مهند (الريدة)..جهجهتوا (نور)

شفتوا الموضوع من يجيب (الريدة) – اعرفوه بجيب ليه (قسمة ونصيب)..ويمكن يكون فيها (حدايق).
ومناديل ورق.
وجوابات.
وهدايا.
وعيد الحب.
ناس الهلال ماشه معاهم (باسطة).
السنة دي ناس الهلال داخلين التسجيلات بي (ريدتهم).
دي محبة غريبة.
الحمدلله لا عندنا مشكلة …لا (نسابة) ماكلين اضانا ..زي جماعتنا ديك.
ولا محتاجين لينا لي (نفرة).
(والريد الريد يا اهل لمتين لدياركم نصل).
ممكن الموضوع يصل مرحلة (العقد).
الريدة لو حقيقية بتنتهي بـ (العقد).
والله انا عرفتها – (الجوهرة) دي ما بتمرق ساكت.
الجوهرة دي لازم يكون فيها (الريدة).
(ريدتنا ومحبتنا).
الريدة لو ما كانت في (الجوهرة الزرقاء) تكون وين يعني؟.
ما في جماهير بتريد فريقها ..زي جماهير الهلال.
عشق عديل كدا.
الهلال اصلو كدا ..ريد وحب وعشق.
اها المرة دي الكاردينال جاكم بي (الريدة).
ما في اي كلام.
فهم واضح.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
طبعا انا نقشت ليك الموضوع من حكاية (زول بريدك زي مافي).
زول كتب (زول بريدك زي ما في)…طبيعي يجيب (الريدة).
ويجيب (شيبوب) ذاتو.
اها في دليل – في (برهان) اكتر من (الريدة) دي.
برهان شنو؟.
في (محسن سيد) اكتر من كدا.
بشه والريدة.
كاريكا وولاءالدين.
ابوعاقلة وشيبوب.
تتخيلوا المواضيع دي كلها.
الجوهرة الزرقاء.
وبلاتشي.
وشيبوب
والريدة ذاتها.
الحاجات دي كلها من غير (نفرة).
ما فيها (طوبة) واحدة دخلت فيها من النفرة.
الحكومة ما دفعت لينا (قرش).
ولا مليم.
لا نفرة ..ولا قروش (قروبات).
ريدتنا بنجيبها بي ضراعنا.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
طبعا ناس الهلال (الريدة) عندهم من زمن (وردة).
من زمن مهند الطاهر.
هوبة مهند الطاهر هوبة (ريدة) للهلال.
ريدة في الهلال.
(والريدة ما بالغصب).
مهند الطاهر (الريدة) الاخيرة اثبتها في الابيض.
جاب ليك قون في الجماعة – خلى ليك شكلاتهم مدورة اليوم كلو.
والله لو ما لحقوهم بـ(النفرة) الاخيرة دي …ناس المريخ فريق (الكوكب المراكشي) إلّا يلقوه بـ (الامير) البحراوي.
تراوري مصاب.
راجي عبدالعاطي.
بكري المدينة.
رمضان عجب.
وعلي جعفر موقوف.
اها (النفرة) عاد التبقى ليكم (علاج).
الهلال قصد في التسجيلات التى سوف تبدأ يوم 11 مايو ان يصيب عصفورين بي حجر واحد.
قام جاب (مهند).
وجاب (الريدة).
عشان يكون عندنا (مهند الريدة).
والحتة دي كدا بتدخلنا في (المسلسلات التركية) عديل كدا.
مهند.
وكمان (ريدة).
كدا بتجهجهوا لينا (نور شاد أوغلو) ساكت.
شفتوا الكلام دا كيف؟.
بجيبها ليك بي اسمها.
ولا بتلفت.
ولا بعاين في ورقة زميلي.
هي (نور) بدون (الريدة) كان مهند الطاهر بجهجها.
هسع مهند جاب ليه (ريدة) – عاوزين (نور) تقعد ليكم.
(نور شاد أوغلو) ما بتقعد ليكم في انقرا.
(كيفانتش تاتليتوغ) التى جسدت دور نور في مسلسل مهند ونور تاني ح تشوفوها في (الجوهرة الزرقاء).
الحركات الكان بتعمل فيها في المسلسل – ح تعملها ليكم في الجوهرة الزرقاء.
مع (مهند الريدة) …تاني (تمرين) للهلال ما بتفوتو.
كمان نحن ما بنعرف (كيفانتش تاتليتوغ).
زولة خفيفة.
وقلبها كعب.
بس يا (كيفانتش تاتليتوغ) ما عندنا (حُرمة) بتدخل استاد الهلال.
إلّا تشوفوا ليكم (كافتيرة) شاي وتدخلى بيها المدرجات الشعبية.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
مهند الريدة ..ح اتكلم ليكم عنو في حتتين.
ح اتكلم ليكم عن (مهند).
وح اتكلم ليكم عن (الريدة).
افتكر (الريدة) ما قصرنا ليكم فيها.
مهند موسى هو مهاجم فريق كوبر متصدر دوري الدرجة الاولى في ولاية الخرطوم.
مهند هو الشقيق الاصغر لمهاجم المريخ السابق محمد موسى الذي يلعب الآن في احد اندية الممتاز.
مهند يتصدر قائمة الهدافين بـ (18) هدف – سجلها مهند في (10) مباريات.
مهند الريدة في دوري الدرجة الاولى هذا العام جاء بشيء غريب.
جاء بي حاجة ما سبقه عليها زول.
سجل مهند الريدة تلاتة (سوبر هاتريك) في مباريات الدرجة الاولى هذا العام.
يعني الزول دا في تلات مباريات جاب ليه (12) هدف.
اها دا ناس ضفر وعلي جعفر وامير كمال بقعدوا ليه.
والله دا لا زول بيلعبوا معاهو ولا حاجة.
12 قون في تلات مباريات ..(ما شاءالله).
دا ممكن يعمل لينا ازمة في (الاهداف).
الريدة دا لو جاء الهلال بي طريقتو دي ..مباريات الهلال تاني عادي تنتهي 17 / صفر.
يقولوا ليك الهلال غالب كم؟.
تقول ليهم 11 / صفر.
عادي جدا الهلال يغلب ليك المريخ 9 / صفر.
مهند موسى براهو بجيب (4) اهداف.
والقون في الدرجة الاولى اصعب من القون في الممتاز.
الممتاز فيه اعلام.
وفيه جماهير كثيرة.
وتلفزيون.
وحوافز.
مهند الريدة لو لعب في الممتاز ..إلّا تشوفوا ليكم (محاسب) لنتائج مباريات الهلال.
يعني حكم الراية لو ما عندو دبلوم عالي في (المحاسبة) ما يحكم لينا مباراة للهلال.
الزميل الجيلاني عيسي متابع لكل مباريات الدرجات في ولاية الخرطوم – سألتو امس عن (مهند الريدة)..قال الزول دا اي كورة بلقاها قدامو في خط (18) بجيبها قون.
اي كورة عندو في (18) قون.
الحكم طوالي بجري النص.
مهند موسى يتمتع ببنيان جسماني ممتاز – اضافة الى صغر سنه ..وقدرته التهديفية العالية.
مهاجم قناص.
الاستاذ بابكر مختار شاهده في شباب بري وكركوج يسجل (29) هدفا في موسمين وهو يراهن عليه ايضا.
عشان كدا ناس الجريف اطلقوا عليه (الريدة عذاب).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
دا الكلام عن (مهند).
نرجع للكلام عن (الريدة).
و(كيفانتش تاتليتوغ).
غايتو نحن في الجرايد ..ادينا ح تلقى براحها بعد اي مباراة للهلال عشان نكتب عن (الريدة).
نحن ذاتو عاوزين لينا سبب.
الحكاية دي بنفتش ليها تفتيش.
ودنيا الريد غريبة ..سر ما بنفهمو ..ناس افراحها زايدة ..وناس (بتنفروا).
البتنفروا ديل طبعا جماعتنا بتاعين (النفرة).
مهند الريدة بعد مباراة الهلال مع المريخ يوم 20 يونيو القادم ..ح يجمع ليك ناس علي جعفر ويطرح ليك ناس ضفر.
نحن بعد هذه المباراة ان شاءالله نكتب (الريد يجمع ويفرق …بحر يروي ويغرق).
وزول بريدك زي ما في.
وبريدك يا حبيبي بريدك.
والبريدو مالو بريدو اتأخر.
ح تتعبوا معانا تاني في موضوع (الريدة) دي.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
…………….
و
المحترف الزي فحص الملاريا دا – البعملو ليه (اختبارات) ما بنفع معانا.
كل الاسماء المطروحة الآن في ملف المحترفين ما مبشرة.
خايفين نندم على الشيخ موكورو.
ازيكال امس سجل اكثر من مرة في شباك الاهلي شندي.
وكلتشي وصل لرقم قياسي وسجل ايضا في شباك الامل عطبرة.
وسادومبا على الخط.
محترف شايفنو ..وعارفنو ..احسن لينا من (بطيخة مقفولة).
الدوري السوداني فيه اكثر من محترف يمكن ان يلعب في الهلال.
ديدي محترف المريخ السابق – افضل من الاسماء المطروحة في الهلال الآن.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
…….
السيدة (ل) ..في زول عمل حادث مع (ضلو) في شارع الستين..فكو الزول العمل الحادث ومسكو (ضلو).
وقرّط على كدا.