ملفوحة مع السمكرة

جاء رمضان…. بخيرو وخريرو…..ما زالت قنواتنا الفضائية تتسابق علي جذب المشاهدين..أكبر كمية من المشاهدين لمصلحة رعاة البرنامج من شركات وبيوتات تجارية والتي تخطط للإعلان والترويج عن نفسها ومنتجاتها وخدماتها…والتي تصر على رعايتها وتشجيعها لكل ماهو غث…تتسابق عليه…ويشترط بعضها أن يكون الراعي الذهبي ” للفارغة والمقدودة”….وبعضهم يشتط في أن يكون الراعي الوحيد والأوحد… وربما يتدخل في تشكيلة طاقم البرنامج ويلمِّح بأن يقوم بتقديم البرنامج فلان أو فلانة….وأن يكون الغناي عِلاّن والغناية عِلاّنه….وربما حتى اللبس والهندام والتسريحة والمكياج…والتطقيم من الخاتم إلى النِعلات…وطالما هم بيدفعوا يصبحوا أصحاب الجلد والراس….تطل علينا كل فترة ترويج لبرنامج أو عدة برامج لقناة من القنوات خلال شهر رمضان….وفي نهاية الترويج كل زول يقول لينا إنتظرونا في شهر رمضان….ما عارفين نحن “الله يقطع طارينا” ننتظرهم هم واللاّ ننتظر الآذان…على المحارسة العلينا نقعد نحارسهم هم كمان…. نحارس وقت السحور…. تشرق الشمش نقعد نحارس فيها ونباريها لمن تغيب نقعد قبال المغرب نحارس في الاذان….وهم دايرينا بعد الفطور نقعد نحارسهم..! ويا ريت لو بقت محارسة شيتن فيها فايدة.

من متابعتي للتراويج….. لقيتهم كلهم شبه بعض…. البرنامج الهنا ياهو الهناك …أغاني وأغاني..أغانينا..غنيوة…. غنيات ….هذا فيما يخص الغنا… أما برامج المنوعات لا جديد… نضم مُعاد مع تغيير في الوجوه…. تقديم من طريقة الترويج، الجواب يكفيك من عنوانو….نفس البرنامج في قناة هو نفسو تحت مسمى تاني ومقدم تاني…. ومزيكا في المقدمة مختلفة…أما محاور الونسة هي نفسها… لا جديد على الإطلاق وما ح يكون في جديد…طالما نحن عندنا ناس مُصرين يكونوا في الإعلام وهم لا يملكون أى شئ غير معارف وأصحاب وأصدقاء!… أما ما يحاكي الكميرا الخفية والتي مباريانا عشرة رمضانات.. برضو لا جديد.. زول يلبد ويخلع زول وداك ينط ودا يقرقر..ويخنقو من رقبتو ويجرو ويقبلو على الكميرا ويقول ليهو عاين هنووووك معاك الكميرا الخفية…..المصيبة سياسة جيب راعي وقدم الداير تقدمو ..عاوز تقدم برنامج مافي مشكلة بس ما عندنا ليك قروش….تقول لهم من ناحية قروش وقررش ما تشيلو هم تب….. عندي زول في الحتة الفلانية ح يرعى البرنامج…ويجي ويقدم برنامجو…ويشيل نصيبو من الرعاية ويدي ناس القناة الباقي..ويتفقوا ويتواعدوا موعدنا رمضان الجاي…إن شاء الله زولي دا ما يشيلوهو بس من الشركة دي….ويقعدِّو لحدي رمضان الجايي يصلوا صلاة الكنكشة …..زولو يكنكش في الوظيفة في الشركة وهو يكنكش في القناة والقناة تكنكش فيهو ونحن نكنكش من المغسة….أما المتلقي داير شنو؟ البينفع معاهو شنو؟ والما بينفع شنو؟… والفكرة المقدمة هي فكرة جديدة؟ …. واللاّ ملفوحة “مع السمكرة”؟….ما مهم!…. المهم خرطة البرامج تتملي ونطلع ربحانين…. يا جماعة يا ناس الرعاية كلكم راعي وكلكم مسعول عن رعيتو… في برامج ومواد بترعوها تخلي الزول يكجن منتجاتكم وحاااات الله !