العضووووووووووية
> أبواب العضوية مشرعة أمام الشرفاء
> وهي أيضاً لاترفض من يحشدون لشيء في نفس يعقوب
> فيعقوب يحشد العضوية لا لشيء سوى الولوج للمجلس
> وعندما يكون الهدف الأساسي هو الولوج للمجلس
> تبقى الكارثة كبيرة
> لان هدف الإنسان يجب أن يكون الكيان في المقام الأول
> وفي المقام الأخير
> العضوية التي نريدها هي العضوية أم راس
> العضوية التي تدعم النادي فكرياً
> التي تعقل الأمور وتضعها في نصابها
> أما العضوية بالراس، فهذه هي مشكلتنا
> والمشكلة الأكبر إن العضوية بالراس
> هي أغلب العضوية المفعلة بالنادي
> قبل كل انتخابات يجدد لها من يحشدها
> ثم يوجهها لأغراضه الشخصية
> والتي غالباً ما تتعارض مع أغراض النادي الشخصية
> لذا
> ولذلك
> نسعى للعضوية أم راس كي تكتسح العضوية بالراس
> أيها الناس
> الناس تعرف من هو الذي يحشد عضوية لنفسه
> وتعلم من هو الذي يدعم تلك العضوية بدون أن يظهر في الصورة
> توعدنا وتبخل بالصورة!!!!
> وتعلم كيف تقضي على تلك العضوية المستجلة
> العضوية التي تقترح قفل باب النقاش قبل فتح باب النقاش
> وتثني
> وتجيز الاقتراح بالإجماع قبل ما زول المفوضية يقعد في كرسيهو
> عضوية زي دي ما دايرنها
> دايرين عضوية تقتل المواضيع نقاشاً وبحثاً
> دايرين عضوية تقتل الأهداف الأخرى غير الموجهة لمصلحة الكيان
> دايرين عضوية لها القدرة على حُسن اختيار المجلس
> دايرين عضوية تقتنع بأن الاشتراك الشهري دعم كبير للنادي
> دايرين عضوية تهتم بسداد اشتراكها شهرياً
> قبل ما تفكر في سداد كهرباء الدفع المقدم لمساكنها الخاصة
> دايرين عضوية تليق بالمريخ ومكانته الإفريقية والعربية
> فجماهير المريخ جماهير فلتة وغير متفلتة وعاشقة
> يكفي أنها فازت في مسابقة أكتر جمهور عربي مؤثر إيجاباً على فريقه
> دايرين عضوية فاعلة ومفعلة
> المهم
> في الإذاعة الطبية أمس
> في برنامج عثمان حسن مكي
> خالدونا قالوا قال
> تسجيلات المريخ فاشلة وموضوع الوك ده لتخدير الجماهير وتغطية الفشل
> او كما قال
> ما بقول لي خالد حاجة في كلامو ده
> لأنو خالد لايرى في المريخ شيئاً جميلاً
> ولكن كنت أتوقع أن يتحدث خالد عن تسجيلات الهلال
> ويحدثنا عن الجوهرة فيصل موسى الذي كان الشغل الشاغل لإعلام الهلال عند توقيعه لهم
> وكيف أن كردنة لبد ليهو
> مع طلعتو كف ختفو
> وكيف ترك خشم ناس المريخ ملح ملح على فقد فيصل موسى
> مفروض خالدونا كان يكلمنا عن معسكر الفجيرة الممنوع عنه إعلام الهلال
> لكن خالد خلوهو يدخل
> وشاف بي عينو
> فهل وقتها كلمتنا عن مواسير بالبطاح جابها الهلال؟؟؟
> يا خالد
> ألوك بقى كعب بعد وقع للمريخ ولا قبل ذلك؟؟؟
> أول مواجهة للقمة يا خالد
> الوك عندو قون
> وقتها لوك الصبر
> وبعد داك قول صدفة
> حدثنا يا خالد
> عن جوليام واندرمستوي
> حدثنا كيبي حبيبي وعن كانوتيه
> حدثنا بدون حرج
> مابنحرجك
> كلمنا عن حداشر أجنبي في كشف الهلال قاعدين كنبه
> عشان تورينا منو البسجل ساكت يا خالدونا
> عطرون والنعسان والغاني وشمس الفلاح وعودة عنكبه
> دي حصيلة تسجيلاتنا
> أأأأأأأأأخ
> نسيت ألوك اكيج
> سقط سهواً
> ديل ناسنا السجلناهم أسي
> ضيف ليهم أمير كمال وراجي ومصعب
> ديل الجددنا ليهم
> وخلي الموسم يبدأ
> وورينا منو الفشل فيهم
> الوك اكيج ذكرتوا ليك ؟؟؟؟؟
> المهم
> موسم جديد يبدأ
> نتمنى أن يكون موسماً مميزاً
> في كل مناحيه
> في الملعب وبره الملعب
> بره الملعب أقصد بها الإعلام والإدارات والجماهير
> موسم جديد يبدأ
> الزعيم يريد أن يعود لمنصات التتويج الإفريقية
> والهلال يريد أن يعرف درب تلك المنصات يا دوبك
> والأهلة يحتاجون لقصاص أثر
> لأنو براهم سبعة وتمنين سنة ما لقوا درب لمنصات التتويج الإفريقية
> قد تصبح تمنية وتمنين
> ولكن لهم أجر المحاولة
> أيها الناس
> احترام الآخر هو شعار هذا الموسم
> أيه يضيرنا لو طبقنا هذا الشعار واقعاً !!!!
> المهم
> أب كسكتة اليومين دي ما ظاهر في الحتة
> إن شاء الله المانع خير يا كساكيتو
> صدقوني أنا احترم عند كردنة صراحتو وشفافيتو
> صريح لدرجة برميها ررررررب
> الله يستر على الطابق الجديد
> في حقيقتو طويبق
> زي بتاع شاخور حق أستاد الخرطوم
> يشبه لي صواني العرض البختوا فيها ناس الشوايات الفراخ
> داير ليهو لمبة نايلون بين لمبتين صينيات
> وقزاز مكسور في الواجهة
> الوك اكيج
> أقصد أقول ليك حاجة
> الموسم ده بالنسبة للمريخ استثنائي
> بس لو كنا جبنا باسكال عشان نستفيد من جنسيتو
> كان كملنا الكلام
> لكن ما مشكلة
> شهر ستة بلحق المجموعات معانا إن شاء الله
> أيها الناس
> عارفين إنو بكري تاني هداف بالنسبة لإفريقيا!!
> طيب وكت عارفين ساكتين ليه؟؟؟؟
> كاريكا جا الكم ؟؟؟؟؟
> ضفر قدامو؟؟؟؟
> أصلو ما بصدق
> المهم
> سمعت بالبطولة الافريقية لتنس الطاولة المقامة عندنا
> سمعت طشاش ساي
> والمؤهلة للنهائيات
> ولكني أسأل
> آخر منافسة مستمرة ومستقرة لتنس الطاولة عندنا كانت متين ؟؟؟؟؟
> دي غايتو زي لما تقول ناس الهلال مستضيفين الاندية التي فازت ببطولات الكاف
> طبعاً القروبات بتاعت الواتس والفيس تجمع الناس حسب صفات محددة فيهم
> يعني أولاد دفعة مثلاً تلقى عندهم قروب إسمو أخوان في البكلاريوس
> قول معاهم حامد
> قاموا عملوا قروب جديد سموهوا دفعة الماجستير
> ده طبعاً بلم الناس المن قروب البكلاريوس عملوا ماجستير
> قول حامد ما عمل ماجستير
> البدخلو القروب ده معاهم شنو؟؟؟
> موش ياها زي الهلال يستضيف الأندية الفائزة ببطولات الكاف؟؟؟؟
> واتكفكفي
> أيها الناس
> «إن تنصروا الله ينصركم»
> آها
> نجي لي شمارات والي الخرتوم
> كان شفت يا والينا
> الأكل صعب علينا
> ولأننا تحسبنا من التعفف أغنياء يا والينا
> بناكل لبانه من تشرق الشمس علينا
> عشان لو زول عازمنا فطور وكشكر لينا
> نحلف نقول ليهو ماكلين يا والينا
> لكن اليومين دي اللبان ذاتو صعب علينا
> ناكل أضافرينا !!!!!
سلك كهربا
ننساك كيف وعيون الكلب بتقول رجالا يلوكوا اللبانة اللبانة التلوكم
والي لقاء
سلك
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة
العضوية بالراس طيب راسك ده براهو يساوي جمعية عمومية