زواج سوداناس

أسمح زول في يوغندا



شارك الموضوع :

بعض الشعوب والأمم.. ربنا يبتليها بحكام.. يأدبوها.. ويتصرفوا فيها كأنهم ورثوها من أبواتهم.. يقتلوا ويسجنوا ويشردوا ويبهدلوا الدايرين يبهدلوهو ويقربو الدايرين يقربوا.. ولما يزهجوا منو يلحقوهو رفاقتو.. يوغندا في السبعينيات من القرن الفائت.. ربنا بلاها بالرئيس عيدي أمين دادا.. ضخم الجتة زول جهامة بطل ملاكمة.. للوزن الثقيل.. ليوغندا للأعوام من” 1951 إلى 1960 “.. تسع سنوات يلاكم وأي صبي محدساهو نفسو وداير يلاكم عيدي أمين.. يودع أهلو ووالديهو وجناهو.. لأنو أقل شي بيرجع أبكم.. وأعمى وأطرش.. دا بعد ما يمرق من موتة..
عيدي أمين كان مبسوط من نفسو شديد حتى إنو مرة في تصريح رسمي قال إن وجهه أجمل وجه في يوغندا، واستشهد بأمو وزوجاتو.. القاعدات يقولن لو كدي.. أمو دي والداهو والقرد في عين أمو غزال.. أما زوجاتو فهارشات.. يسون شنو مسكينات زول قدر المخزن.. يقولن لو انت سمح.. سمح انت وبسكويت انت..!!!!.. وخاصة طلعت إشاعة إنو مرة قتل واحدة من زوجاتو وقطعها إرباً إرباً.. وختاها في ضهرية العربية.. يكون قبضها بتقطع فيهو وقالت شين يسكو بيهو الشفع!!!.. كما أنه متهم بأنه من أكلة لحوم البشر”سحاري يعني”.. وبعض الشغالين معاهو في البيت قالوا عادي يلقو “نيفة” روسين الناس في التلاجة!!..
استولى على السلطة بانقلاب 1971.. وقعد يبرطع فيها.. ذكروا أن عدد قتلاه في فترة حكمو الاستمرت تسع سنوات وصل إلى مئة الف يوغندي.. طرد الهنود من يوغندا قال الله في المنام قال ليهو “أطردهم يا عيدي إن بقيت داير يوغندا تمشي لي قدام أمرق الهنود ديل منها”.. من الدغش قشّة عينو من النوم طلع قرار بطردهم واداهم مهلة تسعين يوم.. ويشتتوا.. كجن البريطانيين وذكروا أنه كان عندو هودج “شبرية” يتحكر فيها وعندو أربعة بريطانيين بيض يشيلوهو ويحوموا بيهو.. قال البريطانيين مساكين وفقرانين وعندهم “سوء تغذية” ورسل ليهم كمية معتبرة من الموز بالطيارة..
كان إسمو الرسمي البيقولوهو كل ما يجي طاريهو هو: الرئيس الحاج المارشال الدكتور الرئيس الأبدي ليوغندا عيدي أمين داد.. وقع عيدي أمين في حب وزيرة خارجيته الأميرة إليزابيث باجايا وحاول يصلها علا هي ما أدتو وشي.. قام لما زهج منها رفتها وقال ما عندها أدب وقبضوها في مراحيض المطار مع واحد بريطاني.. شردت من السجن وقادت المعارضة من تنزانيا..
عرض عيدي أمين علي جوليس نايريري رئيس تنزانيا والكانت المعارضة العسكرية تنطلق من أراضيها عرض عليهو انهم يتقابلو وجه لوجه في حلبة الملاكمة ويتلاكمو.. لو نايريري فاز عيدي أمين يستقيل.. وهو عارف إنو نايريري ما بياخد معاهو ربع بُنية.. فكر عيدي أمين مرة في أن يلاكم كلاي في ليبيا على أن يكون الحكم القذافي!!!!.. كما وان من ضمن مبادراته في نزع السلاح العالمي .. قال ينزعو السلاح التقليدي من كل الدول لكن كل دولة يسلحوها بقنابل نووية عشان يخافوا من بعض.. غايتو الله يرحمو كان ناوي يودي العالم في ستين داهية.!!!!!

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *