زواج سوداناس

حركات جيش


شارك الموضوع :

> العمل بالجيش في دولة في العالم شرف كبير. > ومهنة يتشرف بها من يمتهنها حتى وهو خاتي كرسيهو في خشم الباب يستمتع بالمعاش. > يحكي ليك عن الجيش والبطولات. > وطبعاً كعادة كل السودانيين. > جياشتنا بتاعين المعاشات بشوفوا ان اجمل فترات الجيش كانت في زمنهم. > جدي كان ضابطاً بالجيش. > ايام جيش وادي النيل. > الجيش السوداني المصري. > ويقال انه اول سوداني يصل رتبة العقيد بلغة اليوم. > انه المأمور والعمدة عبد المجيد علي طه. > الوكت داك الجيش اسمو ديش. > والدي كان ضابطاً بالجيش وكذلك خالي عليهم رحمة الله جميعاً. > جدي كان يرى ان الجيش في زمنو كان جيش جد جد. > لكن الجيش بتاع ناس ابوي وخالي ده جيش ما اصلي. > بعد داك خالي الصغير وعمي الصغير دخلوا الجيش. > الوكت داك ابوي وخالي الكبير كانوا ضباط كباااااار. > وبرضو بعد المعاش كان بقولوا الجيش في زمنهم كان جيش. > ما زي الجيش بتاع زمن خالي الصغير وعمي الصغير. > المهم. > مهما الناس تقول الجيش مستمر. > زمان الرائد اسمو صاغ. > وكان في باش وبيك باش. > في الرتب دي في رتب بالقديم ورتب بالجديد > اسي رقيب اول بالجديد موش ياها ام باشي بالجديد؟ > المهم الجيش هو واجهة الدولة ورمز قوتها ووحدتها. > ويتطور ويأخذ مكانه في المجتمع مشرفاً ومتشرفاً. > وفي اغاني البنات وجد حظو > يجوا عايدين ان شاء الله عايدين يا الله > جياشة والجيش نقلوا فتاشة كر علي انا > ربنا ما يحرمنا من الجيش يا رب > المهم. > يستمر الجيش. > وتستمر علاقة أسرتنا بالجيش. > وها هو كولي قريبي يدافع عن الوان العلم تحت راية قواتنا المسلحة > كولي ضابط وجواهرجي. > يؤمن بالجوهرة الكاردينالية > قابلتوا امس > قال لي حظكم السمح ده يرميكم مع الحمام المغربي؟ > قلت ليهو الكوكب المغربي ما حمام. > قال لي كيف ماحمام؟ > قلت ليهو الكوكب المغربي مسجل في لوح الشرف الافريقي لانه احرز بطولة الاتحاد الافريقي قبل كده > يعني عندو انجاز. > قال لي برضو ما عندو شيء. > قلت ليهو الكوكب بي كأس الاتحاد الافريقي الشالو ما عندو شيء وانت بي صفرك الافريقي عندك شيء؟ > قال لي كيف يعني؟ > قلت ليهو افهمك بلغة الجيش يا جنابو > كأس الاتحاد الافريقي هو دبورة في كتف الكوكب وصفرك ده ازبليطة ساااي يا جنابو > زلبطة. > يبقى بعرف احترام الرتب عند الجياشة المستجد بي ازبليطة لا يحق له التطاول على ملازم. > وجياشة والجيش نقلوا فتاشة كر علي انا > المهم > على مجلس التسيير ان يعمل على لم الشمل في هذه المرحله المهمة. > البلد دي انديتها كلها في وضع الطيران للسنة الجاية. > الخرطوم في وضع طيران. > الجوهرجي في وضع طيران وشبع طيران. > اهلي شندي في وضع طيران. > الفريق للوحيد الشبكتو شغالة هو الزعيم. > وعشان يبقى عندنا وسيلة اتصال بالخارج. > لازم الزعيم يظل جوه الشبكة. > وعشان الزعيم يظل جوه الشبكة لا بد من تجمع اولادو على قلب رجل واحد. > عشان المعسكر. > عشان الاعداد لي سفرة المغرب. > عشان شكل التشجيع. > وعشان مواعيد نفرة القروبات الشهرية جات. > ايها الناس. > ناس القروبات. > انكم تدعمون كياناً ولا تدعمون انساناً. > ومن كان يفهم غير ذلك. > دعمو لا يلزم الزعيم. > المهم. > كولي الجوهرجي تاني رجع لي وقال. > ما فهمت دبورة وازبليطة دي. > قلت ليهو خلي بالك > في الحرب المشاة قدام. > آليات وضباط صف وضباط وقادة. > الجربندية القدام لو في لغم بقوم بيهم. > ولذا قام اللغم بالخرطوم والهلال والاهلي. > بدري بدري لغم الهلال والخرطوم قام. > ناس شندي اللغم ما قام بيهم مع الجربندية. > الجماعة برضك رتبة. > كملت الالغام والآن القائد الزعيم يدخل المجموعات. رافعا راية السودان. > يقاتل من اجله. > ليعود بغنيمة كبيرة كما عاد بها سنة 1989م. > بدري بدري يا كولي اللغم قام بالحمام. > ايها الناس. > الليله كلنا في استقبال الزعيم. > منها استقبال وتحية. > ومنها سند للنصر. > اولتراسات الاربعة على قلب اولتراس واحد. > الروابط وتجمع الروابط حضورا مبكراً. > والشفوت ما بتوصوا. > روشا > عاملين كشافاتكم الشينات ديل. > وكت قاعدين ساي جيبوا دلوكتكم وغنوا. > جياشة والجيش نقلوا فتاشة كر علي انا. > ايها الناس. > ان تنصروا الله ينصركم. > أها. > نجي لي شمارات والي الخرتوم. > كان شفت يا والينا. > شهر تلاتة ترخيص المحاماة علينا. > شهر أربعة ترخيص العربية بجينا. > شهر خمسة عواسة حلومر لأنو رمضان قرب علينا. > شهر ستة رمضان بجينا. > شهر سبعة العيد والمدارس بتفتح علينا. > شهر تمنية عيد الضحية يا والينا. > شهر تسعة قسط المدارس بدخل علينا. > شهر عشرة الخريف والبيوت بتقع علينا > شهر حداشر ناس العوائد بقبلوا علينا. > شهر اطناشر الفلس مع نسوانا بخرب علينا. > شهر واحد عيد الاستقلال يا والينا. > شهر اتنين البرلمان للزيادات الجديدة بجيز لينا. > لرفع المعاناة عن كاهلنا يا والينا. > حقو تنقصوا السنة شهر وبي شهر عسل تبدلوهو لينا. > او تلغوا ستة شهور وسنتنا تبقى خفيفة وسريعة يا والينا. > نقول للزول عمرك كم سنة يا اخينا؟ > بالقديم ولا بالجديد يقول لينا؟ سلك كهربا ننساك كيف والكلب قال ستة سنة بالجديد كفاية جداً على عمرنا في ظرفنا. وإلى لقاء. سلك

شارك الموضوع :

تعليقات الفيسبوك

تعليقات


1 التعليقات

      1. 1
        ابو عبد الله

        وانتو امس لغم الخرطوم الوطني قام بيكم ولسه الغام هلال الابيض وهلال كادوقلي وأهلي شندي .

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *