زواج سوداناس

لو ما قادرين تعيدوا مباراة (المريخ والامل) عيدوا مباراة (الرابطة والنسور)



شارك الموضوع :

ما في موضوع بقدروا يحسموه بصورة سليمة من غير لف ودوران واعادة مراجعة وطقطقة اصابعين..وقطيّع نجيلة تقول جايبنكم تحبوا لينا في لجانكم دي
خسارة (كرفتات) ساكت…كرفتات وألقاب ..واسماء ومكاتب ومكيفات شغالة..المكيفات دي كتيرة عليكم..مفروض يشغلوا ليكم (مروحة) بس

عندو حكمة عميقة ..بقول ليك الواطة دي نحن طلعنا منها ..ونحن ح نمشي ليها ..عشان كدا اصلو نحن ما فايتنها

بالمناسبة نحن تاني معتصم جعفر دا ما بنعدوا ليكم..تاني نحن من الليلة وصاعدا بنعتبر رئيس الاتحاد العام (اسامة عطا المنان)

اكتر كلمة مستعملة عندنا في القانون هي كلمة (ارجاء).

بس دي البتعرفوا ليها.

انتوا بتقرأوا جامعة.

وبتتخرجوا منها.

وبتحضروا برة.

وبتشتغلوا.

وبصرفوا ليكم مرتبات ..عشان (الارجاء) دا.

هسع (الارجاء) دا عاوز ليه (خبرة) يا ناس الاستئنافات.

عاوز ليه قانون.

عاوز ليه قراية.

اي زول حايم في سوق اللـه اكبر دا ممكن يعمل في البتعملوا فيه دا.

خسارة (كرفتات) ساكت.

كرفتات وألقاب ..واسماء ومكاتب ومكيفات شغالة.

المكيفات دي كتيرة عليكم.

مفروض يشغلوا ليكم مروحة بس.

والمروحة ذاتها فوق اتنين ما يشغلوها ليكم.

و

وبرّد يا.

اتذكر عمنا ود شلّوخة.

عمنا ودشلّوخة دا كان صعب.

كان كبير الحلة.

كلمتو زي السيف.

زول صعب.

السفة البسفها ما بتفها – بيبلعها ليك طوالي.

حاجة بتدخل خشمو ما بترجع.

ما بتطلع.

زول صعب.

يقولوا ليكم الكلام مية مرة.

رأسكم قوي.

عمنا ود شلّوخة دا …كان القانون دا كلو ما بعرف فيه حاجة غير (ارجاء).

بقول ليك انا بعرف القانون الفرنسي.

والقانون الانجليزي.

والقانون الهندي.

وقانون حمورابي.

وقانون الغاب.

وقانون الاهالي.

اي قانون في الدنيا دي – بقول ليك انا عارفو.

وهو ما بعرف حاجة غير (ارجاء).

اي ملف يجبوه ليه ..يقول (ارجاء) الملف للعام المقبل.

اي قضية بتصلوا بعمل ليها (ارجاء).

لو كتلو زول قدامو بحوّل ملف القاتل الى (ارجاء).

قانونو كلو في (الارجاء) دا.

محمد ود الشخيط ..قال ليه واللـه انت يا عمنا ود شلّوخة رأسك الكبير دا ما فيه حاجة غير (الارجاء).

يمين يا عمنا ود شلّوخة لو صالونك ما كبير وفيه طراوة سمحة …ما كان في زول بقبل عليك.

صالونك اصلو ما فيه كلمة.

لكن قانونك (كباية شاي) كتيرة فيه.

عمنا ود شلّوخة ..وقت تكون في لّمة ..بمشي بدري.

بقعد في الواطة دي.

عندو حكمة عميقة ..بقول ليك الواطة دي نحن طلعنا منها ..ونحن ح نمشي ليها ..عشان كدا اصلو نحن ما فايتنها.

احسن نتفرجخ فيها.

ينزل ليك في (الواطة) متل (السبعة) الفرتكوها.

يجيبوا (الغداء).

الضلع والبامية المفروكة والقرع والبطاطس.

ما بخلوا شيء.

ومع صينية الغداء بجبيبوا ليك (الحلو) داخل.

اصلو نحن مستعجلين.

الحلو بجيبوه مع الغداء.

عمنا ود شلّوخة بعاين للحلو سمح ..وبقول جيبوا لي (الحلو) دا قبل الغداء ..لو سخن تاني ما بتاكل.

محمد ود الشخيط بطلع من آخر القوم ..بقول لي عمنا ود شلّوخة انت يا عمنا (الحلو) دا ما تعمل ليه (ارجاء).

الصالون كلو بقعد يضحك.

عمنا ود شلّوخة بالو واسع وصدرو فاتح وقلبو كبير ..بقول ليه يا محمد يا ولدي (الحلو) دا الوحيد البكسر ليه القاعدة – ما بقدر اعمل ليه (ارجاء).

لو عملت ليه (ارجاء) عندكم شفع ..قبل ما ينزل من الواطة بنسفو ليك.

يخلونا ندخل على (القرع) بي غادي – ويقبلوا عليه.

عشان كدا احسن ننتهي من (الحلو) اول.

الطيب ود السوعتاب ..بقول ليه قلت كدا يا ود شلّوخة ..نزلوه ان بقى كدا – نزلوا (الحلو) كلامك اصلو ما كعب يا ود شلّوخة.

ينزلوا ليك في (الحلو) – ينفضوا ليك في (3) ثواني.

و

وبرّد يا.

ما في موضوع بقدروا يحسموه بصورة سليمة من غير لف دوران ..واعادة مراجعة.

وطقطقة اصابعين.

وقطيّع نجيلة.

تقول جايبنكم تحبوا لينا في لجانكم دي.

لجنة الاستئنافات قررت (اعادة) مباراة المريخ والامل ..الاتحاد العام بقيادة (اسامة عطا المنان) قرر (اعادة) النظر في القرار وطلب الفحص والمراجعة.

بس دي البتقدروا ليها.

بدل يعيدوا المباراة ..اعادوا القرار.

بالمناسبة نحن تاني معتصم جعفر دا ما بنعدو ليكم.

تاني نحن من الليلة وصاعدا بنعتبر رئيس الاتحاد العام (اسامة عطا المنان).

هو الرئيس والمقرر وامين الخزينة ونائب الرئيس والاعضاء ومحمد سيدأحمد ذاتو.

اسامة عطا المنان ممكن يحول اكاديمية الاتحاد العام الى محل يبيع فيه (فول).

ممكن يركب ليه قدرة فول قدام الاكاديمية ..طالما ناس معتصم جعفر ومجدي شمس الدين بقوا قاعدين ساكت.

ولا في زول بحس بيهم.

تركوا الامور لاسامة عطا المنان ..عشان يلخبط زي ما هو عاوز.

ولا في زول بيسألو.

ولا في زول بقدر يقول ليه حاجة.

اسامة عطا المنان برمجته عند جمال الوالي.

البرمجمة عند الوالي.

جلوس – قيام.

الواضح في البلد دي ..ان (القانون) احسن منو (اللخبطة).

الناس ديل بعملوا حاجات بالقانون ..الزول لو (تلب) ليه حيطة ما بعملها.

استعملوا (القانون) لتحقيق مصالحهم الخاصة ..بعد ان اصبحت (مآربهم) واضحة ومكشوفة ..وما عاوزة ليها درس عصر.

ولا وجع ضرس.

نحن بقت مشكلتنا في القانون.

مشكلتنا ما في التجاوزات.

مشكلتنا في الناس بتاعين القانون ذاتهم.

مشكلتنا ما في الناس البخرجوا من القانون.

قرار مباراة المريخ والامل ..ح يظل كدا الى موسم 2022.

يعني لمن قطر تنظم كأس العالم ..ما اظن جماعتنا يحسموا موضوع هذه المباراة.

ما اظنهم ينفذوا القرارات.

نحن بنطلع قرارات ساكت.

وما عندنا قدرة على تنفيذها.

سماحة بدل ومكاتب مكيفة ساكت.

بلا قانون – بلا لخمة معاكم.

لو خليتوها (غابة) عديل – احسن من البتعملوا فيه دا.

احسن من اللف والدوران والارجاء.

البلد دي لو ضهرك قوي ..ما بتجيك اي حاجة.

ما في زول بقدر يعمل شيء.

لو كتلت ليك رقبة.

بقولوا الرقبة غلطانة.

بقوموا يدينوا القتيل.

القاتل ما بعلموا ليه اي شيء.

بطلع منها زي الشعرة من العجين.

بس فالحين لي في المهرجانات.

وحفلات الوداع.

والتورتات.

والوشاحات.

والحاجات اللا بتودي ولا بتجيب.

مباراة المريخ والامل لو كانت مخالفتها تلك في مباراة تانية كانوا عادوها.

بل كانوا شالوا النقاط من الفريق صاحب المخالفة.

لكن عشان المريخ عندو ضهر.

عندو جمال الوالي.

وحكومة قايمة بي ذاتها ..ما بقدروا يعملوا ليه حاجة.

القرار ح يظل مدلدل كدا الى ان تقوم الساعة.

ما عندنا ناس بقدروا يطبقوا القرار.

الجماعة ديل ناس مكيفات ساكت.

وتصريحات وكلام في الجرايد.

وجعتوا لينا قلوبنا.

وجبتوا (الضغط) للشعب المسكين دا.

اي زول عندو سلطة بعمل اي حاجة.

لا في قانون.

ولا تغشوا الناس ساكت.

لجان (كرتونية) ساكت.

لجان كوّنت مخصوص عشان تكتل القضايا.

تقعدوا تمطوا في الزمن.

وتكتلوا في الوقت بدون فائدة.

واللـه (المكيفات) الشغالة دي كتيرة عليكم.

ما بتستاهلوها.

اتحاد ببحث عن مصالحو وعن سفروا ..ونثريات وحافزو وفنادقو.

البلد ما شغالين بيها.

والكورة فاتحين بيها بيوت.

وبتمشوا بيها مصالحكم بس.

مصلحة البلد – ما في زول جايب ليها خبر.

ما تقعدوا تكضبوا فينا في الجرايد ساكت.

اقول ليكم.

عشان ما تتحرجوا.

وعشان ما تبقى ليكم شينة.

رأيكم شنو؟.

بدل مباراة المريخ والامل تعيدوا مباراة الرابطة والنسور.

ما في زول بيسألكم.

وما في زول بقدر يقول ليكم حاجة.

أهو مخرج في السخانة دي.

عيدوا مباراة الرابطة والنسور …عشان مخالفة وقعت في مباراة المريخ والامل.

نحن بنصفق ليكم.

ونبقول ليكم مبروك.

………..

ملحوظة : الفريق طارق ماشي عليه.
هوامش

الفريق طارق (واللـه العظيم ما حافظ باقى اسمو) الامين العام للمريخ وقت ناس عبدالصمد يدفعوا…بقعد يصرح.

بقعد يهاجم في الهلال.

دورو في المجلس (المخالفة) دي.

عشان يظهر.

وعشان يحس بي وجودو.

ويقولوا بعمل في حاجة.

بقوم (يتعنتر) في كم تصريح كدا.

يا اخوي – انت من زمن (العنترة) في التصريحات.

الكلام البتقول دا خليه للمشجعين.

ما تقعد تستعرض لينا في (الجرايد) ساكت.

وانت (قرش) ما قاعد تدفعو.

مساهمتك في المجلس …تقعد تصرح كدا.

يا زول نحن ذاتو ما قاعدين نعدك.

انت لا عندك قرار.

ولا من ناس القرار.

عشان كدا اتكلم ساكت.

اتكلم ساكت يا سعادة الفريق لو دا كلامك.

رجل من قيادات الشرطة يفترض ان يحترم القانون.

كان القانون معه.

او كان ضده.

بدل ما يصدّر صورة ..كرهنا ان نشوفها في البلد دي.

احترم القانون – على الاقل.

اسكت لو ما قادر تدفع.

………….

عاجل : ديل (المغص) ذاتو بتجاروا فيه.

شارك الموضوع :

تعليقات الفيسبوك

تعليقات


1 التعليقات

      1. 1
        سوداني__لا حزبي__لا انفصالي _وحدوي

        شغل نضيف __ايوة الدلاقين ديل اديهم على راسم

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *