زواج سوداناس

(هيثم – تراوري – بكري – عمر) إحنا لحمنا مُر اوي



شارك الموضوع :

انتهت حكاية هيثم مصطفى بدرس قاس وجهه البرنس للمريخ ..لكن اظنهم ما فهموا حاجة

بكري المدينة بعد التلاتة مليار جنيه ..معيشهم ليك في (افلام رعب)

مباراة المريخ والامل لو عادوها عشرين مرة ..ما بتفرحني قدر الفرحة النحن فيها الآن

تتخيلوا بعد المؤتمر الصحفي …تراوري قفل تلفونو…في اهانة اكتر من دي

· يتخيل لي دا (احمد بدير) – او واحد قاطعو من رأسي ..(ما تسألوني).

· اقطع زي ما عاوز.

· ما في زول بقدر يقول لي حاجة.

· بس فالحين لي انا.

· احمد بدير حسب (اعتقادي) دا ..بقوم يدخل على خشبة المسرح …يقيف كدا ..الجمهور كلو يقعد يصفق.

· بدون مناسبة.

· ومن غير مقدمات.

· وبسبسة ..يقول ليهم : (إحنا لحمنا مر اوي).

· انتوا فاكرننا نحن (ساردين)؟.

· قايلننا يا اسامة عطا المنان ..نحن (بيرقر)؟.

· يا اخوي ..احسن تستعدل …البمسكو ناس الهلال ما بمشي لي قدام.

· انت قايلنا نحن (شاورما)؟.

· علبة زبادي؟.

· نحن معاكم لي (لوزان).

· واحمد بدير ..يخش ويطلع في المسرحية ..يقول ليهم : (إحنا لحمنا مر اوي).

· والجمهور كلو يقعد يصفق.

· واحمد بدير ما فاهم اي حاجة.

· ما عارف شيء.

· اطبق ليكم النظرية.

· واثبتها ليكم.

· عشان تعرفوا نحن اصلو ما قاعدين نتكلم ساكت.

· ولا قاعدين نقطع حاجة من رأسنا.

· اي لاعب هبشوا ناس المريخ …وسجلوه من الهلال ..عمل ليهم (ازمة).

· جاب ليهم مشاكل لا حصر لها ولا عدد.

· اقل واحد جاتو حصوة – اكرم الهادي سليم.

· ما عاوز امشي بعيد.

· عاوز اتكلم عن واقع – معاش الآن…ونحن شايفنو ..وكلكم بتشهدوا عليه.

· ما عاوز ارجع ليكم لعزالدين الدحيش ..عندما خلع فانلة المريخ بعد ساعة ونص بس ..وقال ليهم ما بلبسها.

· عاوز ارجع الهلال.

· والدحيش كان اكتر لاعب (شفت) في الدنيا دي.

· يعني كان يفترض ما تفرق معاهو …لكن مع ذلك ..الدحيش رفض المريخ ..ورجع الهلال.

· حكايات زي دي كتيرة.

· ومشهودة ومعروفة.

· ما عاوز ارجع ليكم ليها بالتفاصيل.

· برجع ليكم بس على وقائع حدثت الآن ..وهي مازالت في الساحة الرياضية ..وقاعدين الى وقتنا هذا يلعبوا كورة.

· عشان الموضوع يبقى ليكم واضح.

· وما تغلبكم حاجة.

· واحمد بدير كل مرة ..يخش ويطلع ويقيف على خشبة المسرح ويقول للجمهور : (إحنا لحمنا مر اوي).

· والجمهور يصفق.

· عندما سجل المريخ اللاعب هيثم مصطفى كابتن الهلال السابق…فعل المريخاب كل شيء.

· اصلو ما قصروا معاهو.

· لدرجة انهم قالوا امنحوه (الكابتنية)…هيثم مصطفى نعم القائد ..وهو لاعب كبير.

· فيصل العجب ..مرقها للفاشر.

· ما قصروا.

· لا الباشا بنفع كابتن …ولا بلة جابر.

· الموضوع واضح.

· مع ذلك ..هيثم مصطفى رفض يكمل معاهم ..وذهب بيتو وفضّل القُعاد في البيت من اللعب في المريخ.

· موسم كامل هيثم مصطفى قاعد في البيت.

· قال ليهم ما بلعب.

· لدرجة ان جمال الوالي قدم لهيثم مصطفى (شيك على بياض) عشان يكتب فيه الرقم الذي يريده …ويجدد تعاقده مع المريخ.

· هيثم قال ليهم تعاقد شنو؟..انا السنة التانية ما كملتها معاكم قعدتها في البيت ..عاوزني اجدد ليكم التعاقد تاني.

· جمال الوالي قال ليه اصلو ما مشكلة ..لو قعدت في البيت نحن ما عندنا مشكلة.

· ولا فارقة معانا.

· نحن بنلقاك وين؟.

· المريخاب ما بتعظوا …الامر بينهم وبين هيثم مصطفى وصل للشكاوي.

· اشتكوه في الاتحاد العام.

· وانتهت حكاية هيثم مصطفى بي درس قاس وجهه البرنس للمريخ ..لكن اظنهم ما فهموا حاجة.

· الموضوع ما وقع ليهم.

· واحمد بدير كل مرة بطلع ويقيف على خشبة المسرح ..وبقول ليهم : (إحنا لحمنا مر اوي).

· لكن ما في زول بفهم.

· جاء تراوري من الهلال.

· عمل فيهم اي حاجة.

· اي حاجة ممكن تخطر بي بالك …تراوري عملها في المريخ.

· يسافر وما يرجع.

· ما في زول بيسألو.

· يطلع من المعسكر.

· ما في زول بيسألو.

· يعمل ليه مشكلة مع لاعب.

· ما في زول بيسألو.

· يقفل تلفونو.

· ما يرد.

· ولا في زول بيسألو.

· واحمد بدير كل مرة بظهر في المسرحية ويقول : (إحنا لحمنا مر اوي).

· اوي ….اوي.

· تراوري …كل مرة يعمل ليهم مشكلة ويطلع منهم بـ (30) الف دولار.

· ويمشي يغيب.

· ولا بلعب.

· اصلو اي لاعب يمشي من الهلال ما بلعب في المريخ اكتر من موسم.

· الموسم الاول بكون (مدفوع) ساكت ..ومحنبك.

· اول ما الزعلة تفك …بتصدم بالواقع المؤلم ..بقول ليهم ما بلعب.

· يقعد يعملها ليهم كلها مشاكل.

· تراوري دخلهم مدرسة.

· دخلهم في قزازة.

· العملوا فيهم ..نجار في خشب ما عملو.

· واللـه نحن عجبنا ليكم.

· تراوري (ادبكم) ادبة شديدة.

· تتخيلوا وصلوا مرحلة يعملوا مؤتمر صحفي لتراوري عشان يعتذر فيه.

· تراوري يعتذر.

· بغشهم.

· بلعب بيهم.

· يعتذر ويسافر.

· ما في زول بشوفو.

· تتخيلوا بعد المؤتمر الصحفي …تراوري قفل تلفونو.

· في اهانة اكتر من دي.

· واحمد بدير بظهر في المسرحية ..وبقول ليهم : (إحنا لحمنا مر اوي).

· لكن ما بفهموا الحاصل.

· ما بعرفوا المسرحية.

· ولا بتقع ليهم.

· ندخل في بكري المدينة.

· بكري المدينة بعد التلاتة مليار جنيه ..معيشهم ليك في (افلام رعب).

· عيشين في (رعب).

· افلام رعب عديل كدا.

· بكري المدينة شال منهم النوم.

· بكري المدينة شغال لخبطة شديدة.

· السكين الكان بشيلها في الهلال خلاها.

· بقى شغال (بونية).

· جاء لي ناس (الكارتية) ..ناس فاروق جبرة.

· متعودة دائما.

· في زول في شندي يا جماعة بضرب ليه حكم بونية.

· ضرب ليه حكم بونية ..وعاوز يمرق منها كمان.

· وفي شندي.

· وقفو ليك (6) مباريات.

· (6) مباريات ..بكري قاعد زيو وزي (ود الجنيد) بتفرج ساكت.

· ود الجنيد فرجتو فيها علم.

· فيها تشجيع ومساندة للمريخ.

· بكري (6) مباريات قاعد ساكت.

· المباراة التى لعبها دخلهم في حص بيص لا اول ولا آخر له.

· عيدوها.

· خلوها.

· لجنة الاستئنافات قالت شنو؟.

· الجماعة بقوا يهضربوا ساكت.

· ما عارفين يقولوا شنو؟.

· مرة يقولوا عبدالعزيز شروني.

· ومرة يقولوا زكي عباس.

· شغالين كدا بس.

· واللـه نحن مباراة المريخ والامل لو عادوها عشرين مرة ..ما بتفرحني قدر الفرحة النحن فيها الآن.

· المريخاب انشغلوا في نفسهم.

· بقوا في رقبتهم.

· بنلعب.

· لا بنلعب.

· ما بنستلم القرار.

· مكتوب في ورقة كراس.

· هضربة كدا بس.

· واحمد بدير كل مرة يطلع ويقول ليك : (احنا لحمنا مر اوي).

· وديل ما بفهموا اي حاجة.

· المشكلة الاكبر من دي ..قضية بكري المدينة وصلت لوزان.

· يعني هناك لا اسامة عطا المنان.

· ولا مجدي ما بنفعوكم.

· ايام قليلة ويصل قرار ايقاف بكري المدينة محلي وقاري.

· وإحنا لحمنا مر اوي.

· الكارثة الاكبر …والتى تثبت النظرية …عمر بخيت ذاتو …عاوز يعمل ليهم مشكلة.

· كما جاء في (الاسياد)…عمر بخيت قالوا بلعب في المريخ بدون خانة.

· زيادة يعني.

· كشفهم اصلو طوالي زايد.

· ليتأكد للجميع ان اي لاعب يأتي من الهلال للمريخ …بعمل مشاكل لا اول ولا اخر ليها.

· ولسه.

· وإحنا لحمنا مر اوي.

· ……….

· ملحوظة : هسع ما تكتروا لينا الكلام …ح تلعبوا وإلّا ما ح تلعبوا؟.

هوامش

· نحن ما فاضيين للجرسة دي.

· ولا عندنا وقت.

· الحبيب مزمل ابوالقاسم كتب امس في عموده ما معناه ان المريخ ما عندو ذنب في موضوع رفع الايقاف عن بكري المدينة ..وان النادي لا يفترض ان يعاقب طالما الاتحاد سمح بمشاركة اللاعب امام الامل.

· وقال مزمل : (أحلى نكتة: سلموا المريخ خطاباً رفعوا به إيقاف بكري المدينة ، ويريدون معاقبته لأنهم أشركوا بكري المدينة!).

· وقال مزمل : (سألت أحد أعضاء اللجنة عن الخطأ الذي اقترفه المريخ بإشراكه لبكري المدينة بعد أن تسلم خطاباً من الاتحاد العام ينص على رفع إيقاف بكري! – تصوروا ماذا كان الرد؟ – قال إن المريخ أخطأ لأنه خاطب الاتحاد طالباً رفع إيقاف بكري!! – هل توجد أي مادة في القواعد العامة تمنع أي نادٍ من تقديم أي طلب للاتحاد؟ – لماذا لم يرفض الاتحاد الطلب إذا كان مخالفاً للقانون؟).

· والرد على منطق مزمل هذا ..ايسر من شراب الموية.

· العزيز مزمل ما قادر يقتنع ان المريخ يتحمل خطأ (الاجراء)…مثلما تحمل فريق الامل.

· يمكن خطأ (حكم مباراة) اجرائي يعيد مباراة …والفريقان يكون ما عندهم اي ذنب.

· اذا كان مزمل ابوالقاسم بشوف ان المريخ الذي اشرك اللاعب واستفاد منه في المباراة وسجل ليه هدف وصنع الاخر ما عندو ذنب في مشاركته ..ماذا يقول مجلس الامل الذى تضرر من مشاركة لاعب موقوف.

· وتضرر الامل الآن من اعادة المباراة رغم من انه ما عندو اي ذنب بعد الاضافات التى حدثت في المريخ والتسجيلات الجديدة.

· انا شايف ان الامل اكثر تضررا لأنه سوف يخسر المباراة المعادة باكثر من هدفين.

· مع ذلك الامل ملتزم بالقانون.

· حتى لو كان الامل منتصرا في المباراة الاولى.

· القانون لازم يأخد مجراه يا عتريس.

· …………..

· عاجل : تعيدوها يعني تعيدوها ..دا كلام نهائي ..وما بنتراجع عنو.

شارك الموضوع :

تعليقات الفيسبوك

تعليقات


5 التعليقات

إنتقل إلى نموذج التعليقات

      1. 1
        jilane

        لحظة كتابتي لي التعليق علي عمودك المساهر فيهو دا كنت بستمع او قول بستمتع بي مزيقة رهيبة لي اغنية رهيبة إسمها الحزن القديم
        والله يا ودعبدالماجد اقول لي نفسي الزول دا مايكتب عن الهلال ولا يكون الهلال وصل مرحلة برشلونه فاز بي كل البطولات ومافاضل ليهم الا سيكافا
        تاني اطمئن طول ما الهلالاب شغالين بينا نحن معناتو الصفر مستمر

        الرد
      2. 2
        محمد عبدالله

        نحن الهلال الصفر الدولي زي ما بتقولو ما بنبدلو بفرق العالم دا كلو دا عشق جميل ونحن مبسوطين ابقو انتو علي سيكافاتكم دي وبرشلونه لايعني شي امام الهلال هل تقدر ان تقول انا ما عايز ابوي عايز فلان اكون ابوي لالوب بلدي ولاتمر برشلونه.

        الرد
      3. 3
        jilane

        انت ماتزعل يا اخوي كدي اقرا المقال الكاتبو محمد عبدالماجد دا ما اخير منو اسمع الحزن القديم ويمشي ينوم
        انتو ممكن تاثروا فيهو لي حد يغير من طريقة تشجيع الهلال عبر متابعة المريخ
        وبعدين اخوي انا ماقلت ليك امشي برشلونه قلت ليك تكون اتخمت بالبطولات زي برشلونه
        تحياتي لي كل حبايبنا الاهلة

        الرد
      4. 4
        صالح احمد صالح

        والله كلكم فارغين … كتاب ومعلقين واداريين ولاعبييين واتحاد وجمهور …..هو ياهو الدافورى دا ولا غيرو !!!!! وينى الكوره … وكمان تقارنو ببرشلونه ….والله برشلونه ما يقبل بيكم تجيبو الكوره من بره ….كلكم جارىن وراء الدولاارات الما معروف مصدرها لى هسع ….

        يلا بلا كلام فارغ

        الرد
      5. 5
        الطيب مدني

        ياخوانا رمضان علي الأبواب وعلي كل من يدخن سجاير أو يسف صعوط أو يشجع المريخ ،،، أهي فرصة الواحد يقلع عن العادات الضارة دي …..ودمتم

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *