زواج سوداناس

من صفحة الفيس بوك


شارك الموضوع :

بعض الكتابات في صفحة الباب البجيب الريح بالفيس بوك:
أمرأة نقنقاقة من نوع آخر:
قال ليها “أديني موية من الزير”… ماشة علي الزير وتنقنق وتبرطم “أنا يزرزرني نكير إن شاء الله.. نكير دا.. شفتوهو؟ يزرزرني”!
جابت الموية مدتها ليهو قبال تقعد وهو يتناول في الكوز قال ليها: “سوي لي شاي”.. ماشة علي التكل وتنقنق وتبرطم: “أنا إن شاء الله يشوشوني في جهنب.. جهنب دي شفتوها؟ يشوشوني فيها”.. جابت الشاي ختتو فوق التربيزة قال لها: “اكوي لي الجلابية”.. مشت تكوي الجلابية وتبرطم: “أنا إن شاء الله يكوكوني في نص قنقوني؟؟ قنقوني دا شفتهو؟ يكوكوني فيهو”.. كوت الجلابية وجات قال لها: “كوسي لي النعلات”.. مشت تبحت تحت العناقريب كايسة للنعلات وتنقنق وتبرطم: “أنا إن شاء الله يكوسوني بالبوليص .. البوليص دا شفتوهو؟ يكوسوني بيهو..وما أتلقي”!
الحب يوم الجمعة:
من دغش الرحمن تخليهو نايم وتسوقي شفعك وتمشو تقيلو عند ناس ابوكي.. وتخليهو يتجدّع براهو في البيت…!!!!! وفي بيت ناس ابوكي تصبني ليهو أكل.. لانو ح يجي لاحقكم يتغدا!!!!
…….
وهي غائبة وقف أمام تسريحتها.. لقى صندوق وفتحو لقى عدة مكياج.. أصفر أخضر وأحمر وبني ولبني ومجموعة فرش… عاين لهن: “لا إله إلا الله محمد رسول الله. علي بي جملة الأيمان.. أنا معرّس لي نقاش”!!!!!!
فاتت علي ود تكتوك:
(إذا رأيت رجلا يمشي بمحاذاة امرأة يضحك معها وهي تضحك معه..اعلم انها ليست زوجته)…. (وإذا رأيت رجلا يمشي قدام امرأة بينهما خمسة متر وكل مرة يقيف ويتلفت يعاين لها.. فاعلم أنها زوجته.. وغالبا يكونوا ماشين الدكتور)
عرسان في الميدان
قيض الله لي أن أسكن في شارع به بعض الشقق المفروشة للعرسان
يطلعوا جوز جوز………
يمشوا بمحاذاة بعض… كاضمين.. العروس مدنقرة.. والعريس مطيّر عيونو كلما يلاقيهو زول يطهّم يعاين ليهو..
صادفت أكتر من خمسة أجواز.. العروس نفس التوب اللحمر البيرقش والعريس جلابية جدييييييدة تفرطق.. فرطق فرطق فرطق.. وشبشب ابو نخرة ونفس الحوار، يجو في لفة الشارع يلف العريس في الأول.. العروس تقول ليهو: “نلف بي جاي؟”..يقول ليها “أيوا”..وهم يكونو لفوا وانتهوا!!!!!!
سحلبة البصل:
صديقة الصفحة “لينا سليمان” رسلت النكتة دي:
قالت: إنه من تجار البصل بمنطفة الجعليين.
خسر خساره كبيره في البصل نزل البحر يستحمى وقال: نحن حرم رجال، الخسارة مابتهمنا.. نحن أسود الحارة….
.. وهو بستحمى ويغني ويشكر في نفسو: “المال ما بهمو إن كتر وإن راح..”
الناس قالوا ليهو: يا زول هوي.. إنت بتستحمى بالموبايل نسيت الصابونة في جيبك..
تقرير لجنة الرجالة في الصفحة:
تعتقد اللجنة انه فعلا راجل.. ومن رجالتو وراهم إنو حتى الموبايل ما بيهمو وممكن يستحمى ويدعّك بيهو.. هييييع!!!!!!…

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *