زواج سوداناس

كِبرت مُصيبتك يا بلد..!!


خريطة السودان الاخضر

شارك الموضوع :

قالوا المُصائب ..
أصلُوا ما بتأتيك فُرادى..
بالجُملة يتوالن يَجن..
مليان حشاهِن بالكوارِث ..
والصِراعات والإحَن..
شايلات مَعاوِل من دمار..
مُحال يساعدن فى عمار..
الليلة جَن ..شايلات خراب..
احوالنا برضوا اتغيرن..
القلنا مُوية طلع سراب..
الكان مِخدر عندنا..
واطتوا جَفّت من زمان صِبحت يباب..
ما تمّ لينا الكان بدأ..
أملنا فيهوا الليلة خاب..
مرت عُقُود من العُمر..
ضاعن سُدن..
أحلامنا فيها اتحطمن..
خسارة البلد (الكبير)..
يا حليلوا كان أجمل وطن..
مليان شباب..
جاتوا المُصائب ما فُرادى..
بيناتنا نِحنا اتوَهطن..
لا خلن الأرِض البتنتج لينا مدخور السنة..
تملأ المطامير الغُراق ..
والبواقى الفضّلن..
تكفينا والطير البجى..
تُشبِع بُطونّا ويَتمَلن..
لا خلن الولد القبيل ..
حارسنا قاعد فى العَقاب..
يا حليلوا غاب..
كان يلقى ليهوا بديل وطن..
لمّا الوطن للزيوا ضاق..
بعد المُصايب جُملة جَن..
غالب مصانعوا اتوقفن..
لا كهرباء ..
لا موية ليهن كم زمن..
والغاز صفوف..بالله شوف..
لمّا المُصائب ينزلن..
الجريدة

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *