زواج سوداناس

بوليس سري



شارك الموضوع :

> امس كتب الحبيب جداً مزمل عن التقرير السري
> واستصحب معاهو المطار السري
> طبعاً التقرير السري هو الشتله التي شتلها جنانية الزمن ده
> الجناينية الشغالين في جنينتنا
> جنينتنا البتدينا الثمار سنوياً
> آخر ثمارها اليانعه كانت منقة المدينه
> منقه قدر ده
> قطعه وااااحده
> تخلط منها عصير بالطريقه التنزانيه
> وعصير بالطريقه الانجوليه
> ولما عملنا منها عصير منقه بالطريقه التونسيه
> الجناينيه يا دوبك عرفو قيمة المنقه
> ولون المنقه
> والشايل المنقه
> لكن لما قطعنا من شرائح المانجو علي الطريقه الجزائريه
> اشكال وانواع
> منقه العلمه الطوال طوال
> ومنقة الوفاق المدورات مدورات
> ومنقة الاتحاد كلو شريحتين سوا
> لما قطعنا منها شرائح على الطريقه الجزائريه
> الجناينيه الحسد كتلهم
> ياخ فيهم جنايني بتاع شتل
> بقي يزرع الشتله
> يا دوبك عمرها ساعه وطولها سنتمرات
> يجيب سلمو وجبادتو راجي الثمار
> خايف مننا نشيل ثمرها
> وما ناقش اننا ما بنقطع ثمرة شجره
> بنرجاها تنجض في امها
> وبوردولوب تقع براااااها
> اسي منقة المدينه دحين ما نجضت في امها وبوردلوب براها وقعت !!!!
> المهم
> تحدث ميزو عن شتله ترشيح الهلال ومازيمبي للبطوله
> والغريبه الاتنين لي اسي ما دخلو المربع الذهبي
> حايمين بي بره زي كلاب الجزاره
> وكلب الجزاره تلقاهو حايم بره الجزاره وقايل روحو جوه الجزاره
> كان كسروا لحمه يقول ليهو
> كان قطعوا لحمه يهز ضنبو
> كان كومو كمونيه يلحس شنبو
> ويكمل لحم الجزاره وهو واقف قايل روحو جوه الجزاره
> ومسكين ما ليهو في الطيب نصيب
> المهم
> التقرير قالوا سري
> تخيلوا تقرير سري هم عارفنو
> سري للغايه خلي بالك
> قصة سري دي ذكرتني واحد زمان
> شغال في المباحث
> الوكت داك المباحث بسموها البوليس السري
> قاموا نقلوهو الدويم
> عشان مافي زول بعرفو من ناس الدويم
> وبي كده يقدر يشتغل صاح
> المهم صاحبنا نفذ النقليه
> مشي واجر ليهو بيت ورحل الاولاد
> في باب الشارع علق لافته كتب عليها
> عبد الله كمال بوليس سري
> الدويم كلها عرفتو بتاع مباحث
> تقريهم السري ده يا مزمل زي البوليس السري بتاع الدويم خلي بالك
> ايها الناس
> خبر الشوم خبر الروم لو اتناقلنو الحروم
> ببقى خبر شوم ما سري
> وخبر روم واضح جدا
> اقول ليك خبر سري يا مزمل؟؟؟؟
> لكن ما تكلم زول
> جيب اضانك
> قال ليك الجماعه ب ي ات نشس اورلا بببب يسيس أأأ ق
> والله العظيم
> ما تكلم زول يا ميزو
> الخبر ده سري
> لكن يا مزمل
> يظهر انو الكاف خشمو خفيف
> بطلع اسرارو براهو
> اسي في داعي التقرير السري بتاع الهلال بشيل كاس افريقيا ده يطلعوهو لو ما خشمهم خفيف ؟؟
> غايتو ناس حياتو ديل لسانهم خفيف خلاص
> ما بتبلي في خشمهم صفر يا مزمل
> اقول ليك سر تاني ؟؟؟؟
> كورة سموحه بدون جمهور
> والله العظيم
> لكن اسألني منو المستفيد من القصه دي ؟؟؟
> بالتأكيد سموحه
> لانو الاتحاد المصري لما قرر ان الكورة تتلعب بدون جمهور
> كان عارف انو سموحه ما عندو جمهور
> رئيسهم اهلاوي
> وامين المال زملكاوي
> وحتي الامين العام ود الاسكندريه وود قلبا
> بشجع الاتحاد السكندري
> سموحه يخربها
> جمهور ما عندها
> لكن الجاليه السودانيه في مصر
> اكبر من الجاليه المصرية في السودان
> لو فتحوا باب الجمهور سموحه بكون غريب في وطنو
> عشان كده الاتحاد المصري المفتح قال تتلعب بدون جمهور
> وعلى كل البره الجزاره كتار
> كلها اسبوع وينكشف السر يا ميزو
> لكن سرك باتع يا اتحاد يا افريقي يا كاف انت يا ولد
> المهم
> ما تعرضنا له من هزه في الاداء محمده
> على الاقل ابرزت بعض السلبيات
> ويمكننا تلافيها
> فمع جمال لا مستحيل تحت الشمس
> ومع غرزه العلاج ساااااهل
> ومع الشفوت نضرب موعدا بالمطار
> ريحة المطار فاحت
> وعمت القرى والحضر
> زي سر الكاف المشرور في اي مكان اي زمان
> ايها الناس
> بالقرآن مريخنا مصان
> وكتائب الردع القرآنيه المريخيه واصله
> شغاله جهرا وسرا
> برضو الصلاه فيها الجهر والسر
> بس ما زي سر الاتحاد الافريقي
> سر الاتحاد الافريقي ده بذكرني سر السماسره
> السمسار يسوقك من الطرف التاني من يدك بعيييييييييد
> ويقول ليك اقعد
> الصلاه فيها الجهر والسر
> الكلام البقولوا ليك كسر
> يقولوا كلو للطرف التاني كسر
> بعد شويه تلقي الدلاله كلها عارفاهو
> وبتعاملوا معاهو كسر
> قصة السر دي ذكرتني صاحبي من الجامعه
> اسمو امير خضر
> اسي مفتش ضرائب قدر الكتله
> كنا شله قوامها خمسه وعشرين واحد
> نحب بعضنا حبا جما
> الواحد بحب اصحابو اكتر من نفسو
> امير لو زعل من زول
> بسوقوا بعيد
> ويقول ليهو
> اقول ليك سر !!!!
> انت عارف انا في اتنين بحبهم شديد في الشله دي
> انت وفلان
> بعد فترة اكتشفنا انو شيخ امير قال الكلام ده للخمسه وعشرين عضو في الشله
> ولسه بتعامل علي انو الموضوع سر
> سرك في بير يا كاف
> بير حاضنه الصفر الدولي
> بير الزناطير
> اشهر بير
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> السحاب يتلملم والمطر ما بجينا
> الحلم يعظم والحظ مابينا
> الجسد منحول والشمس تهرينا
> نعطش لو لقينا مويه نلقاها بي طينه
> واقفين للمواصلات تزعجنا سارينا
> المسؤول المتهنقط ورا السارينا
> رافع القزاز ومظلل خالي الشمس تهرينا
> دايرين يفتحوا ليهو الشارع يا والينا
> تقول مستعجل ماشي يخنق الاسعار وينزلها لينا
> البلد كلها تكورك يا والينا
> يا اسعاف يا كشه يا سارينا
> ونحنا يانا نحنا يا والينا
سلك كهربا
ننساك كيف والكلب بضحك علينا لما نهتف تسقط تسقط الأمطار
والى لقاء
سلك

شارك الموضوع :

تعليقات الفيسبوك

تعليقات


3 التعليقات

      1. 1
        Adil

        لماذا تسمحو للفاقد التربوي والجهلاء والملاقيط والكلاب ان يشوهوا الذوق العام بمثل هكذا هبل؟

        الرد
      2. 2
        أبو السره

        أحسن كلب الجزارة بحوم ب بره لكن بياكل لحم ، لكن كلب الكووش بيكل الفضلات والرمم.

        بعدين عددت أنواع المنقه كلها ليه ما ذكرت منقة عطبره ومنقة أبو جبيهه ( كادقلي )

        الرد
      3. 3
        الركز

        المحيرني الجماعة ديل عارفين دا سلك ودا عمود تاني ما في داعي تقولو اتكهربنا. انت العمود الما عاجبك ما تقراه.

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *