زواج سوداناس

ضروس عمك عبد الله


في السلك بابكر سلك

شارك الموضوع :

> ايها الناس
> نفرض انو مجلس التسيير هو اسوأ مجلس يدير نادي في تاريخ العالم العربي والعالم الاسلامي والعالم الافريقي
> بل اسوأ مجلس ادارة نادي في العالم كلو على مر العصور منذ ان كانت الكورة اسمها التيوه
> نفرض جدلاً عشان ما نضيع زمن المريخ في خلاف بيزنطي
> المريخ في مرحلة مهمة جدا تحتاج لتوفير الجو اللازم لاعداد الفريق حتى يتأهل على حساب اسطيف الجزائري الذي يعتبر المعركة ثأرية بالنسبه له
> قول شلنا مجلس التسيير اسي دي
> ماذا يفيد المريخ الآن؟
> بل هل ابعاد او ابتعاد المجلس في هذا التوقيت يفيد المريخ اساسا ام يضر به؟
> قول ابعاد مجلس التسيير في هذه المرحلة بفيد المريخ
> منو البجي يستلم الراية؟
> وهل نسينا ام تناسينا اعتذار الناس من استلام الراية بعد استقالة المجلس السابق؟
> قولوا لي منو الفي مجتمع المريخ بدق صدرو ويدخل مجلس جمال لا يرأسه؟
> وهل ننكر اننا نتسابق ونتنافس على دخول المجالس التي يرأسها جمال؟
> والواحد لو سقط في الانتخابات يسكن في بيت جمال لمن جمال يعينو؟
> واذا قرر جمال الابتعاد لا نجد من يتحمل عبء الادارة بعد الاقتتال على الدخول في مجلس جمال
> نفرض انو جمال قرر العودة لقيادة المريخ بصورة رسمية
> هل الافضل له العودة والمريخ يحلق مع الهلال في سماوات الطيران؟
> ام الافضل ان يعود جمال ليجد المريخ ينعم بدور المجموعات؟
> ايها الناس
> حقو نبقى صوفية في عشق الكيان
> يمكن ان نبجل شيخاً ونفرط في احترامنا له وفي حبنا
> ولكن لن ننسى ان احترامنا للشيخ ينبع من حبنا لعقيدة تشكل الكيان فينا
> ومن يحب الشيخ اكثر من الدين يبقى اشرك
> لان اساس حب الشيخ هو حب الدين في المقام الاول
> ايها الناس
> اي زول حر في ما يراه بخصوص المجلس
> ولكن لكل مقام مقال
> ولكل حديث زمن يناسبه
> والوقت الآن وقت دعم ومساندة واعداد لكيان يضمنا جميعاً في محبة واحترام
> لذا المرجو مراعاة فروق الوقت
> ايها الناس
> لماذا يفترض البعض وجود خلاف بين جمال ولجنة التسيير؟
> ان كان الامر كذلك لماذا نجد جمال هو اول الداعمين لمسيرة المجلس؟
> وماذا سيستفيد من يروجون لمثل هكذا كلام؟
> ايها الناس
> لا حديث الآن الا كيف نتخطى سطيف
> وبعدها ان شاء الله يفرزونا بالصلعات
> المهم أن يتأهل الزعيم
> ايها الناس
> مقترح من شفت كبير يقيم بعمان
> قال في اكتر من تلتمية قروب واتساب تجمع الشفوت
> واي قروب فيهو على الاقل مية عضو
> في خمسه جنيه القروب بطلع بي خمسمية الف في الشهر
> في تلتمية قروب بتطلع بي مية وخمسين مليون في الشهر
> مبلغ ممكن يجيب موية التمارين
> واقترح شطب العضو من القروب في حال عدم سداد الاشتراك الشهري
> وقال إن المريخ يحتاج للدعم اكثر من حاجته للنقة
> رأيكم شنو يا آدمينس!!!
> المهم
> ما تقولوا الليلة نسينا اخوتنا الأهلة
> الطيارون
> وكان تعب منك جناح يا روشا في السرعة زيد
> ومشروعات كردنة للهلال كتيرة
> ونثق في ان الرجل حاينفذها كلها
> وفعلاً نفذ المشروع الاول
> شركة طيران الهلال
> وشاطئ الهلال بالحتانة
> اسي الاهلة يجلبغوا ساااي في الحتانة
> اعملوا حساب الالتهابات يا خالدونا
> تدخلوا المويه وتمرقوا يلفحكم هوا
> القصة دي بتجيب ليكم الالتهاب يا رمضان
> ولو جوه المويه شفتوا ليكم حاجه سوداء مطفحة
> ما تخافوا ده ما تمساح
> دي كسكتة
> وعندي مقترح لكردنة يساعده في بناء الجوهرة
> طالما بالقانون وبدون قانون الدكاكين ما تم اخلاؤها
> حقو كردنة يشيل من اي دكان مية مليون تبرع
> ويرفع ايجار الدكان لعشرة ملايين في الشهر
> ويدفع المستأجرون مقدم تلاته سنين
> كده يكون اي دكان دفع اربعماية وستين مليون
> في عدد الدكاكين الفي الجهة الشرقيه والجهة الشماليه يكون حق بناء الجوهره مرق
> وتكون الجوهرة اتبنت بقروش ناس الدكاكين
> والشكر لي حماد
> الشكر لكردنة
> لاحد شاف ولا حد دري
> رأيك شنو يا كردنة؟
< المهم > عمك عبد الله من الدامر
> يعاني من صداع مزمن والم في البطن دائم
> الدكتور قال ليهو المشكلة في ضروسك دي لازم تقلعها
> كلو يوم يومين يقلع ليهو ضرس ضرسين وسنين تلاتة
> لما الخشم بقي زي الشقه الاهلها رحلوا
> بعد داك عمك عبد الله قال بدور طقم اسنان
> جابوا ليهو الطقم اتبسم ويعاين في المرايا
> واتلفت علي الناس قال ليهم بدور اعرس
> كردنه قلع ضروس الهلال كلها
> المعز ومهند والمعلم «ضرس العقل» وفرط في بكري «النائب البقطع» وقلع ليك ابيكو «الضرس الوراني» وسيسيه «الضرس الجمب الوراني» وموكورو الفاطر ومقبل علي كاريكا وبشة ومساوي
> عمك احمد اخو عبد الله
> ضرب ليهو عبد العزيز ود اخوهو
> قال ليهو يا عمي كردنة شطب ابيكو وسيسيه وموكورو ونيلسون
> عمك احمد قال ليهو كردنة مالو لحق الهلال ضروس عمك عبد الله؟
> عبد العزيز قال ليهو قال داير يعتمد على الاشبال وكمان بعد ده قال حايشيل كأس افريقيا 2018م
> عمك احمد ضحك وقال ليهو يا هو كردنة ده عمك عبد الله زاتو
> عجبو الطقم قال داير العرس
> الطقم ده بشيل بيهو كاس افريقيا؟
> اقصد الاشبال ديل بشيل بيهم كأس افريقيا كيفن؟
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> زماااااان… شوف عين ما جابوا لينا
> لو قابلتنا عربية مكتوب عليها امتحانات السودان
> او شفنا مظروف حكومي مكتوب عليهو بالاسود امتحانات السودان يا والينا
> نرجف من راسنا لي رجلينا
> انت قايل الصلع دي شنو الجابها لينا
> عبارة امتحانات السودان بتوقف راسنا صوفة صوفة وما بتخلي صوفة راقدة لينا
> سرية وقدسية ومهنية عالية يا والينا
> اهتمام واحترام وصمت في حضرتها يقل الكلام يا والينا
سلك كهربا
ننساك كيف والكلب قال للجريو لما كنا جريوات ما حصل انكشفت الامتحانات لينا.. كانت مستورة ومحترمة نفسها يا بوبي
وإلى لقاء.
سلك

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *