زواج سوداناس

مروءة ..!!


شارك الموضوع :

خير يالحاجة ..
مالك ضاربة للروراى..؟
تعال يا وليدى ..إنت منو..؟
معاك الناجى ودالتاى..
حبابو الناجى ودالتاى..
تعال داخل..تعال بى جاى..
أمك في الحساب بتى..
جدك خالى ودأب راى..
بالليل المطيرة الجات ..
حمتنى الغمدة يا وليدى..
جاتنى الموية جوه البيت…
لقتنى براى..
ود بتى الوحيد سافر ..
وليداتك كُتار حبوبة ..
دايرة شنو..؟
تسلم ليّا ياكا جناى..
خش لى جوة شوف البيت..
أمرق لى هديماتى لى برة..
شنطة جدك العشاى..
الكرتونة فى الشباك..
فيها البُن وحب الشاى..
شوف البنبر المكسور والهباب ..
جنبو كدنكة والكوكاب ..
فتش كورة الويكاب..
حبل السعف خاتاهو للكراب..
عندى صفيحة مقرونة..
فيها الجَبَنة ..مصفى البُن والقلاى..
علبة صغيرة فيها حبوب..
خاتم فضة راح منى..
سمح يُمة ..
بمرق ليك حويجاتك..
بربط ليك سـخيلاتك..
بحلب ليك غـنيماتك..
دايرك أسى تمشى معاى..
لى أُمى …
براك ماتقعدى حبوبة..
لغاية ود بنيتك إجى..
تعالى معاهو لى بيتك..
يغتيك الله يا وليدى..
يديك الكريم مولاى..
بت الحلال معاها المال..
قادر ربى هو العطاى..
بدى الناس كل الناس مو نساى..
يرجع ودبتى شايل الخير ..
أشوفوا عريس ..يحججنى..
يعَمِرخلوة العشاي..
يصبح قبلة للعشمان ..
قادر ربى هو العطاى..
قادر ربى مو نساى..

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *