شفتك وين
كونك إنو تقسا على.. ما معناها إني أجن..
ولا معناها أبكي عليك.. ويرجع قلبي تاني يحن..
خلاص مليت من التحنيس.. وريدك كان كأنو سجن..
وهسه ضروري أنسي الكان.. ألف إخلاصي ليك في كفن..
أحاول ألحق السنوات.. وأفتش لي حناني وطن..
أنا الغلطان عشان حبيت.. حبيب ما عندو ليا زمن..
***
أقسى.. وقفل الأبواب.. وبرة حياتك أرميني..
وهدد بالفراق والبين.. وحاول ياخي خلينى..
زهجت من الغرور الفيك.. وما مستني ترضيني..
بلملم هسه في الأحلام.. لو الأيام تكفيني
وأرسم في الخيال محبوب.. أريت بالجد يلاقيني..
يعوض ليا كل الفات.. ومن تحنانو يرويني..
****
لقيتك وكنت قايلك قيف.. عليهو بترسى أيامى..
وظنيتك ياما فيك الخير.. وفيك علقتا أحلامي..
كتبت عشانك اغلى حروف.. وليك انسابت انغامي..
ورشيت فيك رذاذ الريد.. وداعبتك بأنسامي..
أتاريك كنت ياخي خيال.. ومنسوج حولو أوهامي..
****
لنفرض إنو إنت نبيل.. وقدرك عالي بين الناس..
وعندك حاشية من خدام.. ومن عشاق.. ومن حراس..
منو القال المحبة مقام.. وما محكومة بالإحساس؟
وكيف حانحسب النبضات.. بالأقلام وبالكراس؟
وكيف حنغير الأقدار.. إذا دقّ الغرام أجراس؟
تأكد إنو مهما عليت.. حيفضل طين هوانا الساس..
****
واكيد الدنيا بيك حتدور.. مهما عدوا بينا سنين..
تفتش عن غرامي الكان.. يسوقك لي قليبي حنين..
وتسأل عني كل الناس.. وتبكي علي بدمع العين..
تضوق طعم الندم والخوف.. تشيل الليل سهاد وأنين..
ولو لاقيتني يوم ولهان.. بقول ليك: ياخي شفتك وين؟
تلويح:
القسوة.. قد تفقدنا الذاكرة!
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة