زواج سوداناس

ياناس (ويكيليكس) شفتو (بنطلون) طه..؟



شارك الموضوع :

*الدنيا قايمة وقاعدة الأيامات دي.
*الدنيا قايمة عشان موقع (ويكيليكس) سرب ليهو وثائق خطيرة جداً وفكاها في النت.
*والدنيا برضو قاعدة عشان (بنطلون طه سليمان).!
*لكن الغريب ناس (ويكيليكس) جابوا سيرة الوثائق وماجابوا سيرة (البنطلون).!
*الناس ديل بتاعين (خيار وفقوس).
*معقولة يكونوا ماشافوا (بنطلون طه)..؟
*غايتو أنا شخصياً أول مرة أشوف لي بنطلون (نص كم).!
*زمان…الناس كلها كانت بتعرف (القميص نص الكم) وبس.!
*هسي الموضوع اتطور وبقى (قميص) و(بنطلون).!
*لكن برضو الحاجة الماعارفاها الناس دي كلها..إنو طه سليمان شخصياً بيكون أكتر زول مبسوط من (الجوطة) دي.
*الزول دا بيلبس الحاجات دي مخصوووووص عشان الناس تتكلم عنو.
*اي والله.
*إنتو قايلنو يعني (بلبس) ساكت..؟
*واحد صاحبي قال لي: (والله طه الناس ماريحتو…هسي بيكون زعلان زعل شديد خلاص).
*ضحكت وقلت ليهو: (عليّ الطلاق السعادة البيكون عايش فيها طه مابكون عايش فيها أي زول تاني).
شربكة:
*ياناس (ويكيليكس)…انتو شكلكم ناس (وثائق) ساكت وماناس (بنطلونات).!
*اللهم اني صايم.
شربكة ونص:
*بكرة حااحكي ليكم عن الفنان مصطفى السني.
*الزول دا بدون اغاني ابو داؤود بيكون عامل زي (المكيف من غير موتور).
شربكة ونص وخمسة:
*غايتو…طولوا بالكم معاي السنة دي…واشربوا ليكم كمية من (الآبري)…العطش (جاييكم…جاييكم).!

شارك الموضوع :

تعليقات الفيسبوك

تعليقات


1 التعليقات

      1. 1
        ابن إدريس

        ههههههههههههه
        الله يجازي أبليسك يا دندش ..
        يا زول رمضان كيف معاك … هههههه

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *