زواج سوداناس

قالوا بيجيبوا (شيبوب) ..جابوا (أفراح عصام)



شارك الموضوع :

حكاية اللاعب لازم يصل لبيت جمال الوالي عشان يدخل كشوفات المريخ – حكاية ما كريمة ولا جميلة من جمال الوالي
شيبوب ظهر ليك في صورة الساعة 4 صباحاً مع أبو جريشة وعبد التام في مطار الخرطوم – ذكرتنا أيام أزمة (الخبز)
غايتو يا كابتن (لوك) …في الموسم الجديد إلّا تمسك ناس محمد النصري وطه سليمان
المريخ متل (الحكومة) تماماً ..(المعارض) عندما يكون موجود في البلد وبفاوض وبحاور الحكومة سلمياً ما بيشتغلوا بيه

عندما كان شرف شيبوب في رديف المريخ ما في زول كان شغال بيه – كان اللاعب مهمل – حتى إن شكله لم يكن محفوظاً لدى الجماهير.
هدف شيبوب في الاتحاد الجزائري ناس سلك حسبوه لبكري المدينة.
والحكم ما احتسبوا من الأساس.
شيبوب كان في المريخ لاعب (منكور) – الوحيد الذي قيمه في المريخ وقدر موهبته كان الفرنسي (غارزيتو).
الوك جاء في (5) أيام بقى معروف ومشهور أكتر منو.
الوك عمل. و الوك قال.
وكأن (شيبوب) هذا شغال في (الري المصري).
ما في زول في المريخ بيجيب سيرتو.
الهلال عندما فاوض اللاعب شيبوب ورحّله إلى (جوبا) بدأ اهتمام المريخاب بـ (شيبوب) يرتفع حتى أضحى (شيبوب) هو النجم الأول في المريخ.
شيبوب بقى ميسي بس لابس (18).
جمال الوالي سعى إلى شيبوب الذي أهمله مجلسه بالتلفون.
دا لاعب بخلوه (هاوي).
وأبو جريشة وعبد التام صارت كل آمالهم وأحلامهم في الدنيا أن تلتقط لهم صورة مع شيبوب.
اللاعب ظهر ليك في صورة الساعة 4 صباحاً مع أبو جريشة وعبد التام في مطار الخرطوم – ذكرتنا أيام أزمة (الخبز).
لمن الناس كانوا بيقوموا الساعة 3 صباحاً عشان يقيفوا في صف (الرغيف).
اللاعب وهو في قبضة الهلال وصل سعره لـ (3) مليار جنيه.
غير نوت 6.
المريخ عندما استلم اللاعب وهرّبه من الهلال وعاد به إلى الخرطوم عبر صالة كبار الزوار – وقتها أصدر أشرف الكاردينال تصريحاً قال فيه إنهم صرفوا نظر عن اللاعب – انخفضت أسهم اللاعب بصورة مخيفة.
وبدلاً من (3) مليار جنيه التى وعدوها به عرضوا عليه مليار و 200 مليون جنيه.
وجمال الوالي الذي كان يطارده بالتلفون ..قال جيبوه لي في البيت.
إلّا يصلو عديل كدا بالباب …عشان يتكفل بصفقته.
جمال الوالي ليه حق يقول كدا – لجنة التسيير عودته على هذه الخصلة.
عندما وقع (الوك) في كشوفات المريخ – لجنة التسيير تخلت عن كرامتها وطلبت من اللاعب الذهاب إلى منزل جمال الوالي.
أنتوا جمال الوالي دا موش استقال ..تاني عاوز شنو؟.
خلوه يخلي ناس أسامة ونسى يشتغلوا.
حكاية اللاعب لازم يصل لبيت جمال الوالي عشان يدخل كشوفات المريخ – حكاية ما كريمة ولا جميلة من جمال الوالي.
هذا هو الشيء الذي يجب أن ينتقد فيه جمال الوالي بدلاً من الهجوم والانتقاد الحاد الذي يتعرض له مجلس المريخ الحالي.
اللاعب تفاجأ بالإهمال الذي وجده من المريخ بعد أن وجد اهتماماً مبالغاً فيه عندما كان طرف الهلال.
اتراجعوا من كلامهم.
وتاني رجعوا يستخفون به.
لذلك قرر اللاعب العودة إلى الهلال …ليتقطع (فشفاش) المريخاب من جديد ويقعدوا يبحثوا عن الأسباب.
ويرجعوا لينا تاني – عبرت وما عبرت.
عبرت وما عبرت.
التشريعات ظهرت ليك من جديد.
البقول ليك لجنة التسيير رفضت تذهب باللاعب إلى منزل جمال الوالي.
والبقول ليك أسامة ونسى ما كان يطلق سراحه بعد المعاناة التى وجدوها لاستعادة اللاعب.
يعني حايمين بيه في (4) مطارات ومتصورين معاهو في (برد) يلخم عشان تسلموه (الكاردينال).
والبقول ليك جمال الوالي يبحث عن (دعاية) انتخابية من أجل أن يعود للمريخ مرة ثانية…فأضاع اللاعب من أجل المكاسب الشخصية.
النار ولعت في المريخ.
ما نريد أن نقوله في هذا الأمر ..إن المريخ متل (الحكومة) تماماً ..(المعارض) عندما يكون موجوداً في البلد وبفاوض وبحاور الحكومة سلمياً ما بيشتغلوا بيه.
أول ما المعارض يطلع بره ويدخل الغابة ويرفع السلاح …تنفذ له الحكومة كل طلباته من أجل العودة.
يعلموا ليه أي حاجة.
وتذهب الحكومة أبعد من ذلك – فهي يمكنها أن تدخل من يرفع السلاح في وجهها إلى القصر ليكون مساعدًا أو مستشاراً للرئيس.
المعارض إذا دخل يبقى قاعد ساكت في القصر…وزول يشتغل بيه مافي.
يبقى زول (هاوي) ساكت.
المريخ الآن بيطبق نفس النظرية في (شيبوب).
شيبوب هو ولدهم ما في زول كان مهتم بيه …مهمل ولا يمنح حقوقه.
أول ما شيبوب اتمرد ..وطلع من البلد ومشى للهلال بي كرعينو ..أصبح (شيبوب) أهم زول في المريخ.
والنار ولعت.
والجرسة دورت.
عليكم اللـه خلوني أنا – الشغل دا ما نفش شغل الحكومة.
حكاية المهرجانات البتموها (فنانين وفنانات) دي طريقة التكسب الجماهيري.
وسيلة للملمة الناس.
المريخ بقى ما عندو نجوم تجيب الجماهير.
بقوا يلقطوا الجماهير بي محمد النصري وطه سليمان وأفراح عصام.
البيجي في البرد دا لي ضفر وخالد النعسان وعطرون منو؟.
الناس الجوكم ديل بي قلتهم جايبهم محمد النصري…أو الدعاية التى أطلقوها بمشاركة محمد النصري.
وأفراح عصام.
طه سليمان قالوا ليك خاطب ليك الجماهير.
اتخيلوا المريخ اتراجع كيف؟.
طه سليمان بقى يتكلم في المواضيع دي.
بعدين أنتوا مهرجانكم دا موش كنتوا عاملنوا لي (شيبوب).
شيبوب القفز من الطابق الثالث.
شيبوب الذي نزل بالماسورة.
شيبوب الذي رجع بدون أوراق ثبوتية.
شيبوب الصعب.
مالكم جيتوا غيرتوا اختصاص المهرجان.
من شيبوب قبلتوا على (أفراح عصام).
واللـه تتابعوا لي الكاردينال دا بي (الكسكتة) حقتو دي – إلّا تتموا مهرجانكم بي ناس (نجوم الغد).
طه سليمان ذاتو بشيلوه منكم.
يا زول ما في زول بمشي ليه مهرجان في (برد) زي دا ..وشيبوب مع ناس الهلال.
دا مهرجان حزايني.
مهرجان مأساوي.
أفراح عصام دي ممكن تجيبوها في رأس السنة.
في الفلانتاين.
تانية العيد.
في حنة.
أفراح عصام تجيبوها في مهرجان فاشل زي دا.
أمس قالوا ليك الناس الذين شاهدوا المهرجان ما ناس كورة ..ديل ناس غنا ساكت.
الطريف أن الزميل عصام طمل في تصريحات من مدرب المريخ الجديد (لوك) تنشر في هذا العدد قال إنه أول مرة يحظى بهذا الاهتمام وذلك الاستقبال الكبير.
الزول دا (جديد) في الشغلة ولّا شنو؟.
هو وينو (الاستقبال)؟.
المريخ واضح أنه جاب ليه مدرب (مغمور).
زولكم دا معقولة (11) مشجع يخلعوه.
طيب الزول دا لو شاف جمهور الهلال يقول شنو؟.
بعدين ناس المريخ الأيامات دي الواحد فيهم لو مشيت ليه في البيت ما بيستقبلك.
جمال الوالي مافي.
وشيبوب طار منهم.
وقروش للمعسكر ما عندهم.
وقروش المدرب إلّا يتموها (سيخ).
في هذه الظروف ما في جمهور بيستقبل ليه مدرب.
المدرب الفرحان دا قولوا ليه (فاروق جبرة) ابن المريخ البار ما صبر على المريخ.
أنت عاوز تصبر في الظروف دي.
شيبوب خطفوه وحاموا بيه في (4) مطارات …وغادر منهم.
غايتو يا كابتن (لوك) …في الموسم الجديد إلّا تمسك ناس محمد النصري وطه سليمان.
ناس بكري المدينة وعطرون والنعسان ما بعملوا ليك حاجة.
الزول الفيه فايدة ..مشى الهلال.
اللـه يجيب لينا مايو – ونشوف (شيبوب) بشعار الهلال.
المضحك …لجنة التسيير قالت سوف تشتكي (شيبوب).
على شنو ما عارف؟.
قالوا على (صورو) مع رئيس الهلال.
أنتوا هيثم مصطفى كان قاعد موسم كامل في بيته ..ما قدرتو تعملوا ليه شيء…وهو محترف ما هاوي.
تراوري ليه سنة ونص (مختفي).
عاوزين تعملوا فلاحتكم بس مع (شيبوب).
عليكم اللـه اشتكوه.
وامشوا (لوزان) كمان.
عشان نسده حقنا في بكري المدينة بـ (لوزنو).
واللـه حقنا رجع لينا على داير المليم.
ونحن كسبانين كمان.
بس حرّصوا على اللاعب وأبعدوه من الأعين والصور.
الزول دا ما عاوزين نشوفو تاني إلّا في مايو.
ما عاوزين أي زول يعرف عنو شيء.
طبعاً لا بد من المرور عبر عقد احتراف رسمي عشان اللاعب يعود للهلال.
هندسوا الحكاية – وأكيد عندكم مليون حل ..وألف طريقة.
…………
ملحوظة : في مايو عاوزين نشوف اللاعب في كشف الهلال.
هوامش
أسامة ونسي في فترة وجيزة اجتهد وعمل وقدم الكثير – نرجو ألّا يحمل مجلسه أكثر مما يستطيع.
كل الأخطاء التى وقع فيها مجلس المريخ الحالي مُرحّلة من المجلس السابق.
شيبوب لم يتعاقد معه أسامة ونسي (هاوياً).
وهو كذلك لن يستطيع أن يمنح اللاعب المبلغ الذي منحه له الكاردينال.
الرجل اجتهد في حدود فترته وإمكانيات مجلسه.
هيثم مصطفى واضح أنه آخر انسجام في تدريبات الهلال.
شخصية هيثم مصطفى ظاهرة في التدريبات – أهم شيء في المدرب الشخصية القوية.
كافالي نفسه ظاهر عليه الشخصية القوية والطرق الحديثة في التدريبات والجدية الكبيرة.
نتمنى أن يلحق مكسيم وكاريكا سريعاً بمعسكر الهلال في تونس.
ويا ريت يلحق بيهم (شيبوب) عشان يكسر حاجز العزلة ويخش في لاعبي الهلال.
لا بد أن يشعر شيبوب أنه أصبح واحد من ناس الهلال ولا بد أن يدخل الأسرة الهلالية سريعاً.
انضمام شيبوب لمعسكر الهلال في تونس بعد (التوقيع) لأحد الأندية أمر لا بد منه.
عاوزين نشوف صور شيبوب في معسكر تونس.
شيبوب بشعار الهلال.
شباب الهلال أبو عاقلة وولاء الدين وعمار الدمازين وبشه الصغير وشيبوب ومحمد عبد الرحمن وأطهر الطاهر ووليد علاء الدين – حاجة تفرح.
حاجة تبسط.
الكاردينال عليه التركيز شديد مع شيبوب.
الزول دا تاني ما تفكوه ساكت.
عاوزين افتتاح الجوهرة الزرقاء يكون مع دخول شيبوب لكشوفات الهلال رسمياً.
ليكون الكاردينال عمل ليه (جوهرتين) في وقت واحد.
……………..
عاجل : دا (برد) يعملوا فيه (مهرجان).

شارك الموضوع :

تعليقات الفيسبوك

تعليقات


1 التعليقات

      1. 1
        عزالدين الاصلي

        انت انسان سطحي حقو الصحافة تخجل منك وده اسلوب وضيع وضاعة مجتمع انت فيهو رقم
        بدل الخطرفات دي شوف الانت بتسبح بي اسمو جاب القروش دي كلها من وين ولا انن شغال بالقطعة صحي والله لا يستقيم الظل والعود اعوج يعني انت الظل والكاردينا العود مترجمة كده

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *