زواج سوداناس

الله يقدرني. خشمي



شارك الموضوع :

السنة الفاتت قبضو أربعة حاويات.. مستفة سَّتْ مخدرات.. اتخلعنا.. فرحنا انها اتقبضت..
شوية قالوا مسكوا ناس ليهم علاقة بيها.. فرحنا انهم اتقبضوا!
شوية قالوا خلاص دايرين يحاكموهم تب.. فرحنا دايرين يحاكموهم..
شوية حاكموهم.. ومرقوهم جَّتْ براءة.. وقعدت الحاويات في الصقعية مافي زول مسؤول منها ولا عندها سيد.. فرحنا انهم طلعو براءة.. والحاويات بت الكلب دي تتدردق من مكانا لامن وصلتنا.. أها التضوق.. تراها اتقبضت واتحرقت.. هي قايلة نحن فوضى تجي داخلة سااااكت بلا سيد؟.. نحن ناس مفتحين.. شغلتنا قبض بس.. نبداها من جركانات العرقي لي حاويات المخدرات..!!!!.. الغريبة ستات العرقي عارفات وسامعات وفايت قعور إضنيهن إنو يوم الخميس جاينهم.. وبعد دا كلو يتقبضن.. منتهى الوطنية منهن!!!!. يتقبضن عشان شباب الوطن ما يطشم!!!
الشهر الفات في بورسودان برضو.. قبضوا حاوية.. مستفة مخدرات.. فرحنا كعادتنا.. وانواع قالوا جديدة لنج.. فرحنا اكتر.. يعني هي عشان جديدة قايلة مافي زول بيعرفها ويقبضها؟
قالوا دي عابرة.. فرحنا برضو.. وقلنا القشة ما تعتر لها.. والبيضا تسوقها وتقودها..
عابرة يعني داخلة لي جوا علي إفريقيا.. تسطل ناس إفريقيا الجوّة ديل علي السطلي العليهم.. لكن عليكم الله ما تغشى إفريقيا الوسطى داك الليلة شفتهم في قناة والله يحننو… الواحد ماشي ومتكل علي الحيطة من الفتر، أعفوهم السنة دي.. بعد حالهم ينعدل سطلوهم.. وخايف والله الحاويات دي عبورها يكتر.. وتمشي وتدفق لمن تعبر.. حبوب قدر دي تكفينا وتفضل.. لي عند غنمنا وكدايسنا نسطل.. وفي صمة خشومنا..
قبال فترة أوردت إحدى الصحف إنهم قبضو ست شاي في إحدى المناطق الطرفية بالعاصمة.. مشهور عنها انها صاحبة شاي ساموطي.. اتضح انها بتضيف بعض الحبوب المخدرة للشاي.. والجماعة يجوا جارين من آخر الدنيا كل واحد يلحق جرعتو.. مع الحبوب الكتيرة والملت البلد دي.. باقي لي تاني مافي ست شاي بتدس لها حبوب.. تجي تجر بنبرك وتقعد.. بعد كانت تسالك: سكرك كيف؟
ح تسالك: (خرشتك كيف؟.. كديسة واللا كلب؟).. وانت ترد مبسوووط: “كديسة.. كديسة.. يا غزال انتي ومتفرجخ فوق البنبر”

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *