زواج سوداناس

المطار السري.. حد طاير؟



شارك الموضوع :

* على عهد الرئيس الراحل جمال عبد الناصر شرعت الحكومة المصرية في إنشاء مطار (سري) لاستخدامه في ضرب العدو الصهيوني، وقصدت إخفاءه عن عيون الناس، لكن أمره ذاع وانتشر، حتى أصبح (كماسرة) البصات يصيحون عند وصولهم إليه قائلين: (المطار السري.. حد نازل)؟

* تذكرت تلك القصة عندما قرأت خبراً مثيراً، نشرته صحيفة هلالية بالعنوان العريض أمس، وحمل عبارة (الكاف يرشح مازيمبي والهلال لنهائي دوري الأبطال )!

* تحدثت الصحيفة عن تقرير (سري)، تم توزيعه على أعضاء المكتب التنفيذي ورؤساء لجان الاتحاد الإفريقي لكرة القدم، وتم فيه ترشيح مازيمبي للفوز بلقب دوري الأبطال بنسبة (40%)، يليه الهلال بنسبة (25%)، ثم اتحاد العاصمة بنسبة (20%)، ثم المريخ بنسبة (15%)!

* طيب فين ترشيحات المغرب التطواني يا ناس المطار السري، أقصد يا ناس التقرير السري!

* ألا يمتلك التطواني فرصة لبلوغ نصف نهائي البطولة والمنافسة على لقبها، فلماذا تجاهله المطار السري.. أقصد التقرير السري؟

* لماذا انحصرت نسبة التطواني في صفر في المائة؟ هل يعلم من أعدوا التقرير الغيب ليجزموا بأن الفريق المغربي لن يصعد إلى نصف النهائي، ولن ينافس على المطار السري.. أقصد اللقب القاري؟

* جماعة المطار السري ديل راجمين بالغيب؟ أم أن ترشيحاتهم تشرف عليها ست الودع؟

* (ست الودع أرمي الودع لي كشكشي.. كدة كشكشي.. شوفويهو لي كان فيهو شيء أي شيء.. ما تختشي)!!

* (الليلة الليلة يا وصيف المريخ أخوك.. أعمل حسابك لا يخدروك.. يقولوا ليك متأهل ويبهدلوك.. لملم كرامتك وزح بعيد لا ينشلوك.. ولي كشكشي)!!

* قال ليك يا كابو ست الودع رمت الودع داخل مقر الكاف.. وقالت لي حياتو وشطة: (ود الصُرة يمكن يطلع برة.. والويحيد.. الكاس منو برة وبعيد.. والمربوع.. احتمال يطير بعد أسبوع)!

* زمان هدى سلطان غنت (يا ضاربين الودع.. هو الودع قال أيه.. خصام حبيبي دلع.. وللا خصامو أيه؟ ليه ليه خصامو ليه.. ومن الودع أعرفولي.. هو فين أراضيه)؟

* يا كابو أرمي الودع وورينا خصام الوصيف للكؤوس الخارجية دلع.. وللا أسبابو أيه؟

* وبعدين يا ناس المطار السري.. كيف فريقين لسه ما تأهلوا لنصف النهائي.. الكاف يرشحهم للفوز بالكأس؟

* مش احتمال الهلال أو مازيمبي يمقلبوا الكاف وتقريرو.. و(يركبوا التونسية) من المطار السري؟

* خلوا بالكم إنو المطار السري الأصلي أصلاً موجود في (مصر)!

* الإسكندرية دي ذاتها احتمال يكون فيها مطار سري!

* المطار بي وين يا كابو؟

* مش احتمال جحوح التطواني يسويها في مازيمبي تاني.. والوصيف يقع قدام الأسكندراني؟

* الشفقة تطير يا ناس المطار السري!!

* طالما مطار الكاف ده.. أقصد تقرير الكاف ده سري.. انتو عرفتوهو كيف؟

* المريخ والاتحاد صعدا لنصف نهائي دوري الأبطال قبل شهر من الآن.. وناس المطار السري شايفين إنو الفريقين الأتأهلوا أحق من الما اتأهلوا بالطيران.. شفتوا السرية كيف؟

* هسه لو الهلال طار.. أو مازيمبي احتار مع جحوح التطواني الحار.. ناس المطار السري ديل يودوا وشهم وين من أعضاء المكتب التنفيذي ورؤساء لجان الكاف؟

* الطريف في الأمر أن من أعدوا شتلة المطار السري لا يعلمون أن رؤساء لجان الكاف هم نفسهم أعضاء المكتب التنفيذي للكاف!

* أي لجنة مساعدة للكاف يرأسها عضو في المكتب التنفيذي للكاف!

* مجدي شمس الدين مثلاً، عضو في المكتب التنفيذي للكاف، ويرأس لجنة الحكام في الكاف!

* بي كلامكم ده معناها مجدي حا يزور المطار السري.. أقصد حا يسلتم التقرير السري مرتين!

* مرة بصفته عضو في المكتب التنفيذي للكاف، ومرة بصفته رئيس للجنة الحكام في الكاف!

* مفروض الزول لما يشتل ليهو شتلة يجيب ليها بذرة محسنة، ويرويها كويس عشان ما تموت ليهو في يدو!

* المطار السري أبعد التطواني!

* ناس الكاف ديل باين عليهم انتهوا من التحكيم والتنظيم، ودخلوا مرحلة التنجيم!

* ألحق يا كابو.. الجماعة الما شافوا المطار الحقيقي.. مسكوا في المطار السري!

* بقوا ناس نهائي ساااي!

* نقترح تكوين لجنة للاحتفال بكأس البطولة استناداً إلى التقرير السري!

* الاحتفال والوهمي ممكن يتعمل في المطار السري.. وتغني فيهو (أسرار) بابكر!

* ألحق يا سلك ريحة المطار (السري) فاحت شديد!

* المطار السري.. حد طاير؟؟

آخر الحقائق

* يا كابو المطار السري ده طيرانو علني.. وللا شغال (لا من شاف لا من دري)؟

* ما بعيد تأشيرات المطار السري.. تكون مطبوعة بالحبر السري!

* احتمال كبير الهلال ده يتأهل سراً.. وزول يسمع بيهو مافي!!

* خبر سري للغاية: كورة سماح والوصيف ستلعب عصراً.. وسراً!!

* جمهور ذاتو ما فيها.. في سرية يا أخوانا أكتر من كدة؟

* عنوان المباراة المقبلة للوصايفة (أسرار وأصفار)!

* المتضرر الوحيد من المباراة السرية دي هي قناة (بي إن سبورت)!

* نقترح أن يتم نقل مباراة سموحة والهلال على قناة النيلين، كي تكتمل عناصر السرية!

* أصلو النيلين دي معظم مبارياتها سرية!

* طوالي شاشتها (محجَّبة)!

* أكبر ميزة في قناة النيلين أنها تنشط القدرة على التخمين.. عند المشاهدين!

* يا ربي الكورة كم كم؟؟ يا الله المغلوب درن.. والفائز فرط.. ولا عزز؟

* كورة المطار السري أصلو ما عندها حل غير قناة النيلين!

* نحن كمان كورة قناة النيلين ما بنعرفها يا كابو؟

* الحكم يصفر تييييت.. طوالي مقدم الأستوديو التحليلي يعتذر عن انقطاع الصورة من المصدر!

* المصدر المرة دي ذااااتو سري!

* الغريب إنو محللي قناة النيلين متخصصين في تحليل المباريات بدون ما يشوفوها!

* عشان كدة الكورة دي محمداهم محمداهم!!

* ما في أي زول يسألنا عن تردد القناة الناقلة!

* التردد سري.. والكاميرات ذاتها مدسوسة في أماكن (غميسة) داخل الإستاد!!

* تكتروا تقللوا ننقلها ليكم في قناة (السودان دراما)!

* أصلوا الهلالاب ديل جنهم درامات!

* تعرف يا كابو.. ناس الدراما ديل طوالي بشتكوا من وجود أزمة في التأليف والكتابة!

* حقوا يتابعوا جرايد الهلال، ويركزوا علي جريدة الأسرار.. أقصد الأصفار.. أقصد الأسياد!

* جريدة شاطرة في الدرامات… ودراماتها دايماً سرية!

* نرشح (السر) محمد علي لمراقبة مباراة سموحة وسرورة!

* ما في زول يسألنا الكورة حا تبدأ الساعة كم..لأنو التوقيت سري!

* ألحق يا كابو.. مباراة سموحة الما مربوحة بقت زي الطيارة الماليزية!

* لذلك نقترح إسناد إدارتها لطاقم تحكيم يقوده الشيخ بلة الغائب!

* علمنا أن كاتب عمود (كتمان) رياضي سيشهد المباراة السرية في الأسكندرية!

* القصة دي كتمت شديد يا سلك!

* خبر عاجل: احتفال الوصيف باللقب السري سيشرف عليه (السر) قدور!!

* يقال إن صحيفة الأسياد ستصدر يوم المباراة سراً.. وتوزع سراً.. وتقرأ سراً!!

* الكورة ذاتها قالوا احتمال تتلعب (تحت.. تحت)!

* أغنية الهلالاب المفضلة هذه الأيام: قالوا لي (سرو) وما قدرت أحلو!

* وفي عيونك (سر) كتمتو!

* ويا (سر) مكتوم في جوف (الكاف).. أقصد في جوف أصداف!!

* يا كابو غايتو لو عايز تحضر التتويج وتبارك للوصايفة إلا تتنقب!!

* ناس الحزب الشيوعي قالوا إنهم تركوا العمل السري.. والهلالاب نزلوا تحت الأرض!

* خبر الأمس: المطار السري.. حد طاير؟؟

* آخر خبر: (………..)!

* معليش يا جماعة.. الليلة (آخر خبر) مكتوبة بالحبر السري!!

!

شارك الموضوع :

تعليقات الفيسبوك

تعليقات


2 التعليقات

      1. 1
        خالد عيسى

        ما عندك موضوع يا مزمز ، عاوز تقلد عمود محمد عبد الماجد (دق الدلجه) ؟ مااا بتلحقو

        الرد
      2. 2
        abdu

        محمد عبد الماجد بكتب وراسو لافى لانو داقى الدلجة….وما غريبة دى لانو فريقو هلال زرقان داقى الدلجة ليهو 85 سنة لحدى الان راسو لافى…ان شاء الله الاتنين رسينهم يلفن ويلفن حتى يطاقشو مع بعض وبعد داك هلال تمشى حته وزرقان تمشى حته.

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *