زواج سوداناس

نضافة الكمونية


شارك الموضوع :

في الستينات والسبعينات.. مشهد عادي.. تشوف شافع مصنقر وخاتي إيديهو تحت حنكاتو جنب الضباح…. ويعاين ليهو.. أو مجموعة صبية…. والشافع يكون منشن علي أبدمام “الطوحال” حتى لو يكلفه ذلك نضافة الكرشة.. يشيلو ويجري يجدعو في الفحم.. وبعد شوية يمرقو ويمشي يلبد في ركن وياكلو.. أما في الألفينات.. الشافع متشنقل علي قفاهو وبي نعلاتو في السرير.. وبدل أبدمام شايل جلاكسي ويتونس في الواتساب….!!!!

في الستينات والسبعينات كان الضباح يضبح قصاد الجلد والراس…. في الألفينات يضبح الضباح بي تلتماية ويشيل لحم… ويشغل ولد سيد الخروف مساعد ضباح… ويخلي لسيد الخروف الجلد والراس…!!!!

………

!!!!!!!(كانت تعتقد النساء أن كل فتاة غير متزوجة تنضف كمونية الضحية لا يحل عليها الحول إلا وهي متزوجة)

عزيزتي لا تدعي الفرصة تفوتك وتبوري.. احجزي طشتك من في الليل…..!!!

………

عزيزي الموظف….. حافظ علي خروف الضحية الـــ بالأقساط……. أوعى تتفولح وتتفنجر عليهو وتديهو برسيم لين ومبلول أو عيش أو رغيف “يوم الوقفة”… يصبح متندل منفوخ ميت…… وانت تقعد باقي السنة تدفع في أقساط “فطيسة”………. أوصيكم وإياي بالقش الناشف… خلوهو يلوك لمن تصبح عليهو الواطا ويستركم!!!!!….

………

تتمناها أن تقول ليها السنة الجاية عروس… لكن صاراها ليها عشان أبت تعرس ولدها… قابلتها يوم العيد…

قالت ليها “خالتي.. السنة الجاية في عرفات”….

ردت عليها “جمعا يا بنتي”….

 قالت ليها “لكن يا خالتي الحج بلا محرم؟ بيبقى؟”

قالت ليها “يمشي معاكي أبوكي”…… 

…….. “يا خالتي أبوي ما عيان إنتي ما عارفة”

…”خلاص يمشي معاكي أخوكي بدر الدين”

………..”لكن يا خالتي أخوي بدر الدين حج السنة دي” 

“خلاص اقعدي كدي واصبري لمن تفوتي الخمسين سنة وتحجي براكي”

نعم إنها امرأة غتيتة…. لقد تمنت لها البورة يوم العيد يا كافي البلا.

………

غبينة من السنة الفاتت:

صبيحة يوم العيد… بعد أن ملص الجلابية وقعد بالعراقي جاب الخروف… وعفص رقبتو بكراع.. وعضا شلفتو التحتانية.. وضبحو جخخخخخخخخخ…. ضبحو ضبحة مغبون. علقو وسلخو….. ثم أفرغه ثم قعد يقطع فيهو ويضرب بالساطور

“باتنين مليون؟”…. لت.. لت

“باتنين مليون؟”…. لت

“لي شنو؟”…. لت….

اتنين مليون ليه؟ في يوم وااااحد اتنين مليون….ليه؟ أنت أصلك شنو.؟؟؟؟”.. لت.. لت لت…..

“اتنين مليون؟”….. لت لت لت

“علي الطلاق أنا عرسي ما كلفني اتنين مليون”… لت لت لت…… “عرسي للنصيبة الدُردُمة المتفرجخة جنب الكانون ديييييييك… شفتها؟…. ما كلفني اتنين مليون.. عرس دلاليك وعزومات ونساوين تزغرد النهار والليل…. وأنت تلاتة باعات بس باتنين مليون؟…. لشنو؟؟”… لت لت لت لت..!!!
-_*
** كل عام وانتم بخير **

شارك الموضوع :

تعليقات الفيسبوك

تعليقات


1 التعليقات

      1. 1
        سودانى مغبووووون

        الله يجازى محنك .. حلوه (( …………للنصيبة الدُردُمة المتفرجخة جنب الكانون ديييييييك ))

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *