زواج سوداناس

بنحب من بلدنا



شارك الموضوع :

يبدو انني ساضيف أصدقاء جدد الى طريقي الصباحي ..فقد لاحظت منذ مدة قصيرة ان هناك زوجان يسيران معي باكرا في ذات الشارع يوميا ..ما يميز هذين الزوجين ..هو انهما عبارة عن خليط بين الشرق والغرب فالرجل سوداني ..داكن البشرة… والمرأة خواجية بيضاء فاقع لونها تسر الناظرين … صرت التقيهما كل صباح عند محاذاتي بيت المستشار ..يسيران وهما يتحدثان كعصفورين صغيرين غير ابهين… بالنظرات المستنكرة للامين (صاحب البقالة الفي الناصية ) ..فلا شك ان الامين يرى ان هذا السوداني كامل الدسم ينتقص من رجولته عند سيره جنبا الى جنب مع زوجته ..لا (وكمان جابت ليها ونسة دقاقة)….

اليوم رأيتهما وهما يقفان في انتظار الحافلة …. عندما مررت بهما ..كانت الزوجة تلتقط شيئا من وجه زوجها بطرف اصبعها وهي تبتسم وهو يبادلها الضحك والابتسام ..هذه الحركة التلقائية ..أثارت موجة من الهلع بين المنتظرين ..فاتسعت العيون دهشة ..وتوارت الابتسامات وتوتر الجو فجاة … وانا اتأمل هذا المنظر قلت لنفسي …هل ترى لو كانت سودانية ..كان سيكون هذا الزوج معها بذات الاريحية هذه؟ ؟ أم ان لكل مقام مقال ولكل زوجة معاملة خاصة حسب لون الجواز؟؟..هل يغير السوداني جلده عند الزواج باجنبية؟؟؟ ..فيدفع بكل موروثاته ثمنا لعبور حاجز اللغة والمفاهيم ؟؟ ..كل التقاليد التي يلتزم بها الرجل السوداني عند زواجه باحدى بنات بلده..تصير هباء منثورا ..عند عزمه الزواج باجنبية …فيصير منفتحا ..واسع الصدر ..بل يتقبل مداعبتها علنا له امام أهله ..وذات الأهل الذين ينعتونك بالخفة والطيارة وانت تبدين قلقا خفيفا على زوجك ..هم نفسهم من يتهيون اعجابا بالخواجية التي تضاحك زوجها وتداعبه (عيني عينك ) بدون وضع اعتبار لتواجدهم ….
في المانيا التقيت مجموعة من الشباب السودانيين المتزوجين من المانيات ..كنت دائما ما ادخل في نقاشات حادة معهم ..بتساؤلي عمن سيتزوج السودانيات اذا كانوا هم يتزوجون الخواجيات؟؟؟ ..كانت ردودهم متباينة ..ولكن لفت نظري قول احدهم (السودانية زي شوال الملح ..دايراك تشيلها من هنا ..وتختها هنا …الالمانية متحركة لوحدها ..شوفي انا شغال في برلين وزوجتي في ميونيخ ..نتلاقى نهاية الاسبوع ..ياتو سودانية بتعمل كدا؟)..قلت له (كن صادقا مع نفسك ..لو سودانية لما سمحت لها بالعمل بعيدا عنك ..ولو خرجت عن طوعك واصرت على العمل بعيدا…تلفون صغير لأصغر اخوتها ليعيدها الى رشدها بطاعتك والجلوس كما تقول كشوال الملح ..اما الخواجية فلا تستطيع لا انت ولا جميع اهلك اثناءها عما تريد فعله ..فسيقف امامك قانون بلادها وسطوته قبل كل شئ )…كان من الممكن ان احترم خياره أذا قال لي انه احبها او وجد شيئا ما يشده اليها ولكن المني حقا ان ينتقص من قدر اخوات له …تحاصرهن البيئة والتقاليد…. وبدلا عن ان يتفهمهن ابناء بلادهم .يكونون هم اول من يلقي الاحجار عليهن…
لست ضد الزواج من اجنبيات ..بل العكس انا أعتقد بان ادخال جينات بعيدة سيحسن الموروث الجيني ويضفي حيوية على القادمين للحياة ..وكذلك ستضيف معارف وخبرات بلاد اخرى ..فاصل الحياة ان تتعارف الشعوب وتتالف…ولكني ضد ان تروج سلبا ضد بنات بلدك … فزواجك من السودانية ايا كانت قبيلتها يجعلك بكل أريحية تدعو من تشاء الى بيتك وانت تعلم انها (زولة حارة وضيوف)..فهي لن تتذمر من كثرتهم …وستلقاهم بوجه طلق…زواجك من السودانية سيجعل اهلك ياتون لزيارتك غير متحسسين ولا متخذي مواقف .فالبيت بيتهم …….واخيرا وليس اخرا بزواجك من السودانية ستشجع الصناعة الوطنية وتغني (بنحب من بلدنا مابرة البلد..سودانية تهوى عاشق ود بلد)..وصباحكم الف خير وعافية .

د. ناهد قرناص

شارك الموضوع :

تعليقات الفيسبوك

تعليقات


9 التعليقات

إنتقل إلى نموذج التعليقات

      1. 1
        sudanone

        نحن غايتو اطورطنا للطيش متزوجين سودانيات .. لان السودانية مهما اتعلمت واشتغلت برضو حركتها ذي شوال الملح!! واتكالية على الراجل في اي شئ ما عندها اي شخصية مستقلة الا النادر من النساء ! وهذا ليس من صفات المرأة ولكن بسبب القيود والتقاليد ، وليس الدين أو القوانين !
        ورغم أني لست من مشجعي الزواج من اجنبية ، ولكن التجارب برهنت أن السودانيين المتزوجين باجنبيات اغلبهم مبسوط من زوجته واولاده خاصة اذا كان عايش في بلد الزوجة..

        الرد
      2. 2
        لون المنقه

        استاذه ناهد مساك سعيد
        انتم ي معشر الرجال من.صنع شوال الملح
        نحن.في مجتمع ذكوري بحت
        سيطرت الرجل تهيمن.علي كل صغيره وكبيره
        يلا (خُمو وصُرو)

        الرد
      3. 3
        الدبيب

        والله كثير من السودانيين يعط في أصابعه ليل ونهارا من زواجه من غير سودانية

        الرد
      4. 4
        بخيت

        يا الاخ sudanone انت ظلمت حق النساء السودانيات ما تشمل كل النساء في أي مجتمع في الكون دا بكون في ناس كويسين وناس ما كويسين بس نقول ربنا يصلح أمورنا

        الرد
      5. 5
        Abukhalid

        التحيه لكم جميعا ( المراه خواجيه بيضاء فاقع لونها تسر الناظرين !!!!!! (الحمد لله سودانياتنا بخير و فيهم جميع الصفات الطيبه
        و الخصال الحميده و فاقع لونها تسر الناظرين هذه جزء من اللآيه رقم 69 سوره البقره في و صف البقره ما لونها (بقره صفراء فاقع لونها تسر الناظرين – وهنا المعنى اختلف تمام و فاقع لونها معظم التفاسير قالوا سوداء شديده السواد – والله اعلم

        الرد
      6. 6
        المنتصر

        اعتقد ان اللوم علي الرجل…فهو الذي يقيد حركه المرأه ويجعلها مثل (شوال الملح)…لو ان الرجل اعطي زوجته انطباعا بانه يثق في حسن تصرفها ومقدرتها علي اداره الامور حتي دون وجوده لما اعتمدت عليه في كل صغيره وكبيره.

        الرد
      7. 7
        عطبراوي

        Sudanone يا زول أحمد لله مليون مرة علي هذه النعمة انا قاعد في بلادهم دي منذ أمد بعيد و الحمد لله متزوج سودانية
        يا أخي ديل قاموا و قعدوا و قالو ندي المرأة حقوقها و هسع الحقوق دي فاقت المنطق و الأعراف و التقاليد لمن جردوا رجالهم من الرجولة
        هسع عندهم قانون جديد اضافوهو لحقوق المرأة و هو …. الزوجة لو ما عندها مزاج و عاشرها زوجها يعتبر اغتصاب … و دي أصبحت أداة في يد المرأة لتدخل زوجها السجن متي ما ارادت
        الخواجات ديل لقيتم ناس وهم ساي و ما عندهم موضوع
        غايتو ألما أتزوج سودانية دقس و المتزوجون من الخواجات ديل معظمهم جاتم نفسيات

        الرد
      8. 8
        ود مكسر

        يا شبابنا

        اسألو مجرب ولا تسأل طبيب

        والله تعرس غير سودانية والله تشرب ماتروي

        مايغرك الجمال ، والله السودانيات ديل فيهم جمال يمين بالله ولا امريكا الاتينيه بس ساترات نفسهن

        امشو ادقشو البيوت دي والله فيها بنات حور ، وكمان وصيه خاااااصه ،،، امشو معرض الزهور السنوي في قاعه الصداقة عشان تعرفو انو النعمه تحت رجولكم وانتو رافسين 😉

        الرد
      9. 9
        فيصل احمد

        سمحه وسمرية محبوبتي ولفتاتها غزاله خضرة ومسقيه جنب النيل مشتوله الناله انا مدرك تماما ان الاخوه المتزوجون من اجنبيات قدمو تنازلات كبيرة جدا ماكانو ليقدموها في حال الزواج من السودانيه شوالات الملح هن من انجبننا وكبرننا القائلين المراة السودانيه زي شوال الملح عليه تقييم تجربة والدته وتقييمها اذا كانت ناجحه ام فاشله وانا اعتقد انها ناجحه جدا طالما استطاعت تصنع منك رجلا رغم كل المتاريس والحواجز التي تقف امامها من عادات وتقاليد وتسلط الرجل الشرق اوسطي احي نضال شوالات الملح من اجل خلق واقع اجمل لنا رغم كل ما ذكر

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *