زواج سوداناس

نضم مذيعين



شارك الموضوع :

راديو السيارة.. علي إذاعة إف إم وااااحدة.. من بحري للصحافة تقوم بينا العربية.. والإذاعة دي شغالة.. غناء شرقي.. شي مصري وشي شامي (لبناني وسوري) وشي عراقي.. وبعد شوية لما كملو الغنا العربي الحيلتهم جابو لينا غنا غربي.. شي إنجليزي وشي فرنسي.. وشي لغة قدر ما رخيت أضاني أقبض منها كلمة عشان اقدر اوترها ما قدرت.. سالت أحد الشباب االعالمين في الإذاعات الإف إمات.. عن عددن.. قال لي “قدر.. طبليات تحويل الرصيد الفي الخراتيم “الخرتوم- بحري أمدرمان” وضواحيها.. !! لحدي ما نزلت والزغاريت والكواريك اللات اللغاني دي في أضاني.. السواق مبسوط يهز في راسو.. ومرة مرة يمرق راسو بالشباك ويهرج مع سواق تاني “انتو العلمكم السواقة منو؟.. عالم ما تتحضر أصلو”.. وشوية واحد سواق تاني يمد راسو لسواق عربيتنا ويهرج فيهو “انتو العلمكم السواقة منو؟.. عالم ما تتحضر كلو كلو”.. أيقنت أن الشعب السوداني كلو واحد فيهو بيعتبر نفسو متحضر والباقين ربش ساكت.. ولما يقع في غلطة تكشف عن تخلفو يطنش ويعمل نفسو ما سامع ويركّب سماعات اضان الحامل طرشا!!!.

الأستاذ/ محمد يوسف.. شاب مقدم برامج.. في الإذاعات الاف ام.. وكان مقدم برامج في احدى القنوات.. يمتلك محمد يوسف صوت إذاعي مميز ووجه تلفزيوني أميز.. يتحدث بلهجة ملخوطة باللهجة الشامية.. أها لهجتو دي الجابت ليهو الهواء.. كيف ينضم بالشامي؟.. طاردتو أقلام.. ونضم.. يكون كاتب أو صحفي.. كتب رايو فيهو وكان راي سلبي.. ودا من حقو.. لكن الحمد لله عندنا ناس بس ما تديهم طرف الخيط.. ويكونو أصلا ما عندهم حاجة.. وفيهم يكونو ما لاحظو لي لهجتو.. حتى لو لاحظوها يكون كانو متصالحين معاها.. لكن عاوزين يركبو الموجة مع الجماعة.. واهو موضوع بدل ما يقعدو يتلفتو وكايسين لمواضيع.. القناة الفضائية التي كان من ضمن طاقمها.. أقول جاد إنها خسارة للقناة أن يغيب وجهه عن شاشتها.. لو كان السبب لهجتو.. التي لا تستطيع أن تميزها.. إلا تلبد ليهو.. وتقعد تلقط في النضم كلمة كلمة. وتلملم الكلمات دي وتختهن في قفة.. في نفس القناة.. ما لبدت صدفة واكتر من مرة إحدى مقدمات البرامج كانت تصرخ مبسوطة (وااااااااااااااو).. ومرات بلا غرض وبلا دهشة تتاورها (وااااااااو) وتقولها.. و(واااااو) دي كانت في رمضان أريتا كان كانت في الفطر.. علما بأن (واااااو) دي لفظة اندهاشة أجنبية مية المية.. يعني ما عربية.. ومحمد يوسف مسكين بتكلم لغة عربية بلهجة مختلفة القيامة قامت.. (والجنا دا سكتوهو…. كضموهو).. اعتقد لو كان هناك مأخذ علي طريقة نطقو.. يدوهو دورة تدريبية..خمسطاشر يوم بس.. ح يلقوهو في نص اللستديو متحقب عكازو، ويكورك للجماعة “يا جنا ها.. انقرع.. والله حسي اعكلك بي كراعي اشنقلك علي قفاك”.. لو تابعنا طريقة تقديم بعض مقدمي البرامج.. مابتلقو غير شوية ديل كويسين اما الباقين منشفين ريق (الجيم).. والـ (سين) ينقطوها ويلقبوها (ثاء) وهم ماشين في مشيهم.. هذا لا ينفي أن هناك مقدمي برامج ممتازين.. وطالما رضيتو إنو يعمل معاكم كمقدم برامج حاولو طورو ملكاتو!!

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *