمان حنان.. والبينا كانت عامرة
بينا وئام وريد.. وكمين مشاعر غامرة
في نور القمر.. الناس جميع متسامرة
أب ساعد هميم.. والعالي جيدها وضامرة
***
وكنا زمان بنات.. في جارنا يوت نتحامى
راجل ود رجال.. أخلاقو عالية وقامة
شرف حلتو.. ولي أهلو رافع الهامة
وكان شاف الغلط.. حاشاهو ما بيتعامى
****
وجيرانا الزمان.. والله حقو الشكرة
وبينا جليل عهود.. وأيام جميلة.. وذكرى
وفضلت فينا خالدة.. الأمسيات والعشرة
قضينا الجوار في خوة صادقة وسترة
****
ما ورونا عيب.. وما شافوا مننا شينة
حافظين الوداد.. ديل كانوا مننا لينا
متعاونين دوام.. متشابكات إيدينا
طابت صحبتم.. عاشت سنينهم فينا
****
وكان ود الفريق.. دايما غيور وهمام
حارس ناس فريقو.. حاشاهو قط ما نام
في عز البرد.. شال العصاية وحام
صادق ما بيخون.. ولا بيسوي حرام
****
وبنوت الفريق.. كانن أكيد أخواتو
لا بيقرب حماهن.. ولا بغش جاراتو
حافظ عرضهن.. وحافظ كلام أماتو
وعارف كم رجال.. من قبلو ستروا وماتوا
***
ربتنا البيوت في كل حارة وحلة
في كل بيت ننوم.. وناكل من أيها حلّة
لا بيناتنا من.. لا زول قصدنا مضرة
وجد كان الجوار.. نعمة.. ورزق من الله
تلويح:
سقى الله جوارنا القديم.. حين ربتنا كل البيوت دون خوف أو حرج.
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة