خالد عز الدين : نكتة الموسم .. اتحاد التزوير يشتكي في الاعمار !

بات منتخب الشباب قريبا من الخروج ليحلق باخوانه في الناشئين والاولمبي والاول ليتفرغ بعد ذلك معتصم جعفر وزملاؤه للانتخابات ويستمتعوا بدعم اتحادات الاوسط والشمالي والغرب وكل اتحادات السودان ! ولكنهم لن يستمتعوا ولو لحظة عندما يقفون امام المراة في لحظة حقيقة مع انفسهم ليظهر لهم الفساد المالي والفشل الكروي وضياع الكرة السودانية ..

اعتقدنا ان نكتة الموسم كانت في شكوي المدرب مازدا من حكام مباراة المنتخب امام ساحل العاج ولكن يبدو ان اتحاد العجائب يخبئ لنا الكثير من الشكاوي المضحكة فقد تقدم بشكوي ضد المنتخب الكيني طاعنا في اعمار اللاعبين الشباب ! لم اتمالك نفسي من الضحك والبكاء في نفس الوقت ! اتحاد النعسان .. اقصد اتحاد السودان يشكو في تزوير الاعمار !! اي جرأة يملكها أسامة عطا المنان .. أي برود وأي مكابرة وأي نوع من البشر انت !!

أي جرأة يملكها مجدي شمس الدين عضو اللجنة التنفيذية للاتحاد الافريقي !! وأي غباء لرجل كنا نعتقد انه يتمتع بالذكاء ؟!! هل يمكن ان يشتكي اتحاد النعسان وعيد مقدم ومصطفي الفادني واسحق ادم في تزوير اعمار اللاعبين !! هل يمكن ان يشتكي اسامة عطا المنان الذي طالب جهارا نهارا بتبديل اعمار لاعبي الشباب والرديف واعادة تسجيلهم في انديتهم مرة اخري باعمار تناسب اعمارهم الجديدة في المنتخبات السنية ؟؟؟؟! علي من يضحك اسامة . هل تذكرون عندما الغي كمال شداد الفئات السنية في الاندية وقال بصريح العبارة انها مرتع للتزوير !! هاهو الواقع يتحدث .. وبعد كل هذا لا توجد نتائج .. لا في الفئات السنية المزورة ولا في المنتخب الاول لانه ببساطة نتاج لاعمار التزوير !!

اعظم ما خرجنا به من هذه الشكوي ان اسامة عطا المنان مقتنع بان التزوير يستحق الشكوي هههههه .. يعني التزوير ولو كان في اوراق رسمية ممكن نشتكي يا اسامة ؟ ولو كان في التوقيع بدل الرئيس والسكرتير ممكن نشتكي ! ولو كان في تقديم اسماء غير موجود اصلا ممكن تشتكي .. ولو كان في صرف اموال بصورة غير شرعية ممكن تشتكي !! اهو انت عارف الغلط وعارف انو التزوير غلط .. ما شاء الله تبارك الله . برضو خطوة معاك للامام .. بس مجدي شمس الدين ده عضو اللجنة التنفيذية في الاتحاد الافريقي ما عارف الغلط .. الا تدري ايها المحامي القانوني وحامي القانون بان كل فريق شبابك مزور في اعماره ! ولا لاعب ولو كان بالغلط من مواليد 1997 .. كل لاعبي منتخبك مزورين او علي الاقل وضع لهم اتحادك اعمار غير حقيقية في جوازاتهم وانت تدري بذلك ثم توافق علي شكوي كينيا .. يا خي علي الاقل احترموا شرف (التزوير) هم زوروا وانتو زورتوا والنتيجة طلعت تعادل خلوها مستوره كده ! كونوا شركاء في التزوير كما انت شريك في وكالة تاكس !!

جرأة غريبة في كل شئ .. اتحاد معتصم جعفر يرفض تلفزة مباراة الهلال والاهلي بسبب عدم دفع النيلين لاموال التلفزة .. ما دفعوا ليكم يا دكتور عملتوا بيها شنو ؟ ضاعت تبرعات ونثريات وتذاكر سفر زيها وزي اموال الفيفا .. ميزانية ما عندكم من 2013 عايزين شنو بالقروش انتو ما بتشبعوا .. وشايفكم عايزين (تتحللوا) كمان .. كل يوم بدخلوا قروش غرامات في الخزانة .. ما تكونوا بتسحبوها كمان علي ميزانية جديده .. نحن برضوا مفتحين يا دكتور . ما تفتكر نعسانين .. معقول يا د. النعسان وتشتكوا في الاعمار !

جرأة غريبة حتي اتحادات الشمالية تساند معتصم جعفر .. حلوة دي .. المساندة في الفساد بقت علي المكشوف مبروك عليك .. بس مش حتقدر تغمض عينيك .. انا اعدك بذلك يا رئيس اتحاد سيكافا .. عندما تنظم مع رئيس الهلال بطولة سيكافا في الخرطوم وعندما يأتي اهل سيكافا سوف نفتح ملف سيكافا الذي نظمها المريخ !! هل تعرف الكثير عن هذا الملف ! خليك جاهز في المؤتمر الصحفي .. عارف حنسأل عن المليارات وعن النثريات وعن الدولارات ! أبقي جاهز وخلي اسامة يجي معاك عشان ما تقول الملف ده كان ماسكو اسامة او الوالي !! عارف انا قاصد ياتو والي .. ياخي ده مسلسل تركي مبااااالغه..! صدقني ما حتقدر تغمض عينيك .. جيبنو لينا ناس سيكافا ديل نحن زاتنا عندنا ليهم اسئلة كثيرة .. بس يا كاردينال الهلال ما بشبه سيكافا دي فكرة بااااايخه وتذاكر اندية سيكافا من وكالة تاكس برضو!!

ونحن نتحدث عن الشباب نتذكر الفكرة الرائعة لواحد من شباب الهلال الرائعين المهندس الطاهر يونس الذي تبني عبر شركته وشراكته مع الشركة الايطالية مشروع للشباب فاختار شباب باعمار حقيقية ودعمهم بالتدريب والملابس الرياضية ليواجهوا شباب يبحث عن الحياة من لاجئ دارفور في مهرجان كبير اليوم تحت دعم السفارة الايطالية .. الرجال المخلصون الذين يعملون من اجل السودان موجودن ايضا يا دكتور الصيدلة والسموم !