زواج سوداناس

حبوبة



شارك الموضوع :

نتح الحنين جواي.. طراني حلتنا
زمن الجمال والخير.. أيام مسرتنا
شجر العشر والنيم.. المالي سكتنا
صوت الصفق والريح.. وأغنام زريبتنا
ضل الضحى الممحوق.. وكبابي جبنتنا
الضحكة والترحاب.. وبواقي ونستنا
والوقفة جنب الباب.. لي ناس معزتنا
عايشين على الموجود.. حابين بساطتنا
يوم كنا متكاتفين.. و(الجد) منارتنا
والقمرة عز الليل.. ضوّت رتينتنا
نسمة دعاش الصيف.. وريحة زلابيتنا
أمي بتسوي الشاي و(حبوبة) حجّتنا
وهسع بقت في الدار.. (يا ويح نخوتنا )
وشكراً لأهل الدار.. الداروا سوءتنا
****
# حبوبة وينك وين؟.. حبوبة والله زمان..
كاتلني شوقاً ليك.. ولي حضنك الدفيان
منك عرفنا دروس.. وروينا ريد وحنان
بي توبك المعطون.. غتيتي كل بردان
ودعيتي بالتوفيق.. وحصنتني بالمنان
عفواً.. ملانا غرور ونسينا كل الكان
لا فهمنا درس البر.. لا قيمة الإحسان
وعرفتي درب الدار.. وضاع مننا العنوان
****
# (حبوبة).. زوريني.. أنا داير أحجيكي
بي قصة الأحفاد.. الخانوا ماضيكي
صغرت مروءتنا.. وكبرت مآسيكي
لا سدّ جوعك حن.. لا لهفة ترويكي
لاهين ورا الدنيا.. ومرات كدة نجيكي
لا بنفهم أحزانك.. لا بندري بالفيكي
ولو يوم ظلمناكى.. عدل الله راجيكي
****
# الغول ختف فاطنة.. وما فينا أي حسن
ملينا من عجزك.. فتشنا ليكي سكن
وكل ما يطول عمرك.. حتشوفي ياما محن
إمكن نزورك يوم.. لو مرة بس أمكن
لو سنحت الأحوال.. ولقينا باقي زمن
بعناكي للمجهول.. وقبالا بعنا وطن
****
# الجاب أبوهو الدار.. ما عندوا أي عذر
مهما يكون ظرفوا.. لو حتى ضاق المر
معقولة يستغني.. عن والدو مرّة بشر؟
الجابو للدنيا.. وعليهو ياما صبر؟

كان راجي يبقى سند.. لو شاخ وعدّ عمر
لا راجي جاه لا مال.. ولا راجي حتى شكر
داير شوية حب.. والذكرى ديمة تمر
عن حالنا نحن زمان.. أطفال صغار وشتر
نضحك بدون تكليف.. وللهم براهو يجر
علشان يعيش مستور.. ويلبي كل أمر
والليلة جينا خلاص.. لي عهدو نتنكر؟
نرميهو جوه الدار.. والقسوة تتفجر؟
لا رحمة.. لا عرفان.. لا نخاف ولا نخجل؟
من ربنا الديان.. الوصي يوت بالبر
بالوالد المسكين.. العشمو كان أخضر
لكن جفا الحبان.. من عشمو كان أكبر
وبقت الحكاية جحود.. وامكن تكون أكتر
منعول ولادة الهم.. لي والدو ما قدر
والدنيا بكرة تدور.. وفي الدار دي يتحكر
*****
# ضاقت بيوت العز.. ووسعت مآوينا
الحزن ماليكم.. والزهو مالينا
ما نسيتوا عشرتنا.. لكننا نسينا
بارينا درب الغي.. وأنكرنا ماضينا
حبوبة تاج الراس.. نرجوك تسامحينا
وإن شاء لله داركم يوم.. ترحم وتأوينا
****
# دار الحكومة بقت.. آخر المطاف بيتكم
فيها بتقيموا الليل.. وتصابحوا يوم عيدكم
الدمعة صحبتكم.. والخوف أكيد سيدكم
وفي منتدى التغريب .. دايماً مواعيدكم
ضيعنا أحلامكم.. تاجرنا بي ريدكم
****
# حبوبة جوّة الدار.. محزونة مكلومة
والدار دي في الأحزان يكمل عديل يوما
تستقبل الأفواج.. لا قعدة لا قومة
تفتح مع الأذان.. قبال تتم نوما
محتاجة رحمة ونور.. متجددة همومة
لا زم نساعد الدار.. وتعفينا من لوما
معقولة حتي البر.. ملزومة بي حكومة؟!
تلويح:
تحية التقدير والامتنان للأعزاء في مجموعة (مؤانسة ومثاقفة) من أهل الكلمة والدواخل النقية، وهم يوقظون ضمائرنا بزيارة دار المسنات بالسجانة.. وحسبنا وحسبهن الله ونعم الوكيل!!

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *